काठमाडौं- संसदीय समितिले काठमाडौं-तराई मधेस द्रूतमार्ग ‘फास्ट ट्र्याक’ आयोजनालाई द्रूतरूपमा अघि बढाउने सन्दर्भमा सरोकारवाला मन्त्रालयलगायत सबैलाई आ-आफ्नो दायित्व पूरा गर्न निर्देश गरेको छ। राष्ट्रिय सभाअन्तर्गतको प्रत्यायोजित व्यवस्थापन तथा सरकारी आवश्वासन समितिले द्रूतमार्ग निर्माण तोकिएको समयावधिभित्र पूरा गर्ने सिलसिलामा देखिएका चुनौती र समस्या हटाउन चाल्नुपर्ने कदमबारे सम्बन्धित मन्त्रालयका सचिवसगँको छलफलपछि उक्त निर्देशन दिएको हो।
समितिको आजको बैठकले रक्षा, अर्थ, वन तथा वातावरण, उद्योग, वाणिज्य तथा आपूर्ति, भौतिक पूर्वाधार तथा यातायात मन्त्रालयका पदाधिकारीलाई द्रूतमार्ग समयावधिभित्र अर्थात् आर्थिक वर्ष २०८०/८१ भित्र पूरा गर्न आ-आफ्नो मन्त्रालयमा पर्ने दायित्व यथाशीघ्र पालना गर्न निर्देशन दिएको सभापति रामनारायण बिडारीले जानकारी दिए।
बैठकले आयोजनाको कार्यसम्पादनलाई द्रूतगति प्रदान गर्ने सिलसिलामा कुनै कानुनले बाधा अड्चन खडा गरेको वा कानुन संशोधन गर्न पर्ने वा निर्देशिका खारेज गर्नुपर्ने भएमा सहजीकरण गर्नका लागि प्रधानमन्त्री तथा मन्त्रिपरिषद्का सचिवलाई आगामी बैठकमा अनिवार्य उपस्थित हुनेगरी आमन्त्रण गर्ने निर्णय पनि गरेको छ।
यसअघि बैठकमा सदस्यले राष्ट्रिय गौरवको प्राथमिकता प्राप्त आयोजना समयमै पूरा गर्न आर्थिक स्रोतको सुनिश्चितता, खोकना-बुङमती इलाकामा जग्गा अधिग्रहण विवाद निरुपण तथा रुख कटानको सहजीकरण गर्न मन्त्रालयबाट भएका प्रयासबारे चासो व्यक्त गरे।
बैठकमा मन्त्रालयका सचिवले आयोजनाको कामलाई सहजरूपमा अघि बढाउन आ-आफ्नो मन्त्रालयका तर्फबाट गर्न कार्य समयमै सहज र सरल ढंगबाट पूरा गर्ने प्रतिबद्धता जनाउँदै समन्वय र सहकार्यका आधारमा काम गर्ने विश्वास दिलाए।
राष्ट्रिय गौरवको सबैभन्दा प्राथमिकता प्राप्त करिब ७२ किमी दूरीको द्रूतमार्ग निर्माण नेपाली सेनाको व्यवस्थापनमा भइरहेको छ। ललितपुरको खोकनाबाट सुरु भइ बाराको निजगढमा पूर्व-पश्चिम राजमार्गसँग जोडिने द्रूतमार्ग निर्माणपछि काठमाडौं र तराईबीच सडक यातायातको दूरी काम हुन गइ यातायात ढुवानीको लागत र समय घट्ने मात्र नभइ मुलुकै विकासमा ठूलो योगदान पुर्याउने अपेक्षा गरिएको छ।
करिब एक खर्ब ७५ अर्ब रुपैयाँ प्रारम्भिक लागत अनुमान गरिएको फास्ट ट्र्याकमा तीन वटा सुरुङ र लामा छोटा ८७ पुल रहने छन्। डीपीआर स्वीकृत भएको चार वर्षभित्र निर्माण सम्पन्न लक्ष्य राखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
