काठमाडौं– राजेश पुलामीको उत्कृष्ट ब्याटिङमा चितवन टाइगर्सले चौथो संस्करणको एभरेष्ट प्रिमियर लिग (ईपीएल)मा रोमाञ्चक जित निकाल्दै सुखद् सुरुवात गरेको छ। आइतबार सम्पन्न खेलमा विराटनगर वारियर्सलाई २ विकेटले पराजित गर्दै चितवनले सुखद् सुरुवात गरेको हो।
विराटनगले दिएको १५२ रनको मध्यम लक्ष्य पछ्याएको चितवनले निर्धारित २० ओभरको अन्तिम बलमा ८ विकेट गुमाएर १५५ रन बनायो। १९औं ओभरसम्म ७ विकेट गुमाएर १५० रन बनाएको चितवनलाई अन्तिम ६ बलमा २ रनको खाँचो थियो।
तर, ८औं विकेटका लागि पुलामीलाई साथ दिन आएका कमलसिंह ऐरीलाई अनिल खरेलले १ रनमा बोल्ड गरेपछि खेल रोमाञ्चक बनेको थियो। त्यसपछि शाहब आलम क्रिजमा आए। दोस्रो बल डट राखेका अनिलले तेस्रो बलमा १ रन दिएका थिए। चौथो बल डट राखेका अनिलले पाँचौ बल पनि रन दिएनन्।
तर, अन्तिम बलमा पुलामीले ४ रन प्रहार गर्दै चितवनलाई जित दिलाए। कमजोर सुरुवात गरेको चितवनका लागि पुलामीले सर्वाधिका ४३ रन बनाए। उनले ३९ बलमा २ चौका र २ छक्का प्रहार गरेका थिए।
भीम सार्कीले ३० रनको योगदान दिए। आक्रमक ब्याटिङ गरेका सार्की ११ बलमा ५ चौका र १ छक्का प्रहार गर्द ३० रनमा आउट भए। दिलीप नाथ २३, करिम जन्नत १९ र ईशान पाण्डे १० रनमा आउट भए। यता, कप्तान सोमपाल कामी ९ रनमा आउट भए। श्रीलंकाका शेकुगे प्रसन्न ३ बलमा ३ रन बनाउँदै रन आउट भए।
सार्की र नाथको कमजोर साझेदारी
२.३ ओभरमा चितवनले २ विकेट गुमाएपछि क्रिजमा आएका भीम सार्की र दिलिप नाथले कमजोर स्कोरलाई उकास्न खोजेका थिए।तर, हतासमा देखिएका सार्की नाथसँग २९ रनको साझेदारी गर्दै क्रिजबाट बाहिरिए।
उनले ११ बलमा ५ चौका र १ छक्कासहित ३० रन बनाए। यस्तै, नाथले २१ बलमा १ चौका र २ छक्कासहित २३ रन बनाए। सार्की ५औं ओभरको तेस्रो बलमा करण केसीले धरापमा पारे। ठूलो सट खेल्ने क्रममा उनले प्रहार गरेको बल विराटनगरका आसिफ शेखले समाते।
लगत्तै ब्याटिङमा जम्न खोजिरहेका नाथ पनि शौरभ खनालको हातबाट क्याच आउट भए। जिम्बावेका अलराउन्डर सिकन्दर राजाले फ्याँकेको बलमा ठूलो सट खेल्ने कोसिस गर्दा व्यक्तिगत २३ रनमा उनले क्रिज छाड्नु पर्यो।
जम्न सकेनन् शाहजाद
चितवन टाइगर्स तथा अफगानिस्तानका विष्फोटक ब्याट्सम्यान मोहम्मद शाहजाद पहिलो खेलमा जम्न सकेनन्। ईशान पाण्डेसँगै ओपनिङमा आएका शाहजाद १ रनमै आउट भए।
आजकै खेलबाट ईपीएलमा डेब्यु गरेका विराटनगरका प्रतिश जिसीले दोस्रो ओभरको दोस्रो बलमा शाहजादलाई विकेटकिपर आसिफ शेखबाट एक रनमा क्याच गराए। शाहजदले ५ बल खेलेका थिए।
शाहजाद अर्को महिना युएई र ओमानमा हुने टि२० विश्वकपको लागि अफगानिस्तानको टोलीमा छन्। ईपीएलको समयमा अफगानिस्तानको अन्तर्राष्ट्रिय खेल नभएपछि उनी नेपाल आएका हुन्।
शाहजादले २ टेष्टमा ६९, ८४ ओडीआईमा ६ शतक र १४ अर्ध शतकसहित कुल २ हजार ७ सय २७ तथा ६५ टि२० मा १ शतकसहित १ हजार ९ सय ३६ रन बनाएका छन्।
विराटनगरको यस्तो रह्यो बलिङ
विराटनगरका सिकन्दर राजाले चितवनलाई रोक्न २ विकेट लिएका थिए। ४ ओभर बल फ्याँकेका उनले २ विकेट लिन ३४ रन खर्चिए।
यता, प्रतिश जिसीले ४ ओभर बलिङ गर्दै १ विकेट लिए। उनले २१ रन खर्चिए। कप्तान करण केसीले ४ ओभर बलिङ गर्दै २ विकेट लिन ३० रन खर्चिए।
यता, बिक्रम भुषाल व्यक्तिगत पहिलो ओभरमा महंगो सावित भए। ६ बल फ्यालेका भुषालले १७ रन खर्चिए। त्यसपछि उनले आफ्नो व्यक्तिगत दोस्रो ओभरमा मात्रै ४ रन खर्चिए।
अनिल खरेलले १९ रन खर्चिए ३ ओभर बलिङ गर्दै १ विकेट लिए। विराटनगरका रायन पठानले आफ्नो पहिलो ओभरमा मात्रै ४ रन खर्चिएका थिए।
त्यसपछि २ ओभर बल फ्याँकेका उनले १७ रन खर्चिए। समग्रमा ३ ओभर बलिङ गरेका उनले १ विकेट लिन २१ रन खर्चिएका थिए।
त्यसअघि कीर्तिपुरस्थित टियु मैदानमा टस हारेर ब्याटिङको निम्तो पाएको विराटनगरले जिम्बावेका आक्रमक ब्याट्सम्यान सिकन्दर राजाको अर्धशतकमा २० ओभरमा ९ विकेट गुमाएर १५१ रन बनाएको थियो।
विराटनगरका लागि राजाले बाहेक अन्यले गतिलो खेल प्रदर्शन गर्न सकेनन्। अनुभवि ब्याट्सम्यान राजाले ३७ बलमा अर्धशतक बनाएका थिए। उनले ४७ बलमा २ चौका र ७ छक्कासहित ६७ रनको योगदान दिए। उनी कमलसिंह ऐरीको बलमा ठूलो सट खेल्ने क्रममा भीम सार्कीको हातबाट क्याच आउट भए। यता, अनिलकुमार शाहले ३२ र शौरभ खनालले ३० रन बनाउनुबाहेक अन्य ब्याट्सम्यान भने क्रिजमा जमेर खेल्न सकेनन्।
अनिल र राजाको बलियो जुगलबन्दी
२ ओभर नपुग्दै ३ विकेट गुमाएको विराटनगरलाई अनिलकुमार शाह र जिम्बावेका सिकन्दर राजाले उकास्ने प्रयास गरेका थिए। पावर प्लेमा फितलो प्रदर्शन गरेको विराटनगरले यी दुई ब्याट्सम्यानबिच बलियो साझेदारी बन्दा केही राहत महसुस गरेको थियो।
अनिल र राजाले १०.५ ओभरसम्म ६१ रनको बलियो साझेदारी गरे। अनिल ३१ बलमा ३ चौका र १ छ्क्का प्रहार गर्दै व्यक्तिगत ३२ रनमा आउट भए। उनलाई युवा बलर सागर ढकालले बोल्ड गरे।
चल्न सकेनन् विराटनगरका ब्याट्सम्यान
तीव्र गातिका बलर तथा कप्तान सोमपाल कामीले पहिलो ओभरमै दुई विकेट लिँदै चितवनलाई सानदार सुरुवात दिलाएका थिए। गत चैतमा सम्पन्न मलेसिया, नेदरल्याण्ड्स र नेपालबीचको त्रिकोणात्मक सिरिजमा उच्च प्रदर्शन गरेका ओपनर ओपनर आसिफ शेखलाई दोस्रो बलमा सोमपालले शून्यमा क्याच गराए। आसिफ सोमपालको बलमा टस एज लागेर करिम जान्नतबाट क्याच आउट हुँदै गोल्डेन डक पेभिलिएन फर्के। सोमपालकै अन्तिम बलमा रयानखान पठान ४ रनमा बोल्ड आउट भए।
उनले ३ बल खेल्दै १ चौकासहित ४ रन बनाए। उनी आउट भएलगत्तै आसिफलाई ओपनिङमा साथ दिन आएका वेस्टइन्डिजका चन्द्रपाउल हेमराज पनि ५ बलमा २ रन बनाएर आउट भए। अर्कातीव्र गतिका बलर कमलसिंह ऐरीले दोस्रो ओभरको पाँचौ बलमा हेमराजलाई २ रनमा बोल्ड आउट गरेका थिए।
यता, काठमाडौं गोल्डेन्सबाट खेलिसकेका सुमित महर्जनले पनि गतिलो प्रदर्शन गर्न सकेनन्। सिकन्दर राजालाई साथ दिन आएका उनी पहिलो बलमै सागर ढकालको बलमा एल्बिडल्यूको सिकार हुँदै मैदानबाट बाहिरिए। त्यसपछि ११औं ओभरमा आएका विराटनगरका कप्तान करण केसी पनि क्रिजमा जन्म सकेनन्। पहिलोपटक विराटनगरको कप्तानी सम्हालेका किरण १ रनमा आउट भए।
३ बलको सामना गरेका करण शाहब आलमको बलमा अफगानी विकेटकिपर मोहम्मद शाहजादको हातबाट क्याच भए। यता, बिक्रम भुसाल ७ रन बनाएर आउट भए भने प्रतिश जिसीले खाता खेल्न सकेनन्।
चितवनको मध्यम बलिङ
पहिलो ओभरमै २ विकेट हात पारेका चितवनका कप्तान सोमपाल कामी ३ ओभरसँग किफायती बलर देखिए पनि अन्तिम ओभरमा खुकुलो बलिङ गरे। उनले पहिलो ओभरमा ६ रनमात्रै दिए। यस्तै, तेस्रो ओभरमा बलिङ गर्न आएका सोमपालले ५ रन खर्चिए।
तर,१६औं ओभरमा आफ्नो व्यक्तिगत तेस्रो ओभर बलिङ गर्न आएका सोमपाल महंगो सावित भए। उनले सिकन्दर राजलाई १ छक्कासहित ९ रन दिए। उनले समग्रमा ४ ओभरमा २ विकेट लिँदै ३४ रन खर्चिए।
यता, युवा बलर सागर ढकालले पनि २ विकेट लिए। उनले ३ ओभर बलिङ गर्दै १४ रन खर्चिएर विराटनगरलाई चल्न दिएनन्। कमलसिंह ऐरीले ४ ओभर बलिङ गर्दै १९ रन खर्चिएर २ विकेट लिए। ४ ओभर बलिङ गरेका अफगानिस्तानका करिम जन्नतले ३२ रन खर्चिए २ विकेट लिए। यता, श्रीलंकाका शेकुगे प्रसन्न चितवनको लागि महंगो सावित भए। १ ओभर मात्रै बल फ्याँकेका उनले १७ रन खर्चिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
