काठमाडौं– इन्डियन प्रिमियर लिग (आईपीएल)२०२२ अन्तर्गत २३औं खेलमा पाँच पटकको विजेता मुम्बई इन्डियन्स टोली र पञ्जाब किंग्स खेल्दै छन्। खेल बुधबार एमसीए स्टेडियम पुणेमा नेपाली समयअनुसार बेलुका ७:४५ बाट सुरु हुनेछ।
यस सिजन ४ खेलमा नै पराजित रहेको मुम्बई पञ्जाबविरुद्ध जितको लक्ष्यसहित मैदान उत्रिने छ। यता, ४ मध्ये २ खेलमा जित निकालेको पञ्जाब पनि मुम्बईविरुद्ध जितको खोजिमा हुनेछ।
मुम्बई पहिलो खेलमा दिल्ली क्यापिटल्ससँग ४ विकेटले पराजित भएको थियो। यस्तै, दोस्रो खेलमा राजस्थान रोयल्ससँग २३ ले पराजित भएको मुम्बई तेस्रो खेलमा कोलकाता नाइट राइडर्ससँग ५ र चौथो खेलमा रोयल च्यालेन्जर्स बैंग्लोरसँग ७ विकेटले पराजित भएको थियो।
यता, पहिलो खेलमा बैंग्लोरलाई ५ विकेटले हराउँदै सानदार सुरुआत गरेको पञ्जाब दोस्रो खेलमा कोलकातासँग ६ विकेटले पराजित हुन पुगेको थियो। यस्तै, तेस्रो खेलमा ४ पटकको विजेता चेन्नई सुपर किंग्सलाई ५४ रनले पराजित गर्दै पुनरागमन गरेको पञ्जाब चौथो खेलमा नवप्रवेशी गुजरात टाइटन्ससँग ६ विकेटको निराशाजनक हार व्यहोर्न बाध्य भएको थियो।
एमसीए स्टेडियम पुणेमा यस सिजन आईपीएलमा कुल चार खेल भइसकेको छ। यस अवधिमा पहिलो इनिङ्समा ब्याटिङ गर्ने टोलीले २ खेल जितेको छ भने दोस्रो इनिङ्समा ब्याटिङ गरेको टोलीले २ खेल जितेको छ। तर, यस मैदानमा पञ्जाब किंग्सको कीर्तिमान निकै कमजोर छ। उसले यहाँ ७ मध्ये ६ खेलमा हार व्यहोरेको छ।
सबैभन्दा धेरै छक्का प्रहार गर्ने खेलाडीको भेट
आईपीएल २०२० पछि सबैभन्दा धेरै छक्का प्रहार गर्ने १० मध्ये चार खेलाडी यस खेलमा आमनेसामने हुने छन्। इशान किशनले २०२० यता ४३ छक्का प्रहार गरिसकेका छन् भने किरोन पोलार्डले ४२, रोहित शर्माले ३७ र मयंक अग्रवालले ३५ छक्का प्रहार गरेका छन्। योसँगै पोलार्ड पञ्जाबविरुद्ध सर्वाधिक छक्का प्रहार गर्ने खेलाडीमा चौथो नम्बरमा छन्। उनले पञ्जाबविरुद्ध २२ इनिङ्समा ४१ छक्का प्रहार गरेका छन्।
दबाबमा रोहित, खुलेका किशन
मुम्बईका कप्तान रोहित ४ खेलमा ४ पराजयपछि निकै दबाबमा छन्। रोहितले यो सिजन ४१(३२) र २६(१५) जस्ता केही राम्रा इनिङ्स खेलेका छन्। तर, अब उनले यो भन्दा ठूलो इनिङ्स खेल्न आवश्यक छ।
पछिल्लो १२ इनिङ्समा रोहितले कुनै पनि अर्धशतक बनाएका छैनन्। योसँगै २०२१ देखि ओपनरका रूपमा रोहितको औसत २१.१ छ र यस अवधिमा उनले २११ रन बनाएका छन्। तर, पुणेको यो मैदानमा रोहितको कीर्तिमान उत्कृष्ट रहेको छ ।
पुणेमा आफ्नो पछिल्लो ५ खेलमा उनले ५७.६७ को औसत र १३६.२२ को स्ट्राइक रेटमा १७३ रन बनाएका छन्। यदि रोहितले यो खेलमा २५ रन बनाए टी२० क्रिकेटमा आफ्नो १० हजार रन पूरा गर्नेछन्।
यता, आईपीएल २०२० देखि किशनले ओपनरको रूपमा ८५ को औसत र १५२ को स्ट्राइक रेटमा ५११ रन बनाएका छन्। उनले १० इनिङ्समा ६ अर्धशतकसहित ५११ रन बनाएका छन्। यति मात्र होइन, कम्तिमा २५० रन बनाएका ओपनरमध्ये पूरै आईपीएमा किशनको औसत सबैभन्दा राम्रो छ र स्ट्राइक रेटका हिसाबले उनी पृथ्वी शपछि दोस्रो स्थानमा छन्। आईपीएल २०२० यता उनी पावरप्लेको समयमा आउट भएका छैनन्।
‘गेम चेन्जर’
सूर्यकुमार यादवले ६८*(३७) र ५२(३६) को उत्कृष्ट इनिङ्स खेल्दै यस सिजन सकारात्मक सुरुआत गरेका छन्। यद्यपि, उनले विगतमा पञ्जाबविरुद्ध खासै प्रदर्शन गर्न सकेका छैनन्। पञ्जाबविरुद्ध उनको औसत २०.०८ छ। यो आईपीएलमा कुनै पनि टोलीविरुद्ध उनको सबैभन्दा खराब औसत हो र त्यसैले उनी सुरक्षित इलेवन छैनन्।
२०१८ देखि २०२१ मा सुर्यकुमारले सबै सिजनमा ३० भन्दा माथिको औसतमा रन बनाएका छन् र कुनै पनि सिजनमा १३० भन्दा कमको स्ट्राइक रेट छैन। यस सिजनमा उनको स्ट्राइक रेट १६४ रहेको छ। २०१८ देखि उनले ३४. ३ को औसतमा १८६४ रन बनाएका छन्, जसले उनको निरन्तरता देखाउँदछ।
तिलक वर्मा यस आईपीएल सिजनमा सबैभन्दा बढी प्रभावशाली देखिएका छन्। उनले आफ्नो ४ इनिङ्समा कुल १२१ रन बनाएका छन् । हालै खेलिएको सैयद मुश्ताक अली ट्रफीमा उनी सर्वाधिक रन बनाउने खेलाडी (२१५) मध्ये एक हुन्। त्यसबेला उनको स्ट्राइक रेट १४७.२६ थियो।
यता, जितेश शर्माले आफ्नो विकेटकिपिङ र ब्याटिङले सबैलाई प्रभावित पारेका छन्। उनले आफ्नो दुई इनिङ्समा २६(१७) र २३(११) रन बनाएका छन्। उनले दुईवटा क्याच पनि लिएका छन्। हालै खेलेको सैयद मुश्ताक अली ट्रफीमा उनले ७ खेलमा २५३.१६ को स्ट्राइक रेटमा २१४ रन बनाएका थिए।
पञ्जाबको भर
विश्वका अन्य शीर्ष लिगमा आफ्नो क्लास देखाएपछि इंग्ल्याण्डका प्रतिभाशाली खेलाडी लियाम लिभिङ्स्टनले अन्ततः आईपीएलमा पनि आफ्नो छाप छोड्दैछन्। उनी यस सिजन पञ्जाब किंग्सका लागि चार इनिङ्समा १९०.५८ को स्ट्राइक रेटमा १६२ रन बनाएर सर्वाधिक रन बनाउने खेलाडी बनेका छन्।
लिभिङस्टनले यो सिजन लगातार दुई अर्धशतक बनाएका छन् र यी दुवै इनिङ्स पञ्जाबका लागि निकै प्रभावकारी रहेका छन्। यस आईपीएलमा लिभिङ्स्टनले फास्ट बलरविरुद्ध २०७ र स्पिन बलरविरुद्ध १६० को स्ट्राइक रेट राखेका छन्।
राहुल चाहरले २०१९ मा मुम्बईका लागि आफ्नो पहिलो खेल खेलेका थिए। उनी २०१९ पछि मुम्बईको दोस्रो सर्वाधिक विकेट लिने (४१) खेलाडी हुन्। यद्यपि, उनी अहिले पञ्जाबबाट खेलिरहेका छन्। यस आईपीएलमा चाहरले ७ विकेट लिएका छन् भने ६.३ को इकोनोमीमा मात्र रन खर्चेका छन्।
आफ्नो पूर्व टोली मुम्बईविरुद्ध खेल्दै राहुल चाहरले प्रभाव पार्ने प्रयास गर्नेछन्। उनले यो सिजन खेलेका चारै खेलमा असाधारण प्रदर्शन गरेका छन्। उनी ७ विकेटका साथ पञ्जाबका सर्वाधिक विकेट लिने खेलाडी बनेका छन्। ब्याटिङमा उनले १२ र २२ नटआउट रन पनि योगदान गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
