केपी ओली, फाइल तस्बिर
काठमाडौं– कम्युनिस्ट पार्टीहरुबीच एकता हुनुपर्ने आशय राखेर लेख लेखेका एमाले नेता घनश्याम भुसाललाई अध्यक्ष केपी शर्मा ओलीले जवाफ दिएका छन्। मंगलबारको कान्तिपुर दैनिकमा भूसालले 'कम्युनिस्ट पार्टीको भविष्य : एकता वा सत्यानाश' शीर्षकमा लेख लेखेका थिए।
लेखमा भूसालले लेखेका छन्- 'एकताको पहिलो पाइलामै वामपन्थीहरूको सरकार बन्न सक्छ, स्थानीय तहमा धेरै राम्रो परिणाम आउन सक्छ। अर्को संसदीय निर्वाचनको परिणामलाई पनि करिब–करिब सुनिश्चित गर्न सक्छ।'
मंगलबार अनेमसंघको तेस्रो पूर्ण बैठकमा सम्बोधन गर्दै ओलीले भूसालको नाम नलिइ उनको लेखको आशय टिपेर आलोचना गरेका हुन्। 'कुनै कुनै विद्वानले लेखिदिन्छन्, कम्युनिस्ट पार्टीहरु मिल्ने कि समाप्त हुने? भनेर प्रश्नचिह्न राखेर, तथाकथित बुद्धिजीवीहरु, कोहीकोही कम्युनिस्टको खोल ओडेको बुद्धिजीवी पनि हुन्छन्, लेखिदिन्छन् र मान्छेलाई निराश बनाइदिन्छन्', उनले भने।
ओलीले एमाले बाहेक अन्य पार्टीहरु कम्युनिस्ट नभएको चर्चा गरेका थिए। 'मोहन वैद्यजीको इन्टरभ्युको मैले शीर्षक मात्रै हेरेको थिएँ। स्थानीय तहको निर्वाचन उहाँहरुको पार्टीले बहिस्कार गर्ने रे। किन बहिस्कार गर्ने भन्दा, कतै पनि जित्ने स्थिति छैन। त्यो पार्टीसँग मिलेन भने एमाले समाप्त हुन्छ रे। एउटा बुद्धिजीवीले लेखेका छन्। कम्युनिस्ट मिलेनन् भने समाप्त हुन्छन्, मिल्ने कि समाप्त हुने? मोहन वैद्यजीलाई भनेको कि कम्युनिस्ट पार्टीलाई भनेको? माधवकुमार भन्नेको गुटलाई भनेको कि एमालेलाई भनेको? एमालेलाई भनेको हो भने यस्ता जिस्काउने खालका कुराहरु नगर्न म सबैलाई सुझाव दिन्छु', उनले भने।
ओली आफ्नो सरकार ढाल्न र शेरबहादुर देउवाको सरकार बनाउन भूमिका खेलेका आफ्नै पार्टीका नेताहरुप्रति आक्रामक सुनिए। गत वैशाखमा ओलीले विश्वासको मत लिँदा एमालेकै कैयौँ सांसद्हरुले मत दिएका थिएनन्, तर देउवालाई प्रधानमन्त्री बनाउन हस्ताक्षर गरेका थिए। 'झन्डै दुई तिहाइ पुगेको कम्युनिस्ट पार्टीलाई, दुई तिहाइको हैसियतमा रहेको त्यस्तो कम्युनिस्ट पार्टीलाई फुटाउने कम्युनिस्ट हुन्छन्? पार्टी फुटाएर एक पछि अर्को चिरा पार्ने, चोइट्याउने, सरकारलाई भोट नदिएर अर्कातिर भागेर अन्त भोट हाल्ने। पार्टीलाई परे भोट नहाल्ने, प्रतिक्रियावादीलाई भोट हाल्नको लागि पछिल्लो ढोकाबाट छिरेर जाने, त्यस्ता पनि कम्युनिस्ट हुन्छन्?', उनको प्रश्न छ।
ओलीले कम्युनिस्ट नाम राख्दैमा पार्टी कम्युनिस्ट नहुने पनि चर्चा गरे। बोलिचालीको भाषामा अथवा नाम नामेसीको हिसाबले एउटा नाम हुने भने पनि यथार्थमा त्यस्तै नहुने उनको भनाइ थियो। 'मेरो नाम बलबहादुर राखेको भए हुन्थ्यो। तर म बलहादुर भइहाल्थेँ त?', उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_gdf6c1thm9_HDxLwnLSEf-1783479974.jpg)
-1764146706.png)
