काठमाडौं- कोलकाता नाइट राइडर्स र सनराइजर्स हैदरावादको टोली शुक्रबार मुम्बईको ब्रेबोर्न स्टेडियममा भिड्दैछन्। इन्डियन प्रिमियर लिग (आईपीएल)को इतिहासमा अहिलेसम्म कोलकाता हैदरावादमाथि हाबी हुँदै आएको छ। यद्यपि, हैदरावाद लगातार दुई जितका साथ उच्च मनोबलमा छ। यता, कोलकाता क्याम्प विजयी ट्र्याकमा फर्किन प्रयासरत छ।
हैदरावादलाई कप्तानको भर
हैदरावादका कप्तान केन विलियम्सन आफ्नो उत्कृष्ट ब्याटिङका लागि परिचित छन्। विलियम्सनले पछिल्लो दुई खेलमा ५७ र ३२ रन बनाएका छन्। कोलकाताका बलरसामु उनले आक्रामक ब्याटिङ गर्छन्।
कोलकाताविरुद्धको पछिल्लो ८ खेलमा ६ पटक २० वा सोभन्दा बढी रन बनाएका छन्। उनी पछिल्लो टी२० विश्वकपमा सर्वाधिक २१६ रन बनाउने खेलाडी पनि थिए। विश्वकपको फाइनलमा उनले ८५ रन बनाए पनि त्यो खेल अस्ट्रेलियाले जितेको थियो।
विलियम्सनले आईपीएलमा कोलकाताका उमेश यादवको बलमा १९७ को स्ट्राइक रेटमा ३५ बलमा ६९ रन बनाएका छन्। पाँच इनिङ्समा उमेशले विलियम्सनको एक पटक पनि विकेट लिन सकेका छैनन्।
योसँगै प्याट कमिन्स र सुनिल नारायणले विलियम्सनलाई एकपटक पनि आउट गर्न सकेका छैनन्। कमिन्सको बलमा विलियम्सनले २५ बलमा १४० को स्ट्राइक रेटमा ३५ रन बनाएका छन्। नारायणले विलियम्सनलाई एकपटक पनि प्याभिलियन पठाउन सकेका छैनन्। तर, उनले विलियम्सनलाई आफ्नो ओभरमा खुलेर खेल्न दिएका छैनन्। विलियम्सनले ९ इनिङ्समा ८७ को स्ट्राइक रेटमा ३८ रन बनाएका छन्। यस क्रममा नारायणले ४७ बल फ्याँकेका छन्।
कोलकातालाई पूर्वब्याट्सम्यानको डर
हैदरावादका लागि तेस्रो नम्बरमा ब्याटिङ गर्दै आएका कोलकाताका पूर्वब्याट्सम्यान राहुल त्रिपाठी यस सिजन राम्रो लयमा छन्। उनी मध्य ओभरमा राम्रो ब्याटिङ गर्न क्रिजमा जान्छन्। उनले मध्य ओभरमा १७८.५७ को स्ट्राइक रेटमा ४२ बल सामना गर्दै ७५ रन बनाएका छन्। यस अवधिमा उनी एकपटक मात्र आउट भएका छन्। यति मात्र होइन आईपीएलमा उनको उच्चतम स्कोर ९३ हो, जुन उनले आफ्नो पुरानो टोली कोलकाताविरुद्ध २०१७ मा बनाएका थिए।
राहुललाई पनि उमेश र नारायण दुवैले एकपटक पनि आउट गर्न सकेका छैनन्। राहुलले ६ इनिङ्समा नारायणको ३३ बलमा १६१ को स्ट्राइक रेटमा ५३ रन बनाएका छन्। उमेशविरुद्ध राहुलले अझ आक्रामक खेलेका छ्न्। उनले उमेशको २८ बलमा २२१ रनको स्ट्राइक रेटमा पाँच इनिङ्समा ६२ रन बनाएका छन्।
आन्द्रे रसेलले पक्कै पनि राहुललाई रोक्न सक्छन्। उनले राहुललाई १५ इनिङ्समा जम्मा चार पटक प्याभिलियनको बाटो देखाइसकेका छन्। तर, रसेलविरुद्धमा राहुलले आक्रमण शैलीमा ब्याटिङ गरेका छन्। उनले रसेलको ५७ बलमा १५१ को स्ट्राइक रेटमा ८६ रन बनाएका छन्।
भुवनेश्वरको कसिलो बलिङ
कोलकाताका ब्याट्सम्यानलाई सबैभन्दा ठूलो खतरा भुवनेश्वर कुमारको बलबाट छ। आईपीएलको ट्र्याक रेकर्डले भुवनेश्वरले आरोन फिन्च र श्रेयस अय्यरलाई तीन-तीन पटक आउट गरेका छन्। भुवनेश्वरविरुद्ध फिन्चले १२ इनिङका ५३ बलमा ८५को स्ट्राइक रेटमा ४५ रन बनाएका छन्। जबकि अय्यरले भुवनेश्वरबाट ४८ बलमा ८५ को स्ट्राइक रेटमा ९ इनिङ्समा ४१ रन बनाएका छन्।
यो वर्ष अय्यरको प्रदर्शन टी२० खेलमा निकै राम्रो रह्यो। अय्यरले यो वर्ष ९ इनिङ्समा ७०.४० को औसत र १६२.९६ को स्ट्राइक रेटमा ३५२ रन बनाएका छन्। हैदरावादविरुद्ध पनि उनको कीर्तिमान राम्रो छ। उनले हैदरावादविरुद्ध ९ इनिङ्समा ३५.७५ को औसतमा २८६ रन बनाएका छन्।
योसँगै नितिश राना र रसेललाई पनि भुवनेश्वरले दुई पटक प्याभिलियन पठाइसकेका छन्। तर, भुवनेश्वरविरुद्ध रसेलले आक्रामक ब्याटिङ गर्दै १९ बलमा २३२ को स्ट्राइक रेटमा ४४ रन बनाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
