काठमाडौं– पाकिस्तान क्रिकेट टिमका पूर्व कप्तान तथा स्टार अलराउन्डर शाहिद अफ्रिदी आज (सोमबार) स्वदेश फर्किने भएका छन्।
चौथो संस्करणको एभरेस्ट प्रिमियर लिग (ईपीएल) को एक खेल खेलेर उनी सोमबार बेलुका ४ बजे स्वदेश फिर्ता हुन लागेका हुन्। काठमाडौं किंग्स ११ मा दुई खेल खेल्न अनुबन्ध भएका अफ्रिदी बिहीबार नेपाल आएका थिए।
अफ्रिदीले ईपीएलमा दुई खेल खेल्ने जनाइए पनि सोमबार तय भएको विराटनगर वारियर्ससँगको खेल वर्षको कारण स्थगित भएपछि उनी सोमबार साँझ स्वदेश फिर्ता हुन लागेका हुन्। विराटनगरसँगको खेल स्थगित भएको केही समयमै अफ्रिदीले टियु मैदान छाडेका थिए।
यसअघि शनिबार अफ्रिदीले ललितपुर प्याट्रियटर्सविरुद्ध पहिलो खेल खेलेका थिए। अफ्रिदीले ब्याटिङको अवसर नपाए पनि ४ ओभर बलिङ गरेका थिए। उनले ३२ रन खर्चेका थिए।
अफ्रिदी खेलभन्दा पनि मनोरञ्जन र कूटनीतिक भेटघाट बढी ब्यस्त देखिए। उनले शुक्रबार राष्ट्रपति विद्यादेवी भण्डारीसँग भेटवार्ता गरेका थिए। अफ्रिदीले नेपाल बसाइको क्रममा नेपाल मुश्लिम आयोगसँग पनि छलफल गरेका थिए।
उनले केही नेपाली खेल अधिकारीहरुलाई पाकिस्तान भ्रमणको निम्तो दिएको पनि बताएका छन्। उनले यसपटको नेपाल बसाइ छोटो भएको कारण अर्को पटक परिवारलाई साथै लिएर आउने बाचा गरेका छन्।
‘यो भ्रमणमा मैले पूरै नेपाल राम्रोसँग घुम्न पाइनँ। छोटो भ्रमण छ। माउन्टेन फ्लाइट गएँ। सगरमाथा देखेँ। सँगै अन्य हिमालहरु हेरेँ। मेरो रोमाञ्चक अनुभव रह्यो। त्यसैले म परिवारलाई साथै लिएर आउन चाहन्छु। किनभने मेरो साथ परिवार भयो भने तुरुन्त फर्किने हतारो हुने छैन। सहरभन्दा बाहिर गएर नेपाल हेर्न चाहन्छु,’ उनले भनेका छन्।
अफ्रिदी फर्केसँगै अब उनको स्थानमा सिंगापुरका अलराउन्डर जनक प्रकाशले खेल्नेछन्। २१ वर्षीय जनक दायाँ हाते ब्याट्सम्यान र दायाँ हाते बलर हुन्।
उनले अहिलेसम्म सिंगापुरका लागि १५ टी २०आई खेलेका छन्। जसमा उनले ११८ रन बनाएका छन् भने १७ विकेट लिएका छन्।
यस्तो रह्यो अफ्रिदीको ४ ओभर
ललितपुर प्याट्रियटर्सविरुद्ध पहिलो खेलमा ४ ओभर बलिङ गरे पनि विकेट लिन सकेनन्। उनले ३२ रन खर्चिए। त्यसक्रमा उनले २ चौका र २ छक्का दिए। काठमाडौंका कप्तान सन्दीप लामिछानेले अफ्रिदीलाई छैटौं ओभरमा बलिङमा ल्याएका थिए।
अफ्रिदीको पहिलो बलमा ललितपुरका शंकर रानाले एक रन लिए। दोस्रो बलमा अफ्रिदीलाई पवन सर्राफले छक्का प्रहार गर्दा तेस्रो बलमा २ रन लिए। चौथो बलमा चौका प्रहार गर्दा पाँचौ बल डट भयो। छैटौं बलमा १ रन भएको थियो। उनले आफ्नो ओभरमा अफ्रिदीले १३ रन खर्चिएका थिए।
आठौं ओभरमा अफ्रिदीले ३ रन मात्र दिएका थिए। अफ्रिदी १४औं ओभरमा फेरि आएका थिए। यो ओभरमा अफ्रिदीले पहिलो पाँच बलमा चार रन दिए। छैटौं बलमा भने ललितपुरका योगेन्द्रसिंह कार्कीले छक्का हानेका थिए। यो ओभरमा उनले १० रन खर्चिए।
चौथो ओभर १६औंभरमा गरेका अफ्रिदीले ६ रन दिए। चौथो बलमा अफ्रिदीविरुद्ध पवनले चौका हानेका थिए। बाँकी तीन बल डट भयो दुई बलमा एक/एक रन भयो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768372708.png)
-1768370071.png)
-1764146706.png)
-1768288990.png)
