काठमाडौं- युवा ब्याटर रोहितकुमार पौडेल र आरिफ शेखको शतकीय साझेदारीमा नेपालले आईसीसी विश्वकप लिग–२ त्रिकोणात्मक ओडिआई सिरिजमा पपुवा न्यू गिनीलाई २ विकेटलले पराजित गरेको छ।
पपुवा न्यू गिनीले दिएको २०५ रनको मध्यम लक्ष्य पछ्याएको नेपालले ४९.२ ओभरमा ८ विकेट गुमाएर २०८ रन बनायो। नेपालका लागि रोहितकुमार पौडेलले सर्वाधिक ६० रन बनाए। उनले ८३ बलमा ४ चौका प्रहार गरे।
यता, आरिफ शेखले ४९ रन बनाए। उनले ८३ बलमा १ चौका प्रहार। यस्तै, करण केसी २९ रनमा अविजित रहे। रोहितको चौथो अर्धशतक हो। पाँचौं विकेटका लागि आरिफ र रोहितले १ सय १ रनको कीर्तिमानी साझेदारी गरेका थिए। आरिफ र रोहित ओडिआईमा शतकीय साझेदारी गर्ने पहिलो जोडी बनेका छन्।
यसअघि ओडिआईमा सर्वाधिक ठूलो साझेदारी आसिफ शेख र ज्ञानेन्द्र मल्लले गत असोजमा ओमानविरुद्ध दोस्रो विकेटका लागि ९५ रनको गरेका थिए।
नेपाललाई अन्तिम ६ बलमा जितको लागि ७ रन चाहिएको थियो। पहिलो बलमा लेग वाइको रुपमा चौका प्राप्त गर्यो। दोस्रो बलमा करण केसीले छक्का प्रहार गर्दै नेपालको जित पक्का गराए। करण २५ बलमा १ चौका र २ छक्कासहित २९ रनमा अविजित रहे।
पपुवा न्यू गिनीका नर्मन भानुवा, राइली हेकुरे र एली नाओले २–२ विकेट लिए। असाद भाला र चाद सोपरले १–१ विकेट लिए।
त्यसअघि यूएईको सारजाह क्रिकेट स्टेडियममा टस जितेर ब्याटिङ थालेको पपुवा न्यू गिनीले चार्ल्स अमिनी र चाद सोपरको अर्धशतकीय साझेदारीमा ५० ओभरमा ८ विकेट गुमाएर २ सय ४ रन बनाएको थियो।
पपुवा न्यू गिनीका लागि चार्ल्स अमिनीले सर्वाधिक ५९ रनको अर्धशतकीय इनिङ्स खेले। उनले ८२ बल खेल्दै ७ चौका प्रहार गरे।
एक समय २४.४ ओभरमा ९१-४ को कमजोर अवस्थामा पुगेको पपुवा न्यूगिनीलाई पाँचौं विकेटका लागि अमिनी र सोपरले ७५ रनको महत्त्वपूर्ण साझेदारी गरेका थिए।
यस्तै, ओपनर टोनी उराले २७ तथा लेगा सियकाले २५ रनको योगदान दिए। चाद सोपरले ३५, नोरमान भानुले २३, असद भालाले १९ रन बनाउनुबाहेक अन्य खेलाडीले दोहोरो अंकमा रन बटुल्न सकेनन्।
नेपालका सोमपाल कामीले सर्वाधिक ३ विकेट लिए। यस्तै, कप्तान सन्दीप लामिछाने, आरिफ शेख र ज्ञानेन्द्र मल्लले समान १/१ विकेट लिए।
खेल दौरान क्रिकइन्फोले दिएको स्कोरकार्डमा आरिफले ५३ रन जोडेको भनेपनि आधिकारिक स्कोरकार्डमा ४९ रन रहेको छ। यस्तै, रोहितको ५८ रन भनिएपनि ६० रन बनाएका थिए। यता, अन्तिम बलमा जितको लागि ५ रन बनिएपनि ७ रन बाँकी रहेको थियो। क्रिकइन्फोले दिएको स्कोरकार्डमा गल्ती भएको कारण यसलाई सच्याइएको छ-सम्पादक।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788257020.png)
-1786602170.png)
-1786513116.png)
