काठमाडौं- आईसीसी टी२० विश्वकप २०२१ मा दक्षिण अफ्रिकाले श्रीलंकामाथि ४ विकेटको रोमाञ्चक जित हात पारेको छ।
जितको लागि १ सय ४३ रनको विजयी लक्ष्य पछ्याएको दक्षिण अफ्रिकाले १९.५ ओभरमा ६ विकेट गुमाउँदै पूरा गर्यो। दक्षिण अफ्रिका कप्तान टेम्बा बभुमाले ४६ बलमा १ चौका र १ छक्कासहित सर्वाधिक ४६ रनको योगदान दिए।
अन्तिम ओभरमा जितको लागि १५ रन चाहिँएको अवस्थामा डेविड मिलरले लाहिरु कुमारालाई लगातार दुई छक्का प्रहार गर्दै दक्षिण अफ्रिका जित पक्का बनाएका थिए। डेविड मिलर २३ रनमा अविजित रहे। कागिसो रबाडा १३ रनमा अविजित रहे।
अन्तिम ओभरको पहिलो बलमा कागिसो रबाडाले एक रन लिए। दोस्रो र तेस्रो बलमा लाहिरु कुमारालाई मिलरले लगातार छक्का प्रहार गरेपछि जित पक्का भएको थियो। चौथो बलमा एक रन लिएका रबाडाले पाँचौं बलमा चौका प्रहार गर्दै जित दिलाए।
स्पिनर वानिन्दु हसरंगाले १८औं ओभरमा ह्याट्रिक पूरा गरेका थिए। हसरंगाले एइडेन माक्र्रम, टेम्बा बाभुम्बा र ड्वेन प्रेटोरियसको विकेट लिएका थिए।
हसरंगा टी२० विश्वकपमा ह्याट्रिक लिने तेस्रो खेलाडी हुन्। यसअघि सन् २००७ मा अष्ट्रेलिया तीव्र गतिका बलर ब्रेट लीले बंगलादेशविरुद्ध र यसै विश्वकपमा आयरल्यान्डका कर्टिस क्याम्फरले नेदरल्यान्ड्सविरुद्ध ह्याट्रिक लिएका थिए।
ओपनर क्विन्टन डि कक १२, रिजा हेनड्रिक्स ११, रास्सी भान डर डुसेन १६ र एडेन माक्ररमले १९ रनमा आउट भए।
श्रीलंका स्पिनर हसरंगाले ३ विकेट लिए। दुश्मन्था चामिराले ४ ओभरमा २७ रन खर्चेर २ विकेट लिए।
त्यसअघि शारजाह क्रिकेट स्टेडियममा टस हारेर पहिला ब्याटिङ थालेको श्रीलंका २० ओभरमा १ सय ४२ रनमा अल आउट भएको थियो।
श्रीलंकाका पाथुम निसांकाले सर्वाधिक ७२ रनको योगदान दिए। उनले ५८ बलमा ६ चौका र ३ छक्का प्रहार गरे।
निसांका बाहेक अन्य कुनैपनि श्रीलंका ब्याटरले राम्रो प्रदर्शन गर्न सकेनन्। श्रीलंकाका ८ खेलाडीले दोहोरो अंकमा रन जोड्न सकेनन्।
चरिथ असलंका २१ रनमा रन आउट भए। ओपनर कुशल परेराले ७, दासुन शनका ११, चामिका करुणारत्ने ५, दुश्मन्था चामिराले ३ र महेश थेक्सानले रन बनाए।
दक्षिण अफ्रिका स्पिनर तबरेज शाम्सी र ड्वेन प्रिटियोरेसले समान ३ विकेट लिए। एनरिच नोर्कियाले २ विकेट लिए।
योसँगै सुपर १२ को समूह १ मा रहेको दक्षिण अफ्रिकाले शीर्ष दुईमा रहेर सेमिफाइनल खेल्ने सम्भावना कायमै राखेको छ। दक्षिण अफ्रिका पहिलो खेलमा अष्ट्रेलियासँग ५ विकेटले पराजित भएको थियो। दोस्रो खेलमा वेस्टइन्डिजलाई ८ विकेटले हराएको थियो।
श्रीलंकाले पहिलो चरणको समूह ए को विजेता रुपमा सुपर १२ मा स्थान बनाएको थियो। श्रीलंकाले सुपर १२ को पहिलो खेलमा बंगलादेशलाई ५ विकेटले हराएको थियो। तर, दोस्रो खेलमा श्रीलंका अष्ट्रेलियासँग ७ विकेटले हराएको थियो।
सुपर १२ को समूह १ मा इंग्ल्यान्ड २ खेलमा २ मा जितका साथ ४ अंक जोड्दै शीर्षस्थानमा छ। अष्ट्रेलिया २ खेलमा समान नतिजाका साथ ४ अंक भएपनि नेट रनरेटका आधारमा दोस्रो स्थानमा छ।
३ खेलमा २ मा जित र १ मा हारसहित समान ४ अंक भएपनि नेटरनरेटको आधारमा दक्षिण अफ्रिका तेस्रो स्थानमा छ। श्रीलंका ३ खेलमा १ मा जित र २ मा हारसहित चौथो स्थानमा छ। वेस्टइन्डिज ३ खेलमा १ मा जित र २ मा हारसहित पाँचौ स्थानमा छ। बंगलादेश ३ खेलमा तीनै खेलमा पराजित हुँदै पुछारमा छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
