रसुवा– सडक निर्माणमा अवरोध हटाउन माग राख्दै लाङटाङ राष्ट्रिय निकुञ्ज घेराउ गर्ने रसुवाको ठुलोस्याफ्रुका स्थानिय बासिन्दा र निकुञ्ज प्रशाषनबीच जिल्ला प्रशासन कार्यालय रसुवामा वार्ता सुरु भएको छ । सडकको स्तरोन्नतिको लागि निमार्ण कार्य सुचारु गर्ने विषयमा गोसाईंकुण्ड गाउँपालिकाका जनप्रतिनिधि, सडक डिभिजन कार्यालय, लाङटाङ राष्ट्रिय निकुञ्ज र ठुलोस्याफ्रुका स्थानीय बासिन्दाबीच वार्ता भइरहेको हो।
ठूलो भार्खुदेखि ठूलो स्याफ्रुसम्मको ९ किलोमिटर सडक स्तरोन्नति गर्ने क्रममा वातावरणीय प्रभाव मूल्याङन नगरी सडक डिभिजन कार्यालयले टेन्डर गरि ठेक्का प्रक्रियामा गएकाले लाङटाङ राष्ट्रिय निकुञ्जले सडकको स्तरोन्नतीमा रोक लगाएपछि स्थानीयहरुले मंगलबार साँझ निकुञ्ज कार्यालय घेराउ गरेका थिए। बुधबार बिहान १० बजे वार्तामा बसी समस्याको समाधान गर्ने बताएपछि उनीहरुले कार्यालय घेराउ स्थगित गरेका थिए।
ठूलोस्याफ्रुका स्थानीयले हाल ४ मिटरको कृषि सडक निर्माण गरी उपभोग गर्दै आएका थिए। पर्यटकीय क्षेत्रको रुपमा विकास भइसकेको ठूलोस्याफ्रुमा कृषि सडक निर्माण पश्चात् भूकम्पपछिको पुनःनिर्माणमा सहयोग पुगेको थियो। ९ किलोमिटरको सडकमा ४ मिटरको साँघुरो सडक रहेको थियो। सडक स्तरोन्नति गरि सहज हुने आशामा रहेका स्थानीयहरु निकुञ्जले रोक लगाएपछि अहिले दुखेसो गर्दै सदरमुकाम धुन्चेस्थित निकुञ्ज कार्यालय घेराउमा आएको स्थानीय दिण्डुप तामाङले बताए। उनले भने,‘अरु ठाउँमा चाँही इआइए नगरे पनि सडक खन्न दिने, तर हाम्रो क्षेत्रमा भने निकुञ्जले काम रोकेर किन अन्याय गर्ने?’
वन्यजन्तुको संरक्षणको नाममा निकुञ्जले अन्याय गरेको उनीहरुले बताएका छन्। तत्काल समस्याको समाधान गरी सडक निर्माण अवरोध नगरिदिन उनीहरुको माग छ। सडक डिभिजन कार्यालय नुवाकोटले इआइए नगरेको सडक ८ मिटर बनाइ स्तरोन्नति गर्न दिएपछि यो समस्या थपिएको हो।
सडक डिभिजन कार्यालय नुवाकोट मार्फत ठेकेदार कम्पनी स्वच्छन्द वल्र्ड वाइज अमृत जेभिले टेन्डर भएको १ वर्षपछि सडक स्तरोन्नतीको काम अघि बढाएको थियो। ८ मिटरको सडक निर्माणको काम गरिरहदाँ निकुञ्जले रोक लगाएको बताइएको छ। ५ करोड रुपैयाँको लागतमा सडकमा हाल नाली बनाउने, ग्याभिन, मेसिनरी वाल र कटिङ, कज्वे निर्माण र ग्राभेलको काम गरिरहेको ठेकेदार कम्पनीले जनाएको छ।
१८ महिनामा निर्माण सम्पन्न हुनुपर्ने काम पटक–पटकको अवरोधका कारण ढिला हुँदै गएको बताइएको छ। अब उक्त सडकको निर्माण सम्पन्न गर्ने समयसीमा ६ महिना मात्र बाँकि छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
