काठमाडौं– टेस्ट, ओडीआई र टी२० आई तीनै फर्म्याटमा घरेलु भूमि र विदेशमा उत्कृष्ट प्रदर्शन गर्दै आएको भारतलाई विश्व क्रिकेटको पावर हाउस हो भन्दा फरक नपर्ला।
भारतले पछिल्लो समय आईसीसी उपाधिको रुपमा सन् २०१३ मा च्याम्पियन्स ट्रफी जितेको थियो। पहिलो संस्करण अर्थात् २००७ को टी२० विश्वकप भारतले जितेको थियो।
भारत २०१४ को विश्वकप फाइनलमा श्रीलंकासँग पराजित भयो। अन्य प्रतियोगितामा फाइनल यात्रा पनि तय गर्न सकेन। भारत २०११ मा एकदिवसीय विश्वकप च्याम्पियन बनेको थियो। भारतले यी तीनै उपाधि महेन्द्रसिंह धोनीको कप्तानीमा हात पारेको थियो।
भारत हरेक प्रतियोगिताको उपाधि दाबेदार टोलीमा अग्रस्थानमा आउँछ। भारत संयुक्त अरब इमिरेट्स (यूएई)मा जारी आईसीसी टी२० विश्वकप २०२१ को उपाधिको पनि प्रमुख दाबेदार टोली मानिएको थियो। तर, दुई खेल खेलेको भारत अंकबिहीन छ। भारत रहेको समूह 'बी'मा पाकिस्तान लगातार तीन जित निकाल्दै ६ अंकसहित शीर्ष स्थानमा छ। पाकिस्तानले भारत, न्युजिल्यान्ड र अफगानिस्तानलाई पराजित गर्दै सेमिफाइनल यात्रा सहज बनाइसकेको छ।
पाकिस्तानले अब मंगलबार नामिबिया र आइतबार स्कटल्यान्डसँग खेल्नेछ। पाकिस्तान शतप्रतिशत जितका साथ शीर्षस्थानमा सेमिफाइनल खेल्ने निश्चित जस्तै छ।
यता, ३ खेलमध्ये २ मा जित निकालेको अफगानिस्तान ४ अंक जोडेर दोस्रो स्थानमा छ भने २-२ खेल खेलेका न्युजिल्याण्ड र नामिबिया एक जित र एक हार ब्यहोर्दै २ अंक जोडेर क्रमश तेस्रो र चौथो स्थानमा छन्।
न्युजिल्यान्डले अब अफगानिस्तान, स्कटल्यान्ड र नामिबियासँग खेल्नेछ। बाँकी तीनै खेलमा न्युजिल्यान्ड विजयी भए ४ मा जित र १ हारसहित ८ अंकका साथ सेमिफाइनल खेल्नेछ न्युजिल्यान्ड बाँकी तीनै खेलमा विजयी भएमा भारत समूह चरणबाटै घर फर्किनेछ।
यता, लगातार दुई खेलमा पराजय ब्यहोरेका भारत र स्कटल्याण्ड अंकबिहीन हुँदै तालिकाको पाँचौ र छैटौं स्थानमा छन्। र, होडबाजी शीर्ष दुईको छ। अब अफगानिस्तान, भारत र न्युजिल्यान्ड मध्य एक टोली सेमिफाइनलमा पुग्नेछन्।
के छ भारतको सम्भावना
भारतले बुधबार अफगानिस्तान, शुक्रबार स्कटल्यान्ड र सोमबार नामिबियासँग खेल्नेछ। भारतले यी तीनै खेलमा जित हात पारेमा ६ अंक हुनेछ। भारतको यस अगाडिको यात्रा निकै असहज छ। यता, न्युजिल्यान्ड अफगातिस्तानसँग पराजित भएमा पनि भारतलाई खासै फाइदा पुग्ने छैन।
भारतको नेटरनरेट कमजोर अर्थात् -१.६०९ छ। अफगानिस्तानको नेट रनरेट प्लस ३.०९७ छ। अर्थात् भारतलाई सेमिफाइनल पुग्ने बाँकीका खेलमा जितमात्रै निकालेर पुग्दैन। विपक्षी टोलीलाई फराकिलो अन्तरले पराजित गर्नुपर्छ।
भारत अफगानिस्तानसँग पराजित हुने हो भने भारतको विश्वकप यात्रा सेमिफाइनल नपुग्दै टुंगिनेछ। यद्यपि, भारतले फराकिलो अन्तरले अफगानिस्तानसँग जित हासिल गरेमा भारतीय टिमको सेमिफाइनल पुग्ने यात्रा जारी रहनेछ। तर,अन्य टोलीसँग पनि रनरेट सुधार्दै भारतले खेल्नुपर्नेछ।
भारतले अफगानिस्तानलाई पराजित गरेमात्रै पनि पुग्दैन। अफगानिस्तानले न्युजिल्याण्डमाथि साँघुरो जित निकाल्नुपर्नेछ। जसले अफगानिस्तानको रनरेट कम पार्छ भने न्युजिल्याण्डको यात्रालाई असहज।
यता, भारतको नामिबिया र स्कटल्याण्डबिचको खेल बाँकी छ। नामिबियाको २ अंक छ। यता, स्कटल्याण्डको शून्य अंक। यी दुवै टीमको लक्ष्य भारतलाई हराएर सेमिफाइनल पुग्ने सम्भावना जीवित राख्नु हुनेछ।
मानसिक दबाब
पाकिस्तान र न्युजिल्यान्डसँगको हारपछि भारतीय खेलाडीमा जित्नै पर्ने अत्यधिक मानसिक दबाब छ। हुन त पाकिस्तानसँगको पहिलो खेल हारेपश्चात नै भारतीय खेलाडी दबाबमा रहेको प्रष्ट देखिएको छ। त्यही दबाबका कारण आइतबार भारतले न्युजिल्याण्डसँग ८ विकेटको फराकिलो हार ब्यहोर्यो।
पहिलो खेलमा पाकिस्तानसँग १० विकेटको लज्जास्पद हार ब्यहोरेको भारतको खराब लय कायमै रहेको देखिएको छ। यस लयको एक प्रमुख कारण ब्याकअप प्लानको कमी हो भन्दा फरक नपर्ला। सधै टोलीको सोचे जस्तो सुरुवात हुन्छ भन्ने हुँदैन।
प्राय: टोलीले खराब सुरुवातका बाबजुद पनि राम्रो पुनरागमन गरेको कयौं खेलहरु छन्। तर, भारतसँग शीर्षक्रमका ब्याटर नचलेको खण्डमा मध्यक्रम र तल्लोक्रमका ब्याटरले कसरी खेल्ने भन्ने व्याकअप प्लानको कमी देखिएको छ।'मलाई लाग्दैन हामी ब्याट र बल दुवैमा पर्याप्त बलिया थियौं,' भारतीय कप्तान विराट कोहलीले न्युजिल्याण्डसँगको म्याचपछि भने,' फिल्डमा प्रवेश गर्दा हामीमा पर्याप्त साहस थिएन। हरेक पटक हामीले मौका लियौं, विकेट गुमायौं।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
