काठमाडौं– आईसीसी क्रिकेट वर्ल्ड कप लिग २ खेलिरहेका सात देशमध्ये पपुवा न्यू गिनी (पीएनजी) सबैभन्दा कमजोर देश हो। उसले १४ वटा खेल खेल्दा कुनैमा पनि जित निकाल्न सकेको छैन। नेपाल भने शीर्ष तीनमा पर्ने लक्ष्यका साथ प्रतिस्पर्धा गरिरहेको छ।
यस अर्थमा पीएनजीविरुद्ध बुधबार भएको खेल नेपालले सहजै जित्नुपर्ने थियो। नेपालको बलिङ र ब्याटिङ दुवै मध्यम हुँदा तथा फिल्डिङमा पनि चुक्दा संघर्षपूर्ण जित हात पारेको छ। नेपालका मध्यम तीव्र गतिका मुख्य बलर सोमपाल कामी र करण केसीले सुररुवाती दबाब कायम गर्नै सकेनन्। भलै, पहिलो स्पेलमा विकेटविहीन भएका सोमपालले मध्यक्रम र पछिल्ला तीन विकेट भने लिए।
तर, करणले बलिङमा कुनै लय पकड्न नसक्दा विकेटविहीन भए। उनी नेपालका बलरमध्ये एक दिवसीय अन्तर्राष्ट्रियमा सबैभन्दा बढी विकेटविहीन हुने खेलाडी हुन्। यद्यपि, उनी सन्दीप लामिछानेपछि ओडीआईमा सबैभन्दा धेरै विकेट लिने खेलाडी पनि हुन्। उनले १५ खेल खेल्दा ६ पटक विकेटविहीन भएका छन् र कुल २१ विकेट लिएका छन्।
सन्दीप लामिछाने नेपालका तर्फबाट सफल बलर हुन्। उनले १७ खेलमा ४२ विकेट लिइसकेका छन्। उनी जम्मा दुई पटक मात्र विकेटविहीन भएका छन्। तर, उनलाई साथ दिने ‘स्पिन जोडी’ नेपाली क्रिकेटले भेट्न सकेको छैन। यद्यपि, दुई वर्षअघि कीर्तिपुरमा भएको ओमान र अमेरिकासहितको लिग २ कै शृङ्खलामा सुसन भारीले संभावना देखाएका थिए। उनले नौ वटा ओडीआई खेल्दा १५ विकेट लिएका छन् र दुई पटक मात्र विकेटविहीन भएका छन्। तर, यसपटक उनले टिममा स्थान बनाउन सकेनन्।
नेपालबाट ओडीआईमा धेरै विकेट लिनेको तेस्रो स्थानमा सोमपाल कामी छन्। उनले १३ ओडीआईमा १८ विकेट लिएका छन्। टिममा रहेका कमलसिंह ऐरी लयमा भए पनि हिजो मौका पाएनन्। उनी ब्याटिङमा पनि ‘फिनिसर’को भूमिका निभाउन सक्छन्। विक्रम सोबले पनि मौका पाउन सकेनन्। सोब ओडीआईको डेब्यु बलमा नै विकेट लिने नेपालका अहिलेसम्मका एक मात्र बलर हुन्। उनी पनि लयमा छन्।
जितबाट सुरु सन्दीपको कप्तानी
बुधबार पीएनजीविरुद्ध सन्दीपले ओडीआईमा पहिलो कप्तानी गरे। पहिलो खेलमा नै जित निकालेर उनले सकारात्मक सुरुवात गरेका छन्। यसअघि नेपालबाट ओडीआईको कप्तानी गरिसकेका पारस खड्का र ज्ञानेन्द्र मल्लले हारबाट नेतृत्व सुरु गरेका थिए।
नेपालले पहिलो ओडीआई १ अगष्ट २०१८ मा नेदरल्यान्ड्सविरुद्ध खेलेको थियो। नेदरल्यान्ड्समा भएको उक्त खेलमा नेपालले जितका लागि १९० रनको सामान्य लक्ष्य पाए पनि सफल हुन सकेन। नेपाल १३४ रनमै अलआउट भएको थियो।
ज्ञानेन्द्रले भने घरेलु मैदानमा नै पहिलो कप्तानी गर्ने अवसर पाएका थिए। लिग २ अन्तर्गत नै ओमानविरुद्ध ५ फेब्रुअरी २०२० मा भएको खेलमा नेपालले १९८ रनको लक्ष्यसमेत पूरा गर्न सकेको थिएन। ओपनिङमा आएका उनी १ रनमा नै बाहिरिएका थिए।
पारस र ज्ञानेन्द्रको यो शृङ्खला सन्दीपले तोडेका छन्। उनको कप्तानीको सुरुआत जितबाट हुँदा भविष्यमा अपेक्षा गर्न सकिन्छ, तर कमजोर टिम पीएनजीविरुद्धको संघर्षपूर्ण जितले भने धेरै आशा गर्ने ठाउँ छैन। यही श्रृङ्खलामा प्रतिपर्धी रहेको युएई निकै लयमा छ। उसले पहिलो खेलमा पीएनजीविरुद्ध आरामदायी जित निकालेको थियो। त्यसैले सन्दीपका लागि युएईविरुद्धको खेल उनको कप्तानीको असली परीक्षा हुनेछ।
रोहितको ब्याटिङले जगाएको आशा
नेपालले बुधबार पीएनजीविरुद्ध ४२ रनमा नै सुरुआती चार विकेट गुमाइसकेको थियो। सुरुआती तीन विकेट गुमाउने कुशल भुर्तेल, ज्ञानेन्द्र मल्ल र दीपेन्द्रसिंह ऐरीले दोहोरो अंकमा रन बनाएनन्। मध्यक्रममा आशा गरिएका दीपेन्द्र पनि ८ रन बनाएर बाहिरिएका थिए।
त्यसपछि दबाबमा परेको नेपाललाई आसिफ सेखको विकेटले अर्को झड्का दियो। अप्ठ्यारो अवस्थाबाट टिमलाई निकाल्नु पर्ने जिम्मेवारी पाएका आसिफले क्रिज छाडेर खेल्दा स्टम्पिङ भएका थिए। त्यसपछि रोहित पौडेल र आरिफ सेखले कीर्तिमानी ब्याटिङ गर्दा जितको आधार तयार भएको थियो।
उनीहरूले पाँचौँ विकेटका लागि १०० रनको साझेदारी गरे। नेपालका लागि ओडीआईमा यो अहिलेसम्मकै ठूलो साझेदारी हो। यसअघि रोहित र विनोद भण्डारीले गरेको ८३ रनको साझेदारी पाँचौँ विकेटका लागि नेपालको तर्फको ठूलो साझेदारी थियो। उनीहरुले १३ सेप्टेम्बर २०२२ अमेरिकाविरुद्ध उक्त साझेदारी गरेका थिए।
तर, नेपालका लागि कुनै पनि विकेटमा सबैभन्दा ठूलो साझेदारी भने ज्ञानेन्द्र मल्ल र आसिफ सेखले गरेका थिए। उनीहरूले दोस्रो विकेटका लागि १९ सेप्टेम्बर २०२१ ओमानविरुद्ध उसकै घरेलु मैदानमा ९५ रनको साझेदारी गरेका थिए।
आरिफसँग मिलेर उक्त कीर्तिमान तोड्दा रोहितले नेपालबाट ओडीआईमा सबैभन्दा बढी अर्धशतक बनाउने ज्ञानेन्द्र मल्लको कीर्तिमानको बराबरी पनि गरेका छन्। उनीहरूले ओडीआईमा चार–चार अर्धशतक बनाएका छन्।
ज्ञानेन्द्र सबैभन्दा बढी रन बनाउने खेलाडी पनि हुन्। उनले १७ खेलमा ४२२ रन बनाएका छन्। १२ ओडीआई खेलेका रोहितले भने अहिलेसम्म ३६३ रन बनाइसकेका छन्।
बुधबार रोहितले चौथो अर्धशतक पूरा गर्दा आरिफ भने पहिलो अर्धशतक पूरा गर्नबाट १ रनले चुके। करण केसीले फेरि पनि उत्कष्ट ‘फिनिसर’को भूमिका निभाउँदै नेपाललाई जित दिलाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
