काठमाडौं– नेपाली क्रिकेट टोलीक मुख्य प्रशिक्षक पुबुदु दसानायकेले नयाँ खेलाडीहरूको आगमनले टिमलाई थप बलियो बनाएको बताएका छन्।
घरेलु टोली नेपालले सोमबार त्रिकोणात्मक टी२० आई सिरिजअन्तर्गत फाइनलमा पपुवा न्यू गिनीलाई ५० रनले हराउँदै उपाधि जितेको छ। उपाधि जितेपछि सञ्चारकर्मीहरुसँग कुराकानी गर्दै उनले नयाँ खेलाडीको प्रदर्शनले आगामी सिरिजको लागि सहज हुने बताए।
‘टिममा नयाँ खेलाडीको उत्कृष्ट प्रदर्शन र अनुभवी खेलाडीको राम्रो लय देखेर खुसी लागेको छ,’ उनले भने,‘ यूएई सिरिजका लागि पनि खेलाडी छनोटमा सहज हुनेछ।’
उनले दीपेन्द्रसिंह ऐरी, रोहितकुमार पौडेल र करण केसीको प्रदर्शनले थप उर्जा मिलेको पनि बताए। ‘विषेश गरि दीपेन्द्र, रोहित र करणको प्रदर्शनले थप उर्जा मिल्यो। उनीहरुले दुबै सिरिजमा राम्रो प्रदर्शन गरेका छन्। नयाँ खेलाडी देव खनाल र आदिल अन्सारीले पनि टिममा राम्रो योगदान दिए,’ पुबुदुले भने।
नेपाललाई त्रिकोणात्मक टी२० आई सिरिजको उपाधि दिलाउन उत्कृष्ट प्रदर्शन गरेका अलराउन्डर दीपेन्द्र ‘प्लेयर अफ द सिरिज’ घोषित भए।
सिरिजमा दीपेन्द्रले ५ खेल खेल्दै एक शतकसहित कूल २ सय ५५ रन बनाएका थिए। यस्तै, पपुवा न्यू गिनीविरुद्धको फाइनल खेलमा ४ विकेटसहित समग्रमा ७ विकेट लिएका थिए।
फाइनल खेलमा उनले अविजित ५४ रनको अर्धशतकीय इनिङ्स खेलेका थिए। दीपेन्द्र फाइनलको ‘प्लेयर अफ द म्याच’ समेत घोषित भए।
दीपेन्द्रले सोमबार यसै खेलबाट टी२० आईमा १ हजार रनसमेत पूरा गरे। टी२० आईमा १ हजार रन पूरा गर्ने दीपेन्द्र पहिलो नेपाली खेलाडी हुन्। दीपेन्द्रले ३८ खेल खेल्दा ३४ इनिङ्समा ब्याटिङ गर्दै १ हजार रन पूरा गरेका हुन्। यसक्रममा उनले १ शतक र ५ अर्धशतक बनाएका छन्।
हालसम्म नेपालका तर्फबाट टी२० आईमा सर्वाधिक रन बनाउने सूचीको दोस्रो नम्बरमा पूर्वकप्तान पारस खड्का छन्। उनले ७९९ रन बनाएका छन्। खड्काले अन्तर्राष्ट्रिय क्रिकेटबाट सन्यास लिइसकेका छन्।
यस्तै, पूर्व कप्तान ज्ञानेन्द्र मल्लले ७४८ रन बनाएका छन्। चौथो नम्बरमा रहेका कुशल भुर्तेलले हालसम्म १५ खेलबाट ५४८ रन जोडेका छन्।
दीपेन्द्र टी२० आईमा एकै इनिङ्समा सर्वाधिक रन बनाउने नेपाली खेलाडी समेत हुन्। उनले मलेसियाविरुद्ध १ सय २६ रनको अविजित शतकीय इनिङ्स खेल्दै उच्च स्कोर बनाएका थिए।
यता, करण प्रतियोगिता उत्कृष्ट बलर घोषित भए। करणले ५ खेलमा १६.४ ओभर बलिङ गर्दै १३ रन लिएका थिए। करणले पपुवा न्यू गिनीसँगको पहिलो खेलमा १४ रन बनाउनुको साथै ३ विकेट लिएका थिए। मलेसियासँग पहिलो खेलमा २ विकेट लिएका थिए।
पपुवा न्यू गिनीसँग करणले ह्याट्रिकसहित पाँच विकेट लिएका थिए। करण टी२० आईमा ह्याट्रिक र ५ विकेट लिने पहिलो नेपाली खेलाडी हुन्। फाइनलमा करणले ३ विकेट लिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
