काठमाडौं– युवा ब्याटर अनिलकुमार शाहको विष्फोटक ब्याटिङमा विराटनगर वारियर्सले चौंथो संस्करणको एभरेष्ट प्रिमियर लिग (ईपीएल) टी २० क्रिकेटमा पहिलो जित निकालेको छ। आइतबार भएको खेलमा काठमाडौं किङ्स ११ लाई ७ रनले पराजित गर्दै विराटनगरले सानत्वना जित निकालेको हो।
भिजेको आउटफिल्डको कारण निर्धारित समय भन्दा दुई घण्टा ढिलो सुरुभएपटि खेल ८–८ ओभरमा झारिएको थियो। विराटनगरले दिएको १ सय ५ रनको लक्ष्य पछ्याएको काठमाडौंले निर्धारित ८ ओभरमा ३ विकेट गुमाएर ९७ रन मात्र बनाउन सक्यो।
काठमाडौंका विकेटकिपर रहमानउल्लाह गुरबाज १५ बलमा ३ चौका र १ छक्कासहित सर्वाधिक २८ रनको योगदान दिए। राजु रिजाल २४ रनमा अविजित रहे। सुबास खकुरेल २६ रनमा अविजित रहे।
काठमाडौैंलाई अन्तिम ओभरमा जितको लागि ६ बलमा २६ रन चाहिँएको थियो। सुबासले रायनखान पठानलाई पहिलो बलमा छक्का, दोस्रो बलमा दुई र तेस्रो बलमा छक्का प्रहार गरेपछि खेल रोचक बनेको थियो।
तर, बाँकी ३ बलमा १२ रन चाहिएको थियो। चौथो बलमा दुई र पाँचौं बलमा एक रन बनाए। अन्तिम बलमा पठानले एक रन दिँदै विराटनगरको जित पक्का गराए।
विराटनगरका रायनखान पठानले २ विकेट लिए। प्रतिश जिसीले १ विकेट लिए। त्यसअघि टियु मैदानमा टस हारेर ब्याटिङको निम्तो पाएको विराटनगरले निर्धारित ८ ओभरमा ५ विकेट गुमाउँदै १ सय ४ रन बनायो।
विराटनगरका अनिलकुमार शाह १६ बलमा २ चौका र ५ छक्कासहित ४५ रनमा अविजित रहे। ओपनर रयानखान पठान ११ बलमा २ चौका र ३ छक्कासहित ३० रन बनाउँदै आउट भएका थिए ।
करण केसी ११ बलमा १ चौका र १ छक्का सहित १५ रनमा आउट भए। सौरभ खनाल ५ रनमा अविजित रहे ।
ओपनर आसिफ शेख २ रनमा आउट भए। सिकन्दर राजा ४ रनमा विकेटकिपर रहमानउल्लाह गुरबाजबाट स्टम्पिङ आउट भएका थिए। काठमाडौंका रायन बर्ल, गुलशन झा र सन्दीप लामिछानेले १–१ विकेट लिए।
काठमाडौं ३ खेलमा १ मा जित र १ मा हारसहित पाँचौ स्थानमा छ । काठमाडौंले पहिलो खेलमा साविक विजेता ललितपुरलाई ७ विकेटले पराजित गरेको थियो। दोस्रो खेलमा चितवन टाइगर्ससँग ३ विकेटले पराजित भएको थियो।
विराटनगर लिग चरणबाटै बाहिरि सकेको छ । विराटनगर पहिलो खेलमा चितवन टाइगर्ससँग २ विकेटले पराजित भएको थियोे। यस्तै दोस्रो खेलमन भैरहवा ग्ल्याडियटर्ससँग ६ विकेट र तेस्रो खेलमा ललितपुरसँग ३७ रनले पराजित भएको थियो ।
चौथो खेलमा विराटनगर पोखरासँग ७ विकेटले पराजित हुँदै बाहिरिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
