काठमाडौं– घरेलु टोली नेपाल अपराजित रहँदै त्रिकोणात्मक टी२० आई सिरिजको फाइनमा पुगेको छ।
सिरिजको अन्तिम खेलमा शनिबार मलेसियालाई ८५ रनले पराजित गर्दै नेपाल फाइनल पुगेको हो। अब नेपालले उपाधिका लागि पपुवा न्यू गिनीसँग खेल्ने छ।
शनिबार २ सय २४ रनको विशाल लक्ष्य पछ्याएको मलेसिया १९ ओभर ५ बलमा १ सय ३८ रनमा अलआउट भयो।
मलेसियाका भिरनदीप सिंहले सर्वाधिक ४७ रन बनाए । उनले २६ बलमा ९ चौका प्रहार गरे।
कमलसिंह ऐरीको बलमा भिरनदिपले फ्लिक गरेको बल डिपमिड विकेटमा आसिफ शेखले क्याच गर्दा भिरनदीप अर्धशतक बनाउन ३ रनले चुके।
यता, ओपनर जुबाईदी जुल्कफ्ले कमलको बलमा डक भए । कप्तान आहमद फैजले ३१ बलमा ३ चौका प्रहार गर्दै ३३ रन बनाए।
सेइद अजिजले १७ रन बनाए भने शर्भिन मुनियडी १ रनमा रन आउट भए।
मुहमद अमिरद १ रन बनाएर स्टम्पिङ भए। मुहमद सेहदतले ८ र ऐनोल हफिजले १८ रन बनाए।
नेपालका सन्दीप लामिछानेले सर्वाधिक ३ विकेट हात पारे। कमलसिंह ऐरी र दीपेन्द्र सिंह ऐरीले समान २/२ विकेट लिए।
कुशल भुर्तेलले टी२० करिअरमा पहिलो बलमा पहिलो विकेट लिए।
त्यसअघि कीर्तिपुरस्थित टियु क्रिकेट मैदानमा टस हारेर ब्याटिङमा उत्रिएको नेपालले निर्धारित २० ओभरमा ५ विकेट गुमाएर २२३ रन बनायो।
नेपालका लागि दीपेन्द्रले सर्वाधिक ११० रनसहित अविजित रहे। उनले ५७ बलमा १० चौका र ६ छक्का प्रहार गरे। दीपेन्द्रले ५५ बलमा शतक पूरा गरेका थिए। दीपेन्द्रले सैद अजिजलाई अन्तिम ओभरको चौथो बलमा स्टेटमा सानदार छक्का प्रहार गर्दै शतक पूरा गरे।
उनी नेपालबाट टी२० आईमा शतक प्रहार गर्ने चौथो खेलाडी हुन्। यसअघि पारस खड्का, ज्ञानेन्द्र मल्ल र कुशल भुर्तेलले टि२० आईमा शतक प्रहार गरेका थिए।
यसअघि दीपेन्द्रको टी२० आईमा उत्कृष्ट प्रदर्शन फिलिपिन्सविरुद्ध ८३ रन थियो।
यस्तै, रोहितकुमार पौडेलले ५१ रन बनाए। उनले ३४ बलमा ५१ रन बनाए। रोहितको टी२० आईमा यो पहिलो अर्धशतक हो।
तेस्रो विकेटका लागि दीपेन्द्रले रोहित पौडेलसँग ९६ रनको साझेदारी गरेका थिए। रोहित मोहम्मद आमिरको बलमा डिपमिड विकेटमा क्याच भएका थिए।
त्यसअघि आसिफ सेख १८ र कुशल भुर्तेल १२ रनमा आउट भए। यता, युवा ब्याटर आदिल आलमले १४ रन बटुले।
मलेसियाका मोहम्मद वाफिक, पवनदीप सिंह, स्याजरुल इद्रस र मोहम्मद आमिरले १–१ विकेट लिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
