बुटवल– रुपन्देहीको तिलोत्तमा नगरपालिकाले आगामी आर्थिक वर्षमा शिक्षा, स्वास्थ्य, कृषि र पूर्वाधार विकासलाई प्राथमिकतामा राख्दै वार्षिक नीति तथा कार्यक्रम सार्वजनिक गरेको छ।
बुधबारबाट सुरु भएको तेस्रो नगरसभामा नीति तथा कार्यक्रम प्रस्तुत गर्दै नगर प्रमुख वासुदेव घिमिरेले ‘सामुदायिक विद्यालयको शैक्षिक र भौतिक सुधारः बालबालिका विद्यालय प्रवेशको पहिलो आधार’ भन्ने नाराका साथ समग्र शिक्षा प्रणालीको सुधारका लागि अगाडि बढ्ने जानकारी गराए।
सामुदायिक विद्यालयमा दिवा खाजा कार्यक्रम सुरु गरिसकेको तिलोत्तमाले विद्यालयप्रतिको आकर्षण बढाउन शैक्षिक र भौतिक पक्षको सुधारका साथै स्कुल बस सञ्चालनमा सहयोग गर्नेसम्मका कार्यक्रम अघि सारेको छ।
आगामी ३ वर्षभित्र सामुदायिक र संस्थागत विद्यालयबीचको दूरी हटाउने पनि तिलोत्तमाको नीति तथा कार्यक्रममा उल्लेख छ।
‘स्वस्थ नगरवासी : स्वस्थ नगर’ भन्ने नाराका साथ गुणस्तरीय स्वास्थ्य सेवामा सबै नागरिकको समतामूलक पहुँच सुनिश्चित गर्ने कार्यमा नगरपालिका क्रियाशील रहने उल्लेख गर्दै नगर प्रमुख घिमिरेले निकट भविष्यमा कार्यान्वयन हुने स्वास्थ्य बिमा कार्यक्रम अन्र्तगत वडा नम्बर १७ का नागरिकलाई स्वास्थ्य बिमामा लाग्ने रकमको ३० प्रतिशत रकम अनुदान दिनगरी बजेट व्यवस्था मिलाइने जानकारी गराए।
यस्तै, नीति तथा कार्यक्रममा वडा नम्बर ७ मा रहेको सेमरा बजार स्वास्थ्य चौकीलाई स्तरोन्नति गरी २५ शय्याको अस्पतालका रुपमा विकास गरिने, वडा नम्बर १७ मा रहेको ‘बिपी ग्राम’ लाई आवश्यक भौतिक पूर्वाधारसहित स्वास्थ्य केन्द्रका रुपमा सञ्चालनमा ल्याइने जनाइएको छ।
‘एक घर, एक करेसाबारी : पकेट क्षेत्रमा व्यावसायिक तरकारी’ भन्ने नाराका साथ वडा नम्बर १४ लाई ‘तरकारी पकेट क्षेत्र’ र अन्य वडाहरुमा ‘एक घर : एक करेसाबारी’ को नीति अवलम्बन गर्दै आगामी एक वर्षभित्र तरकारीमा आत्मनिर्भर हुने नगरपालिकाको लक्ष्य छ। कृषि तथा पशुपालनमा अनुदानका विभिन्न कार्यक्रम अघि सार्दै नगरपालिकाले ‘व्यावसायिक रुपमा काम गर्ने किसानलाई नगरपालिकाको सम्मान : सबै किसानलाई उत्पादनमा आधारित अनुदान’ नीति अवलम्बन गरिने जनाएको छ।
पशु बिमा अनुदान र बाली तथा पशु संरक्षण कोषलाई थप व्यवस्थित गरिने जनाउँदै नगर प्रमुख घिमिरेले सहकारी खेती प्रणाली, सहकारी संघ संस्थासँगको सहकार्यमा थ्रीपी मोडलमा उत्पादनमूलक उद्योग व्यवसाय सञ्चालन, भैलुभुज लगायत सिँचाइ प्रणाली र बोरिङहरुलाई पूर्वअवस्थामा सञ्चालनमा ल्याउन प्रोत्साहन गर्दै सिँचाइमा लाग्ने विद्युत् महसुलमा १० प्रतिशत अनुदान दिने व्यवस्था मिलाउने नीति नगरपालिकाले लिएको उल्लेख गरे।
कम्तीमा ५० जना नेपाली नागरिकलाई रोजगारी दिने उत्पादनमूलक उद्योगका नाममा रहेको जमिनमा लाग्ने एकीकृत सम्पत्ति करमा १५ प्रतिशत छुट दिने नीति नगरपालिकाले अवलम्बन गरेको छ। वडा नम्बर २ र १५ वडा कार्यालयलाई ‘तालिम केन्द्र’को रुपमा विकास गर्दै आगामी आर्थिक वर्षमा सीपयुक्त र स्वरोजगारमूलक बनाउनेगरी न्यूनतम ५ सय युवायुवतीलाई तालिम प्रदान गरिने, वडा नम्बर १० मा ‘तिलोत्तमा उद्योग ग्राम’ स्थापनाका लागि आवश्यक प्रक्रिया अगाडि बढाइने नगरपालिकाको नीति छ।
सिद्धार्थ राजमार्ग अन्तर्गत जोगीकुटी र कोटिहवामा बुद्धमूर्तिसहितको आकर्षक प्रवेशद्वार निर्माण गर्ने, खरको छाना भएका घरपरिवारलाई जस्तापाताको छानामुनि ल्याउन कार्यविधि बनाएर जस्तापातामा लाग्ने रकमको ३० प्रतिशत अनुदान दिइने नीति तिलोत्तमा नगरपालिकाको छ। भूमिहीन, अव्यवस्थित बसोबासी र सुकुम्बासीलाई सुरक्षित बसोबासको लागि सामूहिक आवास निर्माणको सम्भाव्यता अध्ययन गरिने जनाउँदै नगरपालिकाले नीति तथा कार्यक्रममार्फत आगामी आर्थिक वर्षमा नयाँ पक्की सडकको तुलनामा पुराना जीर्ण सडकको मर्मत सुधारलाई विशेष महत्व दिइने जनाएको छ। वडा नम्बर ११ को वडा भवनलाई जलाशयको बीचमा निर्माण गरी नमूना वडा कार्यालयका रुपमा स्थापित गरिने, ‘तिलोत्तमा सञ्चार ग्राम’ स्थापनाका लागि आवश्यक गृहकार्य गरिने, दमकल खरिद गरिने पनि नीति तथा कार्यक्रममा समेटिएको छ।
स्वयंसेवक परिचालन रणनीति तय गरिने, बढीमा दुई छोरी मात्र जन्माई बन्ध्याकरण गर्ने दम्पतीलाई पुरस्कार तथा सम्मान गरिने, एकल महिलाको नाममा सञ्चालित व्यवसाय र एकीकृत सम्पत्ति करमा १५ प्रतिशत छुट उपलब्ध गराइने पनि नीति तथा कार्यक्रममा उल्लेख छ। नगरको पुनर्नापीको कार्यक्रमलाई म्याचिङ फन्डको रुपमा रकम विनियोजन गरी पुनर्नापी कार्यक्रम सञ्चालन गरिने, ‘एक घर : एक बैंक/सहकारी खाता, एक महिला : एक बैंक/सहकारी खाता अभियान’ सञ्चालन गरी सरकारको आर्थिक/सामाजिक सहयोग सबै परिवारमा सीधै पुग्ने वातावरण मिलाइने पनि नीति तथा कार्यक्रममा उल्लेख छ।
साउन १ गते देखि ‘एकीकृत सम्पत्ति कर’ लागू गरी संकलित राजस्वको २५ प्रतिशत रकम सम्बन्धित वडाको विकासका लागि नै व्यवस्थापन गरिने, सबैभन्दा धेरै कर दाखिला गर्ने करदातालाई ‘उत्कृष्ट करदाता’को रुपमा पुरस्कृत गरिने पनि नीति तथा कार्यक्रममा समेटिएको छ। नीति तथा कार्यक्रम तिलोत्तमा नगरलाई समृद्ध बनाउने मार्गदर्शक दस्तावेज रहेको जनाउँदै नगर प्रमुख घिमिरेले यसको सफल कार्यान्वयनका लागि सम्पूर्ण सरकारी निकाय, राजनीतिक दल, संघ संगठन, गैरसरकारी संस्था, निजी तथा सहकारी क्षेत्र लगायत सबैको सद्भाव, सहभागिता र सहयोग हुने विश्वास व्यक्त गरे।
विभिन्न राजनीतिक दल, संघ संस्थाका प्रमुख तथा प्रतिनिधिहरु, पत्रकार समेत सहभागी नगरसभा उद्घाटन कार्यक्रममा नगर उपप्रमुख जागेश्वरी चौधरी, प्रमुख प्रशासकीय अधिकृत कृष्णप्रसाद सापकोटा लगायतले बोलेका थिए।
विभिन्न संघसंस्था तथा व्यक्तिलाई सम्मान
तिलोत्तमा नगरपालिकाले विकास निर्माण तथा नगरपालिकाले अघि सारेका विभिन्न अभियानमा सहयोग पु¥याउने विभिन्न व्यक्ति तथा संघसंस्थालाई सम्मान गरेको छ। तेस्रो नगरसभाको अवसरमा बुधबार उनीहरुलाई सम्मान गरिएको हो।
यसरी सम्मानित हुनेहरुमा रेडियो लुम्बिनी, मिसन डेभलपमेन्ट बैंक, रोट्रयाक्ट क्लब अफ बुटवल, जागृति युवा क्लब, दुर्गाभवानी टोल विकास संस्था, मडाहा टोल विकास संस्था रहेका छन्। यस्तै, वडा नम्बर ३ का वडाध्यक्ष टंक तिवारी, कर्मचारीहरु शोभा खनाल र रेशमलाल रेग्मीलाई पनि नगरपालिकाले सम्मान गरेको छ।
यसैगरी तिलोत्तमा नगरपालिकाभरिकै ज्येष्ठ नागरिक १०४ वर्षीय केशवराम ज्ञवालीलाई नगद पाँच हजार रुपैयाँसहित नगरपालिकाले सम्मान गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771592819.png)
