काठमाडौं- नेपालले आईसीसी टी२० विश्वकप छनोटको सेमिफाइनलमा युनाइटेड अरब इमिरेट्स (युएई)सँग प्रतिस्पर्धा गर्ने भएको छ।
मंगलबार दिउँसो ३:४५ बजे ओमान क्रिकेट एकेडेमी ग्राउन्ड-१ मा हुने सेमिफाइनलमा युएईलाई पराजित गरे नेपालले आगामी अक्टोबर नोभेम्बरमा अस्ट्रेलियामा हुने टी२० विश्वकप खेल्न पाउनेछ।यसअघि सन् २०१४ मा नेपालले बंगलादेशमा ऐतिहासिक विश्वकप खेलेको थियो।
नेपाल समूह ‘बी’को विजेता र युएई समूह ‘ए’को उपविजेता रुपमा सेमिफाइनलमा प्रतिस्पर्धा गर्न लागेका हुन्। नेपालले पहिलो खेलमा ओमानलाई ३९ र दोस्रो खेलमा फिलिपिन्सलाई १ सय ३६ रनले हराउँदा अन्तिम खेलमा क्यानडालाई ८ विकेटले हराउँदै अपराजित रहँदै सेमिफाइनलमा पुगेको हो।
नेपाल समूह ‘बी’मा ३ खेलमा अपराजित रहँदै शीर्ष स्थानमा रह्यो। नेपाली राष्ट्रिय टोलीका कप्तान सन्दीप लामिछानेले सेमिफाइनल पुग्न धेरै मिहिनेत गरेको र युएईविरूद्वको खेलका लागि प्रतीक्षामा रहेको बताए।
‘हामीले सेमिफाइनलमा पुग्नको लागि धेरै मेहनत गरिरहेका छौं। अहिलेसम्मको यो यात्रा उत्कृष्ट छ र हामी सबै भोलिको खेलको प्रतीक्षामा छौं,’ खेलपछि उनले भने,‘हाम्रोतर्फबाट अहिलेसम्म शतप्रतिशत दिएका छौं। त्यसरी नै भोलि पनि ज्यूज्यान लगाएर नेपाललाई विश्वकपमा छनोट गराउने छौं।’
यता, युएई ३ खेलमा २मा जित र १मा हारसहित ४ अंकका साथ नेटरनरेटमा दोस्रो स्थानमा रहँदै सेमिफाइनलमा पुगेको हो। युएईले टेस्ट टोली आयरल्यान्डलाई १८ र जमर्नीलाई २४ रनले हराएको थियो। बहराइनसँग भने २ रनले पराजित भएपनि नेटरनरेटमामाथि रहँदै सेमिफाइनलमा पुगेको हो।
पहिलो सेमिफाइनल खेलमा ओमान र आयरल्यान्डबीच मंगलबार सोही समयमा ओमान क्रिकेट एकेडेमी ग्राउन्ड-२ मा प्रतिस्पर्धा हुनेछ।आयरल्यान्ड समूह ‘ए’को विजेता र ओमान समूह ‘बी’को उपविजेता रुपमा सेमिफाइनलमा पुगेका हुन्।
आयरल्यान्ड युएईसँग १८ रनले पराजित भएपनि बहराइनलाई २१ रन र जमर्नीलाई ७ विकेटले हराएको थियो। ओमान पहिलो खेलमा नेपालसँग पराजित भएपनि क्यानडा र फिलिपिन्सलाई ९/९ विकेटले हराउँदै सेमिफाइनलमा पुगेको हो। फाइनल पुग्ने दुवै टोलीले विश्वकप खेल्न पाउनेछन्। फाइनल बिहीबार हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751267101.jpg)
-1751273553.jpg)
-1749826086.png)
