काठमाडौं– नेपाली क्रिकेटका कप्तान सन्दीप लामिछानेले ठूलो उपलब्धिका लागि सुरुआत भइसकेको बताएका छन्।
नेपालले सोमबार त्रिकोणात्मक टी२० आई सिरिजअन्तर्गत फाइनलमा पपुवा न्यू गिनीलाई ५० रनले हराउँदै घरेलु मैदानमा दोस्रोपटक उपाधि जितेको छ।
उपाधि जितेपछि सञ्चारकर्मीहरुसँग कुराकानी गर्दै कप्तान सन्दीपले ठूलो उपलब्धिका लागि सुरुआत भइसकेको बताएका हुन्। ‘हामी सबै सिक्दै छौं। सबै जनासँग अलिअलि अनुभव छ। ठूलो नतिजा आउन समय लाग्नसक्छ। हामी आत्तिनु हुँदैन। त्यो ठूलो उपलब्धिका लागि सुरुआत भइसकेको छ,’ उनले भने।
कप्तान सन्दीपले त्रिकोणात्मक टी२० आई सिरिज समर्थकको साथले नै जित्न सम्भव भएको पनि बताए। ‘समर्थकहरूले फाइनल खेलसम्म नै हामीलाई साथ दिनुभयो। उहाँहरुको साथ र हौसलाले नै उपाधि जित्नमा हामीलाई धेरै सहयोग गर्यो,’ उनले भने।
आफ्नो कप्तानीमा पहिलो उपाधि जित्दा धेरै खुसी भएको पनि उनले बताए। उनले टिमका साथीहरूबाट सहयोग पाएको हुनाले नै यो उपाधि सम्भव भएको दोहोर्याए।
‘जिम्मेवारी सबै महत्वपूर्ण नै हुन्छ। टिमको लागि खेल्दा कप्तानसँगै धेरै जिम्मेवार खेलाडीको भूमिका पनि उत्तिकै हुन्छ। सबै टिमका साथीहरूबाट सहयोग भएको हुनाले नै यो उपाधि सम्भव भएको हो,’ उनले भने।
नेपाल क्रिकेट संघ (क्यान) र खेलाडीबीच लामो समय विवादपछि सन्दीपले कप्तानको जिम्मेवारी पाएका थिए। उनको कप्तानीमा नेपाललाई यो पहिलो उपाधि हो।
उनकै कप्तानीमा नेपालले ओमानमा आईसीसी टी२० विश्वकपको ग्लोबल छनोट पनि खेलेको थियो। ग्लोबल छनोटको समूह चरणमा नेपालले राम्रो नतिजा निकाले पनि सेमिफाइनलमा यूएईसँग पराजित भएको थियो। उक्त पराजयसँगै नेपालको विश्वकप यात्रामा बाहिरिएको थियो।
त्यसलगत्तै नेपालले यूएईमा आईसीसी क्रिकेट विश्वकप लिग–२ को एकदिवसीय सिरिज खेलेको थियो। उक्त सिरिजमा नेपालले दुई खेल जिते पनि दुई खेलमा पराजय भोग्यो।
यूएईबाट फर्किएपछि नेपालले काठमाडौंमै पपुवा न्यू गिनीविरुद्ध दुई खेलको एकदिवसीय अन्तर्राष्ट्रिय सिरिज खेलेको थियो। पपुवा न्यू गिनीले उक्त सिरिज २–० ले ‘क्लिन स्विप’ गर्यो।
सन्दीपले टिममा सबै खेलाडीले आफूलाई राम्रो सहयोग गरेको पनि बताए। उनले टिममा कुनै समस्य परेपनि आफूसँग खेलाडीले सल्लाह माग्ने गरेको बताए।
‘टिमका साथीहरूबाट पनि पूर्ण सहयोग पाएको छु। सबैले सहयोग गर्नुभएको छ। टिममा केही समस्य पर्दा पनि हामी मिलेर समाधान गर्छौं,’ सन्दीपले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
