काठमाडौं- खराब ब्याटिङको कारण नेपालले आईसीसी विश्वकप लिग–२ मा घरेलु टोली युएईसँग ४८ रनको लज्जास्पद हार बेहोरेको छ। १ सय ६९ रनको मध्यम विजयी लक्ष्य पछ्याएको नेपाल ३५.१ ओभरमा १ सय २० रनमा अलआउट भएको हो।
नेपालका लागि रोहितकुमार पौडेलले सर्वाधिक ४६ रन बनाए। उनले ६० बलमा ४ चौका प्रहार गरे। रोहित लगातार दोस्रो अर्धशतक प्रहार गर्न चार रनले चुकेका थिए। अन्य कुनैपनि ब्याटरले राम्रो प्रदर्शन गर्न सकेनन्।
पाँचौं ओभरको पहिलो बलमा कुशल भुर्तेल ११ रनमा बोल्ड आउट भएका थिए। कुशललाई तीव्र गतिका बलर जुनैद सिद्दिकले आउट गराएका हुन्। उनले आउट हुनुअघि १५ बलमा १ चौका प्रहार गरे।
चौथो बलमा फ्रन्ट फुटबाट खेलेका आसिफ एज लागेर मिड अनमा ७ रनमा चिराग सुरीबाट क्याच आउट भएका थिए। आसिफले १२ बलमा १ चौका प्रहार गरे।
उता, दीपेन्द्रसिंह ऐरी ४ रनमा रन आउट भए। उनीलाई ८औं ओभरको अन्तिम बलमा चिराग सुरी र वृत्य अरविन्दले रन आउट गरे।
चौथो विकेटका लागि ज्ञानेन्द्र र रोहितले ५८ रनको साझेदारी गर्दै नेपाललाई खेलमा फर्काएका थिए। तर त्यसपछि ब्याटर चल्न नसक्दा पराजित भएको हो।
ज्ञानेन्द्र मल्ल २२औं ओभरको अन्तिम बलमा रोहन मुस्तफाले एलबीडब्लू आउट गराए। उनले ६२ बलमा १ चौकासहित २८ रन बनाए।
यता, बासिल हामिदले २४औं ओभरको अन्तिम बलमा आरिफ शेखलाई कट एण्ड बोल्ड गर्दै शून्यमा पेभिलिएन फर्काए। सोमपाल कामी ६ रनमा आउट हुँदा कमलसिंह ऐरी शून्यमा आउट भए।
युएईका पार्टटाइम स्पिनर बासिल हामिदले ५ ओभरमा १ मेडनसहित १५ रन खर्चेर ४ विकेट लिए। यता, जुनैद सिद्दिकले ७.१ ओभरमा १ मेडनसहित १८ रन खर्चेर ३ विकेट लिए। जहुर खान र रोहन मुस्तफाले १-१ विकेट लिए।
त्यसअघि दुबई इन्टरनेशल क्रिकेट स्टेडियममा टस जितेर पहिला ब्याटिङ थालेको युएई ४६.३ ओभरमा १ सय ६८ रनमा अलआउट भयो।
युएईका अनुभवी बायाँ हाते ब्याटर रोहन मुस्तफाले ८१ बलमा २ चौका र १ छक्कासहित ४० बनाए। यस्तै, सिपी रिजवान ८५ बलमा ४० रनको महत्वपूर्ण इनिङ्स खेले। अन्य ब्याटरले भने राम्रो प्रदर्शन गर्न सकेनन्।
एक समय ३५–४ को खराब सुरुआत गरेको युएईलाई पाँचौं विकेटका लागि मुस्तफा र रिजवानले ७७ रनको महत्वपूर्ण साझेदारी गरेका थिए।
चौथो ओभरको पाँचौं बलमा ओपनर चिराग सुरीई ६ रनमा आउट भएका थिए। सुरी सोमपाल कामीको बलमा आउट साइड एज लागेर विकेटकिपर आसिफ शेखबाट क्याच भए।
यता, विकेटकिपर वृत्य अरविन्द ३ रनमा आउट भए।उनलाई सोमपालले आसिफबाट क्याच आउट गराएका थिए। सोमपालले १० औं ओभरको पहिलो बलमा ओपनर मोहम्मद वासिमलाई २१ रनमा कुशल भुर्तेलबाट क्याच गराउँदै युएईलाई धरासायी बनाए।
वासिमले आएट हुनुपूर्व २८ बलमा ३ चौका प्रहार गरे। करण केसीले आसिफ खानलाई २ रनमा आसिफबाट क्याच गराएपछि युएई १०.३ ओभरमा ३५–४ को अवस्थामा पुगेको थियो।
रिजवानलाई ३३औं ओभरको तेस्रो बलमा सन्दीपले स्टम्पिङ आउट गर्दै साझेदारी तोडे। मुस्तफालाई ३९औं ओभरको पहिलो बलमा दीपेन्द्रले बोल्ड गरेका थिए।
सागरको ४१औं ओभरको तेस्रो बलमा ठूलो सट खेलेका बासिल हामिद लङअनमा ज्ञानेन्द्र मल्लबाट १४ रनमा क्याच आउट भए। सागरको ओडिआईमा यो पहिलो विकेट हो।
नेपालका लागि सोमपाल कामीले ४ विकेट लिए। करण केसीले ७.३ ओभरमा १ मेडनसहित १६ रन खर्चेर ३ विकेट लिए।
यता, सन्दीप, दीपेन्द्र र सागरले १/१ विकेट लिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768395492.png)
-1768391713.png)
-1764146706.png)
