काठमाडौं– अर्को महिना युनाइटेड अरब इमिरेट्स (युएई) मा हुने आईसीसी विश्वकप लिग–२ को त्रिकोणात्मक सिरिजको खेल तालिका सार्वजनिक भएको छ। मार्च तेस्रो साता नेपाल, युएई र पपुवा न्यू गीनीबीच हुने त्रिकोणात्मक ओडिआई सिरिजको खेल तालिका बुधबार सार्वजनिक भएको हो।
क्रिकेट साइट क्रिकबजका अनुसार नेपालले पपुवा न्यू गिनीसँग खेल्दै सुरुआत गर्नेछ। उक्त खेल मार्च १६ मा शारजहा क्रिकेट मैदानमा हुनेछ। यस्तै, दोस्रो खेल नेपालले युएईविरुद्ध मार्च १८ मा दुबई इन्टरनेशल क्रिकेट स्टेडियममा खेल्नेछ। नेपालको तेस्रो खेल युएईविरुद्ध नै मार्च २१मा दुबई इन्टरनेशल क्रिकेट स्टेडियममा खेल्नेछ।
नेपालले अन्तिम खेल पपुवा न्यू गिनीविरुद्ध मार्च २२ मा दुबई इन्टरनेशल क्रिकेट स्टेडियममा खेल्नेछ। नेपाली टोली हाल आईसीसी टी२० विश्वकप छनोटको लागि ओमानमा छ। मंगलबार पहिलो सेमिफाइनलमा युएईसँग ६८ रनले पराजित हुँदै नेपालले आगमी अक्टोबर-नोभेम्बरमा अस्ट्रेलियामा आयोजना हुने टी२० विश्वकप खेल्ने अवसर गुमाइसकेको छ।
नेपालले बिहीबार तेस्रो स्थानको लागि ओमानसँग खेल्नेछ। त्यसपछि नेपाली क्रिकेट स्वदेश फर्किनेछ। केही साताको तयारी पछि नेपाल युएई प्रस्थान गर्नेछ।
युएईमा उक्त सिरिजपछि नेपालले मार्च अन्तिममा घरेलु मैदानमा मलेसिया र पपुवा न्यू गिनीसँग त्रिकोणात्मक टी२० आई सिरिज खेल्ने नेपाल क्रिकेट संघ (क्यान)ले जनाएको छ।
नेपालले विश्वकप लिग–२ मा हालसम्म दुई त्रिकोणात्मक सिरिज खेलेको छ। २०२० मा नेपालले घरेलु मैदान टियुमा ओमान र अमेरिकासँग खेलेको थियो। गत असोजमा ओमानमा ओमान, नेपाल र अमेरिकाबीच त्रिकोणात्मक ओडिआई सिरिज भएको थियो।
नेपाल विश्वकप लिग–२ मा ८ खेलमा ४ मा जित र ४ मा हारसहित छैटौं स्थानमा छ। २०२३ सम्म चल्ने विश्वकप लिग–२ का शीर्ष तीन टोलीले सोझै त्यसै वर्ष हुने एकदिवसिय विश्वकप छनोटमा स्थान बनाउने छन् बाँकी चार टोलीले प्लेअफ खेल्नुपर्ने हुन्छ।
ओमान २३ खेलमा १५ जित र ७ मा हारसहित ३० अंक जोड्दै शीर्षस्थानमा छ। यता, स्कटल्यान्ड १२ खेलमा ७ जित र ३ हार रसहित १६ अंकका साथ दोस्रो स्थानमा छ। अमेरिका १६ खेलमा ७ जित र ९ हारसहित तेस्रो स्थानमा छ।
युएई १० खेलमा ५ जित र ३ हारसहित १२ अंकका साथ चौथो स्थाानमा छ। यता, नामिबिया ९ खेलमा ५ जित र ४ हारसहित १० अंकका साथ पाँचौं स्थानमा छ। नेपाल ८ खेलमा ४ जित र ४ हारसहित ८ अंकका साथ छैटौं स्थानमा छ। पपुवा न्यू गिनी १२ खेलमा १२ हारसहित पुछारमा छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773837959.png)
