फाइल तस्बिर
काठमाडौं– कप्तान असाद भाला र चार्ल्स अमिनीको अर्धशतकमा पपुवा न्यू गिनी (पीएनजी)ले नेपालविरुद्ध पहिलो ओडिआई खेलमा २९३ रनको विशाल लक्ष्य प्रस्तुत गरेको छ।
टियु क्रिकेट मैदानमा टस हारेर पहिला ब्याटिङ थालेको पपुवा न्यू गिनीले निर्धारित ५० ओभरमा ८ विकेट गुमाउँदै २९२ रन बनाएको हो। याे ओडीआईमा नेपालविरुद्ध कुनै पनि देशले बनाएको कीर्तिमानी रन हो।
यसअघि नेपालविरुद्ध पहिलो इनिङ्समा युएईले सबैभन्दा बढी २५४/६ बनाएको थियो। २०१९ जनवरी १९ मा भएको उक्त खेल नेपालले जितेको थियो। त्यही खेलमा पारस खड्काले ११३ रनको शतकीय पाली खेलेका थिए। ओडीआईमा शतक बनाउने उनी अहिलेसम्मका एक मात्र नेपाली क्रिकेटर हुन्।
शुक्रबारको खेलमा पपुवा न्यू गिनीका लागि अमिनीले सर्वाधिक ७७ रन बनाए। उनले १०३ बलमा ६ चौका र १ छक्का प्रहार गरे। यस्तै, भालाले ५५ बलमा ११ छक्कासहित ६० रन बनाए।
पपुवा न्यू गिनीका अन्य ब्याटरले भने मध्यम प्रदर्शन गरे। त्यसअघि तीव्र गतिका बलर सोमपाल कामीले चौथो ओभरको अन्तिम बलमा ओपनर हिरी हिरीलाई विकेटकिपर अनिल शाहबाट ४ रनमा क्याच गराएका थिए। लामो समयदेखि लयमा नरहेका लेगा सियाकालाई बेन्चमा राख्दै पपुवा न्यू गिनीले हिरीलाई ओपनिङ गराएको थियो।
यता, मिडियम फास्ट बलर दीपेन्द्रसिंह ऐरीले १२औं ओभरको अन्तिम बलमा सेट भइसकेका ओपनर टोनी उरा ठूलो सट खेल्ने क्रममा लङअनमा भीम सार्कीबाट क्याच गराए।
उनले ४७ बलमा ६ चौकासहित ३८ रन बनाए। दोस्रो विकेटका लागि कप्तान आसाद भाला र टोनी उराले ४९ रनको साझेदारी गर्दै इनिङ्स उकासेका थिए। २-७० को स्थितिमा रहेको पपुवा न्यू गिनीको इनिङ्स कप्तान आसाद भालाले र चार्ल्स अमिनीले ७३ रनको साझेदारी गर्दै उकास्ने प्रयास गरेका थिए।
तर, २५औं ओभरको पहिलो बलमा भालालाई दीपेन्द्रले बोल्ड गरे। उनले ५५ बलमा ११ चौकासहित ६० रन जोडे। उनको यो ओडिआईमा छैटौं अर्धशतक हो। उनले यसअघि हङकङ, वेस्टइन्डिज, ओमानसँग १/१ पटक युएईसँगको खेलमा दुईपटक अर्धशतक बनाएका थिए।
लगत्तै ठूलो सट खेल्ने क्रममा सेसे बाउ पनि कुशल भुर्तेलबाट क्याच आउट भए। उनलाई २६ औं ओभरको पाँचौ बलमा सन्दीप लामिछानेले भुर्तेलबाट शून्य रनमा क्याच गराए।
४-१४५ को अवस्थामा रहेको पपुवा न्यू गिनीलाई छैटौं नम्बरका ब्याटर राइली हेकुरे पुन: जीवनदान दिएका थिए। ४१औं ओभरको पहिलो बलमा पवन सराफबाट बोल्ड हुनुअघि उनले अमिनीसँग ६१ रनको साझेदारी गरे। उनले ४० बलमा ५ चौकासहित ३१ रन प्रहार गरे।
त्यसपछि आएका ४५औं ओभरको पहिलो बलमा सोमपालले सेट ब्याटर अमिनी ७७ रनमा लाई बोल्ड गर्दै खेलमा फर्काउने कोसिस गरेका थिए। सन् २०१४ मा हङकङविरूद्वको ओडिआई खेलमा डेब्यू गरेका अमिनीको यो नै उत्कृष्ट प्रदर्शन हो। उनले उक्त खेलमा नटआउट ६१ रन बनाएका थिए।
अमिनीले तल्लोक्रमका नर्मन भानुवासँग मिलेर ४८ रनको साझेदारी गरेका थिए। भानुवा ४९औं ओभरको पाँचौं बलमा कमलसिंह ऐरीको बलमा दीपेन्द्रसिंह ऐरीबाट ४७ रनमा आउट भए। उनले २८ बलमा ४ चौका र ३ छक्का प्रहार गरे। यता, सिमोन अति २ रनमा आउट भए।
नेपालका लागि दीपेन्द्रसिंह ऐरीले १० ओभरमा १ मेडनसहित ३० रन खर्चिएर २ विकेट लिए। कमलसिंहले ९ ओभरमा ५६ रन खर्चिएर २ विकेट लिए भने समान २ विकेट नै लिएका सोमपाल कामी महंगो सावित भए। उनले ९ ओभरमा ८१ रन खर्चिए।
यता, सन्दीप लामिछानेले १० ओभरमा ६२ रन खर्चिएर १ विकेट लिए। ओडिआईमा उनको यो ४९औं विकेट हो। यस्तै, पवन सराफले ५ ओभरमा २५ रन खर्चिएर १ विकेट लिए। पहिलोपटक राष्ट्रिय टोलीमा डेब्यू गरेका देव खनाल र आरिफ शेख विकेटबिहीन रहे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773643707.png)
