काठमाडौं- चालु आर्थिक वर्षको ६ महिनामा राष्ट्रिय गौरवका आयोजनाहरुका लागि विनियोजन गरिएको बजेटको खर्च निराशाजनक पाइएको छ। अर्थ मन्त्रालयले आज सार्वजनिक गरेको चालु आर्थिक वर्ष २०७८/७९ को बजेटको अर्थवार्षिक समीक्षामा गौरवका आयोजनाअन्तर्गत सञ्चालित परियोजनाको खर्च न्यून भएको पाइएको हो।
सरकारले चालु आर्थिक वर्षका लागि २५ वटा आयोजनालाई गौरवका आयोजनामा समावेश गरेको थियो। जसअनुसार ती योजनाका लागि ८२ अर्ब २४ करोड रुपैयाँभन्दा बढी बजेट विनियोजन गरिएको थियो। विनियोजित बजेटमध्ये चालु आवको पहिलो छ महिनामा १६.३९ प्रतिशतमात्र बजेट खर्च भएको हो।
तथ्यांकअनुसार राष्ट्रिय गौरवका आयोजनाका लागि चालुतर्फ तीन अर्ब ३८ करोड ४६ लाख रुपैयाँ, पुँजीगततर्फ ६६ अर्ब ४७ करोड रुपैयाँ र वित्तीय व्यवस्थापनतर्फ १२ अर्ब ३८ करोड ४६ लाख गरी ८२ अर्ब २४ करोड ४४ लाख रुपैयाँ बजेट विनियोजन गरिएको थियो। उक्त विनियोजन गरिएको बजेटअन्तर्गत चालु आर्थिक वर्षको पहिलो छ महिनामा चालुतर्फ एक अर्ब ३६ करोड ८० लाख, पुँजीगततर्फ ११ अर्ब ६३ करोड छ लाख र वित्तीय व्यवस्थापनतर्फ ४८ अर्ब ५० लाख गरी १३ अर्ब ४८ करोड ३६ लाख रुपैयाँ खर्च भएको छ।
मन्त्रालयको तथ्यांकअनुसार पुष्पलाल (मध्य पहाडी) राजमार्ग आयोजनामा २४.१ प्रतिशत बजेट खर्च भएको छ। सो आयोजनाका लागि आठ अर्ब १३ करोड ३३ लाख रुपैयाँ बजेट विनियोजन गरिएकोमा छ महिनाको अवधिमा एक अर्ब ९६ करोड ४६ लाख रुपैयाँमात्र बजेट खर्च भएको छ। हुलाकी राजमार्गका लागि छ अर्ब ३९ करोड ४२ लाख रुपैयाँ बजेट विनियोजन भएकोमा हालसम्म दुई अर्ब ४४ करोड ९९ लाख रुपैयाँ खर्च भएको छ।
उत्तर-दक्षिण लोकमार्गका लागि एक अर्ब ११ करोड १४ लाख रुपैयाँ बजेट विनियोजन भएकोमा १५ करोड ९० लाख रुपैयाँ, उत्तर-दक्षिण लोकमार्ग (कालीगण्डकी करिडोर मालढुंगा-राम्दी) परियोजनका लागि दुई अर्ब ४२ करोड ५५ लाख रुपैयाँ बजेट विनियोजन गरिएकोमा ७७ करोड ७२ लाख रुपैयाँ र उत्तर-दक्षिण लोकमार्गका लागि ५८ करोड ८९ लाख रुपैयाँ बजेटमध्ये पाँच करोड २६ लाख रुपैयाँ बजेट खर्च भएको छ।
यस्तैगरी रेल, मेट्रो रेल तथा मनोरेल विकास आयोजनाका लागि छ अर्ब ५३ करोड २५ लाख रुपैयाँमध्ये ९५ करोड ६२ लाख रुपैयाँ, काठमाडौं तराई मधेश द्रूतमार्गका लागि आठ अर्ब ९२ करोड ७९ लाखमध्ये एक अर्ब ४० करोड ८४ लाख, गल्छी त्रिशूली मैलुङ स्याफ्रुवेसी रसुवागढी सडक आयोजनाका लागि एक अर्ब ६२ करोड १७ लाखमध्ये ८२ करोड ५९ लाख रुपैयाँ खर्च भएको छ।
गौतमबुद्ध अन्तर्राष्ट्रिय विमानस्थल आयोजनाका लागि विनियोजित तीन अर्ब ७२ करोड ८० लाख रुपैयाँमध्ये १८ करोड ५० लाख रुपैयाँ खर्च भएको छ। यस्तै पोखरा अन्तर्राष्ट्रिय विमानस्थल आयोजनाका लागि १३ अर्ब ४१ करोड २९ लाख रुपैयाँमध्ये आठ अर्ब ५० करोड रुपैयाँ खर्च भएको छ। यस्तै पशुपति क्षेत्र विकास कोषका लागि विनियोजित ३५ करोडमध्ये आठ करोड ५१ लाख रुपैयाँ, बूढीगण्डकी जलविद्युत् आयोजनाका लागि सात अर्ब ९९ करोड ५८ लाखमध्ये १८ करोड ६५ लाख रुपैयाँ खर्च भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
