काठमाडौं– करण केसीको घातक बलिङसँगै नेपाल अन्तर्राष्ट्रिय त्रिकोणात्मक टी-२० सिरिजको फाइनलमा प्रवेश गरेको छ। बिहीबार प्रतियोगिताकै कमजोर मानिएको पपुवा न्यू गिनीलाई ३७ रनले पराजित गर्दै नेपाल एक खेल अगावै फाइनलमा पुगेको हो।
नेपालले दिएको २ सय ४ रनको लक्ष्य पछ्याएको पपुवा न्यू गिनी निर्धारित २० ओभरमा ८ विकेट गुमाउँदै १६६ रनमा समेटियो।
नेपालका मध्यक्रमका युवा ब्याटर दीपेन्द्रसिंह ऐरी र आदिल अन्सारीले पपुवा न्यू गिनीविरुद्ध नयाँ कीर्तिमान बनाएका छन्।
उनीहरुले एकै ओभरमा सर्वाधिक रन बनाउने कीर्तिमान कायम गरेका हुन्। तीव्र गतिका बलर नोसैना पोकनालाई १९औं ओभरमा दीपेन्द्र र आदिलले ३२ रन जोडेको थिए। जुन नेपालले टी२० आईमा एकै ओभरमा बनाएको सर्वाधिक रन हो।
टी२० आई मात्र नभएर सम्भवत: अन्तर्राष्ट्रिय क्रिकेटमा नेपालले बनाएको यो एकै ओभरमा सर्वाधिक रन हो। विश्वको टी२० आईमा एकै ओभरमा बनाएको चौंथो धेरै रन हो ।
एकै ओभरमा सर्वाधिक रन भने इंग्ल्यान्डका स्टुअर्ट ब्रोड र श्रीलंकाका अकिला धनन्जय खर्चिएका छन्। सन् २००७ को टी२० विश्वकपमा इंग्ल्यान्डका तीव्र गतिका बलर ब्रोडलाई भारतीय ब्याटर युवराज सिंहले एकै ओभरमा ६ छक्का प्रहार गरेका थिए।
यता, वेस्टइन्डिजका कप्तान काइरन पोलार्डले २०२१ मा स्पिनर अकिला धनन्जयलाई ६ बलमा ६ छक्का प्रहार गरेका थिए।
आदिलले पहिलो बलमा चौका प्रहार गरेका थिए। दोस्रो र तेस्रो बलमा आदिलले दुई छक्का प्रहार गरे। तेस्रो नो बलमा पुन: छक्का प्रहार गर्दा चौंथो बलमा तीन रन बटुलेका थिए। पाँचौं बलमा दीपेन्द्रसिंह ऐरीले सानदार छक्का प्रहार गरेपछि नेपाललाई दुर्लभ विश्व कीर्तिमान बनाउने अवसर बनेको थियो।
अन्तिम बलमा छक्का प्रहार गरेको भए टी२० आई एकैओभरमा सर्वाधिक रन बनाउने जोडी बन्न पुग्थे। तर, दीपेन्द्र लङअफमा टोनी उराबाट क्याच भएपछि दुर्लभ कीर्तिमानबाट चुकेका थिए। त्यसअघिको १७औं ओभरमा नेपालले नोर्मन भानुआलाई ३ छक्का र १ चौकासहित कुल २४ रन जोडेका थिए।
२०२० मा भारतीय शिवम दुबेले न्यू जिल्यान्डविरुद्ध एकै ओभरमा ३४ रन खर्चेका थिए। दक्षिण अफ्रिका वेन पार्नेल, अफगानिस्तानका इजातुल्लाह दलतजजाई, भारतीय स्टुर्ट बिन्नी र नेदरल्यान्ड्सका म्याक्स ओडआउडले एकै ओभरमा ३२–३२ रन खर्चेका थिए।
नेपालका दीपेन्द्रले ३३ बलमा ३ चौका र ४ छक्कासहित सर्वाधिक ६६ रनको योगदान दिए। यता, डेब्यू खेल खेलेका आदिल अन्सारीले ११ बलमा १ चौका र ३ छक्कासहित ३३ रनको इनिङ्स खेले।
करणको ५ विकेट
आजकै खेलमा तीव्र गतिका बलर करण केसीले सर्वाधिक ५ विकेट लिए। करणले २०औं ओभरको दोस्रो बलमा चाद सोपारलाई २ रनमा रोहित पौडेलबाट थर्डमा क्याच गराए। तेस्रो बलमा शिमोन आतीलाई बोल्ड गरे।
चौंथो बलमा नैसान पोकनालाई मिडअफमा दीपेन्द्रबाट क्याच गराउँदै नेपालबाट पाँच विकेट लिने र ह्याट्रिक गर्ने दुवै पहिलो खेलाडी बने।
त्यसअघि करणले पहिलो ओभरको चौंथो बलमा लेगा सियाकालाई १ रनमा आसिफ शेखबाट क्याच गराउँदै आफ्नो ५० औं टी२० आई विकेट पूरा गरेका थिए। करणले नै असाद भालालाई सोमपाल कामीबाट १ रनमा क्याच गराएका थिए।
करणले ५ विकेट लिन ३.४ ओभरमा २१ रन खर्चे। योसँगै करणको टी२० आईमा विकेट संख्या ५४ पुगेको छ। उनले ३६ खेलमा ५४ विकेट लिएका हुन्। उनी टी२० आईमा ५० विकेट लिने दोस्रो खेलाडी हुन्। यसअघि सन्दीप लामिछानेले ५० विकेट पार गरेका थिए।
सन्दीपले ३७ खेलमा ६८ विकेटल लिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786875773.jpg)
-1786602170.png)
-1786513116.png)
