काठमाडौं– इन्डियन प्रिमियर लिग (आईपीएल) क्रिकेटअन्तर्गत रोयल च्यालेन्जर्स बैंग्लोरले साविक विजेता मुम्बई इन्डियन्सलाई पराजित गरेको छ ।
अलराउन्डर ग्लेन म्याक्सवेलको अलराउन्ड प्रदर्शन र तीव्र गतिका बलर हर्षल पटेलको ह्याट्रिकमा रोयल च्यालेन्जर्स बैंग्लोरले मुम्बईलाई ५४ रनले पराजित गरेको हो।
जितको लागि १ सय ६६ रनको विजयी लक्ष्य पछ्याएको मुम्बई १८.१ ओभरमा १ सय ११ रनमा अल आउट भयो। मुम्बईका ओपनर रोहित शर्माले २८ बलमा सर्वाधिक ४३ रनको बनाए भने क्विन्टन डि कक २४ रनमा आउट भए। मुम्बईका ९ खेलाडीले दोहोरो अंकमा रन बनाउन सकेनन्।
स्पिनर युजभेन्द्र चहलले डि ककलाई ग्लेन म्याक्सवेलबाट क्याच गराउँदै पहिलो सफलता दिलाएका थिए। १०औं ओभरको अन्तिम बलमा म्याक्सवेलले रोहितलाई देवदत्त पाडिक्कलबाट क्याच गराउँदै पेभेलियन फर्काए। त्यसपछिका ब्याट्सम्यान चल्न सकेनन्।
हर्षलले १७ औं ओभरमा ह्याट्रिक लिएका थिए। हर्षलको १७ औं ओभरको पहिलो बलमा हार्दिक पान्ड्या एक्स्ट्राकभरमा विराट कोहलीबाट ३ रनमा क्याच आउट हुन पुगे। दोस्रो बलमा अर्का विष्फोटक ब्याट्सम्यान काइरन पोलार्ड ७ रनमा बोल्ड आउट भए भने तेस्रो बलमा राहुल चाहरलाई एलबीडब्लू आउट गर्दै हर्षलले ह्याट्रिक लिएका थिए।
बैंग्लोरका हर्षल पटेलले ३.१ ओभरमा १७ रन खर्चेर ४ विकेट लिए। ग्लेन म्याक्सवेलले ४ ओभरमा २३ रन खर्चेर २ विकेट लिए। युजभेन्द्र चहलले ४ ओभरमा १ मेडन सहित ११ रन खर्चेर ३ विकेट लिए। मोहम्मद शिराजको नाममा एक विकेट रह्यो।
त्यसअघि दुबईमा टस हारेर ब्याटिङको निम्तो पाएको बैंग्लोरले निर्धारित २० ओभरमा ६ विकेट गुमाउँदै १ सय ६५ रन बनाएको थियो। भारतका कप्तान विराट कोहलीले ४२ बलमा ३ चौका र ३ छक्का सहित ५१ रनको योगदान दिए। ग्लेन म्याक्सवेलले ३७ बलमा ६ चौका र ३ छक्का सहित सर्वाधिक ५६ रन बनाए।
मुम्बईका जस्प्रित बुमराहले ४ ओभरमा ३६ रन खर्चेर ३ विकेट लिए भने ट्रेन्ट बोल्ट, एडम मिल्ने र राहुल चाहरले एक/एक विकेट लिए।
जितपछि १० खेलबाट १२ अंक जोडेको बैंग्लोर तेस्रो स्थानमा छ भने पराजित मुम्बई ८ अंकसहित सातौ स्थानमा छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
