काठमाडौं– इन्डियन प्रिमियर लिग (आईपीएल)मा अन्तिम पटक सन् २०१० मा चार पटकको उपाधि विजेता चेन्नई सुपर किंग्सले लगातार चार खेलमा हार बेहोरेको थियो। यो दोस्रो पटक हो, चेन्नईले करिब १२ वर्षपछि लगातार चार खेलमा हार व्यहोरेको।
१० टोली सहभागी प्रतियोगितामा सबै खेल निक्कै महत्वपूर्ण हुन्छन्। तर, अनुभवी ब्याटरको कमी देखिएको चेन्नईले हालसम्म जित निकाल्न सकेको छैन। यस्तो अवस्थामा चेन्नईभन्दा रोयल च्यालेन्जर्स बैंग्लोर अगाडि छ, जसले पूर्वचेन्नई खेलाडी फाफ डु प्लेसिसको कप्तानीमा चारमध्ये तीन खेल जितेको छ।
चेन्नईको ब्याटिङमा डु प्लेसिसको कमी प्रष्ट देखिन्छ। रोबिन उथप्पाले राम्रो सुरुआत गर्ने सक्दो प्रयास गरिरहेका छन्, तर ऋतुराज गायकवाडको खराब फर्मका कारण चेन्नईले आफूलाई बलियो स्थानमा उभ्याउन सकेको छैन।
अघिल्लो खेलमा सनराइजर्स हैदरावादसँगको हारपछि प्रशिक्षक स्टिभन फ्लेमिङले हरेक डिपार्टमेन्टले गल्ती गरेको र टोलीको आत्मविश्वासको कमी भएको स्वीकार गरेका थिए।
चेन्नईले ७औं र १६ औं ओभरको बीचमा ७ रनरेटभन्दा अलि माथि पुगेर रन बनाएको छ, जुन यस चरणमा पाँच पटकको उपाधि विजेता मुम्बई इन्डियन्सको भन्दा राम्रो छ। तर, सोही ओभरमा बैंग्लोरले ९.१३ रनरेटमा रन बनाएको छ, जुन लिगका सबै टोलीहरूमध्ये दोस्रो उत्कृष्ट अंक हो।
यद्यपि, मोहम्मद सिराज र सम्भवतः हर्षल पटेलको स्थान लिने सिद्धार्थ कौलविरूद्ध चेन्नईका गायकवाड, अम्बाती रायडु र महेन्द्रसिंह धोनी जस्ता खेलाडीको रेकर्ड धेरै राम्रो छ। धोनीले सिराज र सिद्धार्थको बलमा १८२ र १७२ को स्ट्राइक रेटमा रन बनाएका छन्।
तर, चेन्नईको समस्या बलिङमा पनि छ। चेन्नईले अहिलेसम्म पावरप्लेमा मात्र एक विकेट लिएको छ र प्रतिओभर ८.६२ रन दिएको छ। अर्कोतर्फ, बैंग्लोरले पावरप्लेमा ४ विकेट मात्र लिएको छ, तर उसको रनरेट ८ भन्दा कम छ। यता ब्याटिङमा अनुज रावतबाहेक, डु प्लेसिस, विराट कोहली, शाहबाज अहमद र दिनेश कार्तिक पनि राम्रो फर्ममा देखिएका छन्।
सम्भावित ११
चेन्नई सुपर किंग्स: रोबिन उथप्पा, ऋतुराज गायकवाड, मोइन अली, अम्बाती रायडु, शिवम दुबे, रवीन्द्र जडेजा (कप्तान), महेन्द्रसिंह धोनी (किपर), ड्वेन ब्राभो, ड्वेन प्रिटोरियस, क्रिस जोर्डन, मुकेश चौधरी/तुषार देशपान्डे
रोयल च्यालेन्जर्स बैंग्लोर: फाफ डु प्लेसिस (कप्तान), अनुज रावत, विराट कोहली, ग्लेन म्याक्सवेल, दिनेश कार्तिक (किपर), शाहबाज अहमद, जोस हेजलवुड/डेभिड विली, वानिन्दु हसरंगा, सिद्धार्थ कौल, मोहम्मद सिराज, आकाश दीप
बैंग्लोर र चेन्नईबीच २८ खेल भएका छन्। चेन्नईले १८ र बैंग्लोरले ९ खेलमा जित निकालेको छ। सन् २०१८ यता चेन्नईले ६ पटक खेल जितेको छ। तर, यो सिजनको फर्मलाई हेर्दा बैंग्लोरले यो कीर्तिमानमा सुधार गर्न सक्ने देखिन्छ।
रणनीतिक बिन्दु
भानिन्दु हसरङ्गाले अहिलेसम्म ८ विकेट लिएका छन् भने ७ विकेट दाहिने हाते ब्याट्सम्यानविरुद्ध हुन्। उनको इकोनोमी ९ पुगेको छ। चेन्नईमा मोइन, जडेजा र शिवम दुबे जस्ता तीन जना ब्याट्सम्यान छन्, जो दाहिने हाते हुन्। शिवमले यो सिजन दुईवटा ठूला इनिङ्स खेलेका छन् र दुवै खेलमा उनी पहिलो ८ ओभरमा ब्याटिङ गर्न आएका छन्।
आईपीएल २०२१ देखि स्पिनविरूद्ध उनको स्ट्राइक रेट १३५ छ र १२ इनिङ्समा ३ पटक मात्रै स्पिनको शिकार भएका छन्। यस्तो अवस्थामा हसरङ्गाविरुद्ध थप ओभर ब्याटिङ गर्दै नियन्त्रणमा ल्याउने जिम्मेवारी उनलाई दिन सकिन्छ।
यता, यस वर्ष चेन्नईका लागि मोइन अली उत्कृष्ट लयमा रहेका छन् र उनले एक शून्यबाहेक बाँकी दुई इनिङ्समा ४८ र ३५ रन बनाएका छन्। बैंग्लोरले चेन्नईका ओपनरलाई छिट्टै प्याभिलियन पठाएर मोइनलाई रोक्ने प्रयास गर्नेछ। यस्तो अवस्थामा ग्लेन म्याक्सवेलको प्रयोग गर्न सकिन्छ। अफ स्पिनर म्याक्सवेलले बायाँ हाते मोइनलाई टी२० आईको ४ इनिङ्समा २ पटक आउट गरेका छन्। यस अवधिमा मोइनले म्याक्सवेलविरुद्ध मात्र ७३ को स्ट्राइक रेट र ५.५ को औसतमा रन बनाउन सकेका छन्।
यो खेल मुम्बईको डीवाई पाटिल स्टेडियममा खेलिने छ, जहाँ यस सिजनमा ८७ छक्का प्रहार भएका छन्। दुवै टोलीमा फाफ डु प्लेसिस, म्याक्सवेल, मोइन, रविन्द्र जडेजा, विराट कोहली, दिनेश कार्तिक र महेन्द्र सिंह धोनीजस्ता आक्रामक ब्याट्सम्यानको साथ मैदान उत्रिने छन्। त्यसैले यो खेलमा छक्काको वर्षा हुने अनुमान गरिएको छ। यसअघि २०१८ मा दुई टोलीबीचको खेलमा ३३ छक्का प्रहार भइसकेका छन्, जुन आईपीएलमा संयुक्त रूपमा सबैभन्दा बढी छक्का प्रहार भएको खेल हो।
योसँगै धोनीले बैंग्लुरुविरुद्ध २९ इनिङ्समा ४६ छक्का प्रहार गरेका छन्। बैंग्लोरका पूर्वकप्तान विराट उनलाई पछ्याइरहेका छन्। उनले चेन्नईविरुद्ध २७ इनिङ्समा ३६ छक्का प्रहार गरेका थिए, जुन येलो आर्मी विरुद्ध कुनै पनि खेलाडीको दोस्रो सर्वाधिक छक्का हो।
कप्तानी छाडेका दुवै खेलाडी रनका हिसाबले एकअर्काको टोलीसँग भारी छन्। विराटले चेन्नईविरुद्ध ४१.२ को औसत र १२७ को स्ट्राइक रेटमा ९ अर्धशतकको मद्दतले सबैभन्दा बढी ९४८ रन बनाएका छन्। यता, धोनीले पनि बैंग्लुरुविरुद्ध २९ इनिङ्समा १४१ को स्ट्राइक रेटमा ४ अर्धशतक बनाएका छन् भने ४१.८ को औसतमा ८३६ रन बनाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
