काठमाडौं– इन्डियन प्रिमियर लिग (आईपीएल)को पहिलो दुई खेल जितेको राजस्थान रोयल्स रोयल च्यालेन्जर्स बैंग्लोरविरुद्ध आफ्नो विजयी अभियान जारी राख्न चाहन्छ। योसँगै बैंग्लोरको टोली पनि आफ्नो दोस्रो खेलमा जित हात पार्दै विजयी गति अगाडि बढाउन चाहन्छ। यी दुईबीचको खेल वानखेडे स्टेडियममा नेपाली समयअनुसार मंगलबार ७:४५ बजेबाट सुरु हुनेछ।
राजस्थानविरुद्ध बैंग्लोरको कीर्तिमान निकै राम्रो रहेको छ। यी दुई टोलीबीच कुल २४ खेल भएको छ। जसमा बैंग्लोरले १२ पटक जितेको छ भने राजस्थानले मात्र १० खेल। साथै, २०२० देखि यी दुई टोलीबीच चार खेल भएका छन् र चारै खेलमा बैंग्लोरले जित हासिल गरेको छ।
फास्ट बलरहरूको लागि उपयोगी पिच
वानखेडे स्टेडियमको पिचमा फास्ट बलरहरूले आईपीएल २०२० यता २६ इनिङ्समा ११५ विकेट लिएका छन्। अर्कोतर्फ, स्पिन बलरले २९ विकेट लिएका छन्। तर, रन दिने मामिलामा स्पिनको इकोनोमी फास्ट बलरको तुलनामा राम्रो रहेको छ। स्पिनरले ७.५ को इकोनोमीमा रन दिएका छन् भने फास्ट बलरको इकोनोमी ८.८ छ।
कप्तान फाफ डु प्लेसिसको समस्या ट्रेन्ट बोल्ट र रविचन्द्र अश्विन हुन्। उनीहरुले फाफलाई तीन–तीन पटक आउट गरेका छन्। यति मात्र होइन, यी दुई बलरका अगाडि फाफको औसत २० भन्दा कम छ। बोल्टविरुद्ध फाफको स्ट्राइक रेट ८८ र अश्विनविरुद्ध १०९ छ।
कोहलीको विराट स्ट्राइक रेट
राजस्थानका फास्ट बलरविरुद्ध विराट कोहलीको स्ट्राइक रेट निकै राम्रो छ। नाथन कुल्टर नाइलविरुद्ध विराटको स्ट्राइक रेट १८४ रहेको छ। यता, प्रसिद्ध कृष्णविरुद्ध २०४ को स्ट्राइक रेटमा रन बनाए छन् भने बोल्टविरूद्ध १४३ को स्ट्राइक रेट छ। स्पिनको कुरा गर्दा आश्विनले २० इनिङ्समा एक पटक मात्र विराटलाई आउट गरेका छन्।
यता, भानिन्दु हसराङ्गा र मोहम्मद सिराजविरुद्ध सञ्जु सामसनको कीर्तिमान निकै कमजोर रह्यो। हसरंगाले चार खेलमा तीन पटक सामसनलाई आउट गरेका छन्। सिराजले चार खेलमा दुई पटक सामसनलाई आउट गरेका छन्।
सन् २०२१ यता आईपीएलमा १६ देखि २० ओभरमा सर्वाधिक रन बनाउने खेलाडीको सूचीमा दिनेश कार्तिक चौथो स्थानमा छन्। उनी प्रायः हरेक ४.६ बलमा एक चौका प्रहार गर्छन्। यो अवधिमा उनको स्ट्राइक रेट १५६ रहेको छ । यस आईपीएलमा उनको स्ट्राइक रेट अझै बढेको छ र उनले २१९ को स्ट्राइक रेटमा रन बनाइरहेका छन्।
आत्मविश्वासी बट्लर
आईपीएलको पहिलो दुई खेलमा राजस्थान रोयल्सका जोस बट्लर र मुम्बई इन्डियन्सका इशान किशनले १ सय ३५ रन बनाएका छन्।
अहिले दुवै खेलाडी ‘ओरेन्ज क्याप’को दौडमा बराबरीमा छन्। मुम्बई र राजस्थानबीचको खेलमा बट्लरले ६८ बलमा १०० रन बनाएका थिए भने सोही खेलको दोस्रो इनिङ्समा किशनले ४३ बलमा ५४ रन बनाएका थिए।
मुम्बईको पहिलो खेलमा पनि किशनले ४८ बलमा ८१ रनको इनिङ्स खेलेका थिए। तर, उनको टोलीले यी दुवै खेलमा हार बेहोरेको थियो। राजस्थानको दोस्रो खेलमा शतक बनाएपछि बट्लर रोकिने मुडमा छैनन्।
रोयल्सको अर्को खेलअघि उनले भने, ‘मुम्बईविरुद्धको पिचमा बिताएको समयले मलाई धेरै आत्मविश्वास दिएको छ। सिजनको सुरुआतमा राम्रो प्रदर्शन गरेपछि आगामी खेलहरूमा पनि त्यो आत्मविश्वास कायम राख्न चाहन्छु।’
बट्लरको तुफानी शैली धेरै घण्टाको कडा परिश्रमको फल हो, जसले उनलाई विश्व क्रिकेटको खतरनाक ब्याट्सम्यान मध्ये एक बनाएको छ। यो मुम्बईविरुद्ध स्पष्ट देखिन्थ्यो, जब उनले आफ्नो समय लिए र १४ बलमा मात्र १२ रन बनाए।
एकपटक परिस्थितिको बुझिसकेपछि उनी कसैको लागि रोकिँदैन। बट्लरले भने, ‘पावरप्लेमा तपाईं छिटो रन बनाउन चाहानुहुन्छ। मलाई लाग्छ तपाईं पहिलो दुई ओभरको अवस्थाबारे जानकारी लिनुहुन्छ र त्यसपछि पावरप्लेको फाइदा उठाउने प्रयास गर्नुहोस्।’
बट्लरले मुम्बईविरुद्धको इनिङ्सको चौथो ओभरमा बासिल थाम्पीलाई निशाना बनाए र एक ओभरमा तीन छक्का र दुई चौका प्रहार गरे। उनले २६ रन बनाएर मोन्टम समातेर मुम्बईका बलरलाई तहसनहस पारे।
मुम्बईविरुद्ध बट्लरले ६८ बलमा १०० रन बनाएर टोलीलाई १९३ रनको स्कोरमा पुर्याए, जुन टोलीलाई यो सिजनमा लगातार दोस्रो जित दिलाउन पर्याप्त थियो।
आईपीएलको एक सिजनमा पाँच ब्याट्सम्यानले मात्र दुई वा सोभन्दा बढी शतक प्रहार गरेका छन्। शिखर धवन लगातार दुई खेलमा शतक बनाउने एक मात्र खेलाडी हुन्। लगातार दुई शतकको बारेमा सोध्दा बट्लरले भने, ‘तपाईं हरेक खेलमा यही गरोस् भन्ने चाहनुहुन्छ, तर म टिममा राम्रो योगदान दिन चाहन्छु।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
