काठमाडौं– सोमबार साँझ निधन भएका वरिष्ठ न्युरो सर्जन डा उपेन्द्र देवकोटालाई अन्तिम श्रद्धाञ्जलि दिन न्युरो अस्पताल बाँसबारीमा नेपाल सरकारका उच्चपदस्थ अधिकारी, चिकित्सक, स्वास्थ्यकर्मी, सर्वसाधारण तथा शुभेच्छुकको भीड लागेको छ।
डा देवकोटाको शवलाई अन्तिम श्रद्धाञ्जलिका लागि आज बिहान ८ देखि न्युरो अस्पतालको प्रांगणमा राखिएको छ।
डा देवकोटालाई श्रद्धाञ्जलि दिन उपराष्ट्रपति नन्दबहादुर पुन, सभामुख कृष्णबहादुर महरा, प्रदेश ३ प्रमुख अनुराधा कोइराला, स्वास्थ्य राज्यमन्त्री पद्मा अर्याल, नेपाल कम्युनिष्ट पार्टीका नेताहरु बामदेव गौतम, सुवास नेम्वाङ, विष्णु पौडेल, अग्नी खरेल, पम्फा भुषाल, योगेश भट्टराई, नयाँ शक्ति पार्टीका संयोजक तथा डा देवकोटाका सहपाठी डा बाबुराम भट्टराई र नेतृ हिसिला यमी, प्रधानसेनापति राजेन्द्र क्षेत्रीलगायत न्युरो अस्पताल पुगेका थिए।
सो क्रममा उनीहरुले डा देवकोटाका परिवारजनलाई भेट गर्दै समवेदना प्रकट गरेका थिए।
डा देवकोटाको शव श्रद्धाञ्जलिका लागि दिउँसो १ बजेसम्म अस्पताल परिसरमा राखिने छ। न्युरो अस्पताल बाँसबारीका अनुसार उनको आजै विद्युतीय मेसिनबाट दाहसंस्कार गरिनेछ।
यसैबिच सरकारले दिवंगत डा देवकोटाको राजकीय सम्मानका साथ दाहसंस्कार गर्ने निर्णय गरेको छ। सोमबार राति बसेको मन्त्रिपरिषद्को बैठकले डा देवकोटाको राजकीय सम्मानका साथ अन्त्येष्टि गर्ने निर्णय गरेको कानुनमन्त्री शेरबहादुर तामाङले जानकारी दिए।
‘उहाँलार्इ राजकीय सम्मान दिने निर्णय भएको छ।,’ मन्त्री तामाङले मन्त्रिपरिषद्को निर्णय सुनाउँदै भने, ‘नेपाली चिकित्सा क्षेत्रमा उहाँले गरेको योगदानको सम्मान गर्दै यस्तो निर्णय गरिएको हो।’
पित्तनलीको क्यान्सरबाट ग्रसित डा देवकोटाको बाँसबारीस्थित आफ्नै अस्पतालमा उपचारका क्रममा सोमबार साँझ ५ बजेर ३५ मिनेट जाँदा निधन भएको हो।
२०१० साल पुस ४ गते जन्मेका डा देवकोटाले आफ्नो करिअरको ३४ वर्षको अवधिमा २५ हजार भन्दा बढीको शल्यक्रिया र १० लाख भन्दा बढी बिरामी जाँचेका डा देवकोटा क्यान्सरसँग पराजित भएका हुन्।
डा देवकोटालाई पित्तवाहिनी नलीको क्यान्सर मेडिकल भाषामा बाइल डक्ट क्यान्सर (कोलान्जिओकार्सिनोमा) भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
