काठमाडौं– पपुवा न्यू गिनीविरुद्धको अन्तर्राष्ट्रिय टी२० क्रिकेट सिरिजमा ह्याट्रिकसहित ५ विकेट लिएका करण केसीले यो कीर्तिमान आफ्नो लागि विशेष रहेको बताएका छन्।
बिहीबार प्रतियोगिताकै कमजोर मानिएको पपुवा न्यू गिनीलाई ३७ रनले पराजित गर्दै नेपाल एक खेल अगावै फाइनलमा पुगेको छ।
खेलपछि त्रिवि क्रिकेट मैदान कीर्तिपुरमा सञ्चारकर्मीहरुसँग कुरा गर्दै करणले भने, ‘स्पेशल नै हो, ह्याट्रिक पनि, ५ विकेट पनि। टी२० आईमा यो मेरो वेष्ट फिगर नै हो।’
करणले २०औं ओभरको दोस्रो बलमा चाद सोपारलाई २ रनमा रोहित पौडेलबाट थर्डमा क्याच गराए। तेस्रो बलमा शिमोन आतीलाई बोल्ड गरे।
चौंथो बलमा नैसान पोकनालाई मिडअफमा दीपेन्द्रसिंहबाट क्याच गराए।
त्यसअघि करणले पहिलो ओभरको चौंथो बलमा लेगा सियाकालाई १ रनमा आसिफ शेखबाट क्याच गराउँदै आफ्नो ५०औं टी२० आई विकेट पूरा गरेका थिए। करणले नै असाद भालालाई सोमपाल कामीबाट १ रनमा क्याच गराएका थिए।
करणले ५ विकेट लिन ३.४ ओभरमा २१ रन खर्चे। योसँगै करणको टी२० आईमा विकेट संख्या ५४ पुगेको छ। उनले ३६ खेलमा ५४ विकेट लिएका हुन्। उनी टी२० आईमा ५० विकेट लिने दोस्रो खेलाडी हुन्। यसअघि सन्दीप लामिछानेले ५० विकेट पार गरेका थिए।
सन्दीपले ३७ खेलमा ६८ विकेट लिएका छन्। यसअघि नेपालबाट कुनैपनि खेलाडीले टी२० आईमा ह्याट्रिक गरेका थिएनन्। टी२० आईमा उत्कृष्ट प्रदर्शन ४ विकेट रहँदै आएको थियो।
ओडिआईमा भने तीव्र गतिका बलर सोमपाल कामी र लेग स्पिनर सन्दीप लामिछानेले ५ विकेट लिइसकेका छन्।
यो सफलताबाट खुसी भएका करणले आगामी खेलमा पनि यस्तै प्रदर्शनको अपेक्षा राखेका छन्। ‘आउँदा दिनमा पनि चार/पाँच पटक यस्तो गर्न सकूँ,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781621001.png)
-1781591850-1781592603.jpg)
-1764146706.png)
