काठमाडौं– रोहित पौडेलले पपुवा न्यू गिनी (पीएनजी) विरुद्धको एकदिवसीय अन्तर्राष्ट्रिय (पीएनजी) मा कीर्तिमानी ब्याटिङ गरे पनि नेपालले जित निकाल्न सकेन। पीएनजीविरुद्ध शतक बनाएका रोहितलाई अर्को ‘एन्ड’बाट गतिलो साथ नमिल्दा नेपाल ६ रनले पराजित भयो।
नेपाललाई अन्तिम ओभरमा जितका लागि १० रन आवश्यक थियो। तर, क्रिजमा रहेका कमलसिंह ऐरी र सोमपाल कामीले तीन रन मात्र जोड्दा नेपाल पीएनजीसँग पहिलो पटक पराजित भयो। यसअघि भएका चार ओडीआई सबै नेपालले जितेको थियो।
आज कीर्तिपुरमा पीएनजीले दिएको २९३ रनको विशाल लक्ष्य पछ्याएको नेपालको सुरुवात गतिलो भएन। ३६ रन हुँदा नेपालले अनिल साहलाई गुमाएको थियो। उनले २१ बलमा ६ रन बनाए। त्यसपछि क्रिजमा आएका देव खनाल आफ्नो डेब्यु खेलमा शून्यमा नै बाहिरिए। दीपेन्द्रसिंह ऐरी (१५) र कुशल भुर्तेल (३२) ले पनि ठूलो साझेदारी गर्न नसक्दा नेपाल दबाबमा परेको थियो।
पाँचौँ नम्बरमा आएका रोहित पौडेलले भने एउटा एन्ड सम्हालेर ब्याटिङ गरे। उनले आरिफ सेखसँग पाँचौँ विकेटका लागि १०४ रनको साझेदारी गरेका थिए। ओडीआईमा कुनै पनि विकेटका लागि नेपाली खेलाडीले गरेको यो सर्वाधिक ठूलो साझेदारी हो। यसअघि रोहित र आरिफले नै पपुवा न्यू गिनीसँग दुबईमा भएको पहिलो ओडीआई खेलमा पाँचौं विकेटका लागि नै १०० रनको शतकीय साझेदारी गरेका थिए। जुन नेपाली खेलाडीले ओडीआईमा गरेको पहिलो शतकीय साझेदारी थियो।
आजको खेलमा आरिफ ६४ बलमा ३४ रन बनाएर बाहिरिए। आक्रामक ब्याटिङ गरेका रोहितले सर्वाधिक १२६ रन बनाए। १०७ बल खेलेका उनले सात चौका र चार छक्का प्रहार गरे। उनले ९१ बलमा नै शतक पूरा गरेका थिए।
नेपालका लागि भीम सार्कीले १७ र पवन सर्राफले ७ रन बनाए। अन्तिम ओभरसम्म ब्याटिङ गरेका सोमपाल र कमल दुवैले १८–१८ रन बनाए।
यसअघि टस हारेर ब्याटिङ गरेको पीएनजीले नेपालविरुद्ध अहिलेसम्मकै ठूलो योगफल तयार पारेको थियो। उसले ८ विकेट क्षतिमा २९२ रन बनायो। पीएनजीका लागि कप्तान असद भाला र चाल्र्स अमिनीले अर्धशतक बनाएका थिए। भालाले ६० र अमिनीले ७७ रन बनाए। नर्मन भानुआले २८ बलमा नै ४७ रन बनाएका थिए।
नेपालका लागि कमलसिंह ऐरी, सोमपाल कामी र दीपेन्द्रसिंह ऐरीले २–२ विकेट लिए। कप्तान सन्दीप लामिछाने र पवन सर्राफले पनि १–१ विकेट लिए।
रोहितको कीर्तिमान नै कीर्तिमान
रोहित पौडेल आफ्नो पहिलो शतकसँगै एकै ओडीआईमा सर्वाधिक रन बनाउने नेपाली खेलाडी भएका छन्। यसअघि पारस खड्काको नाममा यो कीर्तिमान थियो। उनले सन् २०१९ मा युएईविरुद्ध ११५ रन बनाएका थिए। रोहितले ओडीआईमा नेपालबाट दोस्रो शतक बनाएका हुन्।
रोहित घरेलु मैदान कीर्तिपुरमा शतक प्रहार गर्ने पहिलो नेपाली ब्याटर भएका छन्। यसअघि घरेलु मैदानमा ज्ञानेन्द्र मल्ल, शरद भेषवाकर, विनोद भण्डारी र कुशल मल्लले एक–एक अर्धशतक बनाएका थिए। ओडीआईमा विनोद भण्डारीले बनाएको ५९ रन नै कीर्तिपुरमा नेपाली खेलाडीले बनाएको सर्वाधिक रन थियो। त्यसलाई पनि रोहितले तोडेका छन्।
रोहित ओडीआईमा ज्ञानेन्द्र मल्लसँगै सर्वाधिक अर्धशतक बनाउने खेलाडी पनि हुन्। दुवैले चार चार अर्धशतक बनाएका छन्।
यसअघि रोहितले आजकै खेलबाट ओडीआईमा ५०० रन पनि पूरा गरे। उनी ५०० रनको कोशेढुंगा भेटाउने उनी पहिलो क्रिकेटर बनेका छन्। पीएनजीविरुद्ध ३८ रन बनाउँदा उनले ५०० रन पूरा गरेका हुन्। असद भालाको स्पिनमा चौका प्रहार गर्दै उनले ५०० रन पूरा गरेका थिए। उनले १६औँ ओडीआईमा यो उपलब्धि हासिल गरे।
ओडीआईमा उनले ७०.९६ को स्ट्राइक रेटमा रन बनाएका छन्। उनको औषत ३५.५३ छ। उनी १६ वटा ओडीआई खेल्दा एक पटक मात्र डकआउट भएका छन्। त्यसैगरी ६ पटक १० भन्दा कम रनमा आउट भएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
