रोल्पामा सदरमुकाम बाहेकका क्षेत्रमा चार दिनदेखि टेलिफोन सेवा अवरुद्ध

ब्लग

नेपाल लाइभ सोमबार, असार ४, २०७५ ०५:४८

रोल्पा- रोल्पाको सदरमुकाम लिवाङबाहेकका अन्य स्थानमा टेलिफोन सेवा अवरुद्ध हुँदा सेवाग्राहीले सास्ती खेप्दै आएका छन्। असिना पानी तथा चट्याङका कारण टावरमा आएको खराबीसँगै सेवा अवरुद्ध भएको बताइएको छ।

पूर्वी रोल्पाको सातदोबाटोमा रहेको टावरमा लामो समयदेखि आएको समस्याका कारण पूर्वी रोल्पाका बासिन्दा टेलिफोन सेवाबाट वञ्चित छन्। सो टावरमा आएको समस्यासँगै पूर्वी रोल्पाका तीन वटा गाउँपालिका प्रभावित भएका छन्। सुनछहरी गाउँपालिकाको गाम, सिउरी र सेरममा पूरै सेवा अवरुद्ध छ भने अन्य वडा पनि आंशिक रुपमा प्रभावित भएका छन्। केही दिनअघि परेको चट्याङका कारण सिस्टम जलेपछि सेवा अवरुद्ध भएको टेलिकम रोल्पाले जनाएको छ।

समस्या देखिएका टेलिफोन टावर मर्मतका लागि आफूहरुले अञ्चल कार्यालय तुल्सीपुरलाई जानकारी गराएको नेपाल टेलिकम रोल्पाका प्राविधिक प्रतापकुमार महतोले जानकारी दिए।

'टावरमा ठूलो समस्या देखिएकाले जिल्लाको जनशक्तिले नभ्याउने देखियो', महतोले भने, 'अञ्चल कार्यालयमा जानकारी गराएका छौं, केही दिनमै सेवा सुरु हुनसक्छ।'

सेवा अवरुद्ध हुँदा स्थानीयहरु अत्यावश्यक कामका लागि फोन गर्न घन्टौं हिँड्न बाध्य भएको स्थानीय शिक्षक देवसिंह ठकुरीले बताए।

उता पश्चिम रोल्पाको रातामाटा रिपिटर टावरमा आएको खराबीका कारण चार दिनदेखि अवरुद्ध टेलिफोन सेवा अझै सञ्चालन नहुँदा यहाँका स्थानीय मर्कामा परेका छन्।

टेलिफोन सेवा अवरुद्ध हुँदा पश्चिम रोल्पाका आधा दर्जन बढी गाउँपालिका र रुकुम पूर्वका केही गाउँपालिका समेत टेलिफोन सेवा विहीन हुन पुगेका छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

बेलुन महोत्सवले पोखराको पर्यटनमा थपियो रौनकता

‘एनसेल वुमन आइकन आइसीटी अवार्ड २०२४’ बाट बन्दना शर्मा सम्मानित

अफगानिस्तानमा पाकिस्तानको हवाई आक्रमणमा ४६ जनाको मृत्यु