काठमाडौं- राजधानीको भृकुटीमण्डपमा असार १ गतेदेखि जारी घरजग्गा मेला आज सकिँदैछ। घरजग्गा व्यवसायीले सस्तो मूल्यमा अपार्टमेन्ट र घर बिक्रीमा राखेका छन् भने बैंकहरुले आकर्षक ब्याजदर ल्याएका छन्।
घरजग्गा कारोबारमा सुस्तता आएको बेलामा आयोजना भएको मेलामा घर बुकिङ उच्च भएको घरजग्गा व्यवसायीले बताएका छन्। सिभिल्स होम्सकी सेल्स मेनेजर कामना थापाले यस पटकको मेलामा उच्च बुकिङ भएको बताइन्। भनिन्,‘चार दिनको अवधिमा अपार्टमेन्ट र हाउजिङ गरेर १४ वटा बुकिङ भइसकेको छ। आज ३/४ वटा बुकिङ हुने अनुमान छ।’ उनले मेलालाई लक्षित गरेर ग्राहकलाई बुकिङमा १० देखि २० प्रतिशतसम्म छुट दिएको बताइन्।
मेलालाई लक्षित गरेर ४५ लाखमा बेच्ने सिभिल्स होम्सले ललितपुरको धापाखेलमा निर्माणाधीन १ बेडरुमको अपार्टमेन्ट ३७ लाख रुपैयाँ बिक्री गरेको उनले जानकारी दिइन्। साथै उनले सिभिल होम्सले नै निर्माण गरेको गोदावरीस्थित साढे ३ आनामा बनेको अढाईतले घर एक करोड ५५ लाख रुपैयाँमा बिक्री गरेको बताइन्। बुकिङ गर्दा १० प्रतिशत भुक्तानी दिनुपर्ने उनको भनाइ छ।
त्यस्तै सातदोबाटो ललितपुरमा रहेको क्लासिक टावरले १६७ वटा अपार्टमेन्ट रहेकोमा ४१ वटा मात्रै बुकिङ हुन बाँकी रहेको प्रविन शाक्यले बताए। मेलालाई लक्षित गरेर डाउन पेमेन्टमा उक्त टावरले ३ प्रतिशत छुट दिएको छ। मेलामा २ बेडरुमसहित अपार्टमेन्टको मूल्य ८२ लाख रुपैयाँदेखि सुरु गरिएको छ। ७५ लाख रुपैयाँदेखि अपार्टमेन्ट बेच्न सुरु गरेको क्लासिकसँग अब ८२ लाख रुपैयाँमाथिका अपार्टमेन्ट मात्र बुकिङका लागि राखिएको शाक्यले बताए।
ललितपुर धापाखेलमै रहेको डाउनटाउन अपार्टमेन्टले पनि १ बेडरुमको अपार्टमेन्ट ५८ लाख रुपैयाँमा बिक्रीमा राखेको छ। सिनियर मार्केटिङ अफिसर सुष्मा राईका अनुसार हालसम्म २ वटा मात्रै अपार्टमेन्ट बुकिङ भएको छ। ‘घर जस्तो कुरा एकै निर्णयमा खरिद गर्न गाह्रो भएकाले बुकिङ कम भएको हो। आज अन्तिम दिन भएकाले बुकिङ बढ्ने अनुमान छ,’ उनले भनिन्।
बैंकको आकर्षक ब्याजदर
बैंकहरुले मेलालाई लक्षित गरेर कर्जामा आकर्षक ब्याजदर ल्याएका छन्। एभरेस्ट बैंकले मेला सुरु भएको दिन असार १ गतेदेखि १५ गतेसम्म लागू हुने गरी घरजग्गा खरिदमा अकर्षक ब्याजदर ल्याएको बैंकका बानेश्वर शाखाका निरज श्रेष्ठले बताए।
बैंकले घरजग्गाका लागि ५ वर्षसम्मको कर्जामा १० दशमलव ३३ प्रतिशत ब्याजदर, १५ वर्षसम्मका लागि १० दशमलव ८३ प्रतिशत ब्याजदरमा कर्जा दिएको छ। साथै सेवाशुल्क शून्य दशमलव ७५ प्रतिशत लिने श्रेष्ठले बताए। अन्य समय बैंकले घरजग्गा कर्जामा ११ दशमलव ८३ प्रतिशतमा ब्याजदर लिँदै आएको थियो।
त्यस्तै, सिभिल बैंकले मेलालाई नै लक्षित गरेर आधार मूल्यमा नै कर्जा प्रवाह गरेको कर्जा शाखा कालिमाटी शाखाकी भावना रेग्मीले बताइन्। उनले बैंकको हाल कायम रहेको १२ दशमलव ३६ प्रतिशत आधार मूल्यमा नै ब्याज दिएको बताइन्। बैंकले ५ वर्षदेखि २५ वर्षसम्मको उक्त ब्याजदरमा कर्जा दिएको हो। साथै बैंकले सेवाशुल्क बापत शून्य दशमलव ५ प्रतिशत लिने उनले जानकारी दिइन्।
यता एनआइसी एसिया बैंकले १३ दशमलव ५ प्रतिशत ब्याजदरमा ५ वर्षदेखि २५ वर्षसम्मका लागि कर्जा दिएको छ। सनराइज बैंकले १३ दशमलव ५ प्रतिशतमा ब्याज दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768821025.png)
-1768820888.png)
-1764146706.png)
