काठमाडौं- नेपाली राष्ट्रिय टोलीका मुख्य प्रशिक्षक डेभ वाटमोरले आजबाट बिदा लिने भएका छन्। वाटमोरले ओमान भ्रमणपछि नेपाली टोली छाड्ने गरि राजीनामा दिइसकेका छन्।
राजीनामा-पत्रमा उनले पारिवारिक जिम्मेवारीका कारण नेपालको टिम सम्हाल्न नसकिने जानकारी गराएका छन्। ‘कोरोना महामारीका कारण मलाईं परिवारबाट टाढा रहन सहज छैन। त्यसकारण यो जिम्मेवारीबाट अलग हुन चाहन्छु,’ वाटमोरले भनेका छन्।
यता, नेपाल क्रिकेट संघ (क्यान)ले भने वाटमोरलाई नेपाल बस्न सहज बनाउन परिवार यतै राख्ने व्यवस्थासमेत मिलाएको थियो। तर, उनले उक्त प्रस्ताव अस्वीकार गरे र नेपाली टोली हेर्न नसकिने क्यानलाई जानकारी दिए।
यसअघि गएको मार्चमा नै ‘टाइम्स अफ इन्डिया’ले वाटमोर आगामी सिजनका लागि ‘रणजी’ टिम बरोदाको प्रशिक्षक हुनसक्ने जनाएको थियो। गएको डिसेम्बरमा बरोदा क्रिकेट एसोसिएसनसँग उनको वार्ता पनि भएको उनी निकट स्रोतको भनाइ छ।
कोरोना महामारीका कारण भिषासम्बन्धी समस्या हुने भएपछि उनीसँग सम्झौता हुन सकेको थिएन। त्यसैकारण उनी नेपाली टोली सम्हाल्न काठमाडौं ओर्लिएका थिए।
यता, केही समय अगाडि मात्रै ‘सिजारस्पोर्टज’ले वाटमोर भारत जान नेपाल छाड्न चाहेको समाचार छापेको थियो। तर, क्यान स्रोतले भने वाटमोरले अन्य टिम वा देशसँग सम्झौता गरेको जानकारी नभएको बताएको छ।
मध्यम प्रदर्शन
६७ वर्षीय वाटमोरलाई गत डिसेम्बरमा नेपालको मुख्य प्रशिक्षको रूपमा नियुक्त गरिएको थियो। उमेश पटवालको राजीनामासँगै करिब १० महिनासम्म नेपाल मुख्य प्रशिक्षकविहीन भएपछि वाटमोरले पदभार सम्हालेका हुन्।
उनलाई प्रशिक्षकमा नियुक्त गरिनुको तीन कारण थियो- नेपाली टोलीलाई आईसीसी विश्वकप क्रिकेट लिग-२ बाट माथिल्लो खुड्किलोमा पाइला टेकाउनु, एकदिवसिय मान्यता कायमै राख्नु र २०२२ को टि २० विश्वकपमा प्रवेश गराउनु।
उनको प्रशिक्षणमा नेपालले गत बैशाखमा नेदरल्यान्ड्स र मलेसिया सम्मिलित त्रिकोणात्मक सिरिज खेलेको थियो। नेपालले उक्त सिरिजको फाइनलमा नेदरल्याण्ड्सलाई १ सय ४२ रनको फराकिलो अन्तरले हराउँदै उपाधि जितेको थियो।
तर, आईसीसी विश्वकप क्रिकेट लिग-२ अन्तर्गत पछिल्ला दुई खेलमा भने उनको प्रशिक्षणमा रहेको नेपाली टोलीले राम्रो प्रदर्शन गर्न सकेन। ती दुई खेलमा नेपालको ब्याटिङ र बलिङ दुवै नचल्दा ओमानसँग ५ विकेट र अमेरिकासँग ६ विकेटले पराजित भयो।
दुवै खेलमा बलिङ, ब्याटिङ र फिल्डिङ तीनै क्षेत्रमा नेपालको कमजोर प्रदर्शन रह्यो।
को हुन् वाटमोर ?
अस्ट्रेलियाका प्रशिक्षक वाटमोर गत जनवरीमा नेपाल आएका थिए। १९९६ मा नेपालले अन्तर्राष्ट्रिय क्रिकेट महासंघ (आईसीसी) को सदस्यता पाएपछि नेपाली राष्ट्रिय टोलीसँग जोडिएका उनी अहिलेसम्मकै ‘हाइप्रोफाइल’ प्रशिक्षक हुन्।
उनी १९९५ मा श्रीलंकाको राष्ट्रिय क्रिकेट टिमको प्रशिक्षक नियुक्त भएपछि यो देशको क्रिकेटमा कायपलट भएको थियो। उनले कप्तान अर्जुना रणतुङ्गासँग मिलेर पहिले 'हरुवा टिम'को छवी बनाएको श्रीलंकालाई एकदिवसीय क्रिकेटकै शक्तिशाली राष्ट्रको रुपमा चिनाए।
वाटमोर प्रशिक्षक नियुक्त भएको वर्ष दिनभित्रै श्रीलंकाले भारतमा भएको विश्वकपको उपाधि जितेको थियो। उनले ओपनरद्धय सनथ जयसूर्या र रमेश कलुविथरानालाई आक्रामक जोडीको रुपमा प्रशिक्षित गरेका थिए।
श्रीलंकालाई विश्वच्याम्पियन बनाएपछि उनी इंग्लिस काउन्टी क्रिकेट टिम लंकाशायरसँग आबद्ध भए। उनले त्यहाँ दुई राष्ट्रिय लिग र नेटवेस्ट ट्रफी पनि जिताएका थिए।
१९९९ को विश्वकपमा उनी फेरि श्रीलंका फर्किएका थिए। तर, पहिले जस्तो श्रीलंकाले सफलता पाउन सकेन। २००३ को विश्वकपमा भने उनको प्रशिक्षणमा श्रीलंका पुनः सेमिफाइनलमा पुग्यो।
उनले बंगलादेशलाई पनि प्रशिक्षण दिइसकेका छन्। उनको नेतृत्वमा २००५ मा बंगलादेशले जिम्बाब्वेविरुद्ध पहिलो टेष्ट म्याच जितेको थियो भने कार्डिफमा भएको एकदिवसीय क्रिकेटमा अष्ट्रेलियालाई हरायो। २००७ को विश्वकपमा बंगलादेश ‘सुपर–एट’ का लागि छनोट पनि भएको थियो।
बंगलादेश छाडेपछि उनी २००७ मा भारतको नेसनल क्रिकेट एकेडेमीको निर्देशक बने। उनले भारतको यू–१९ टिम पनि सम्हालिसकेका छन्।
२००८ मा मलेसियामा भएको यू–१९ विश्वकपमा भारतीय कप्तान विराट कोहलीको नेतृत्वमा उनले भारतलाई उपाधि दिलाउन सफल भए। २०१० र २०११ मा आईपीएल टिम कोलकाता नाइट राइडर्सको प्रशिक्षक बनेका वाटमोर ४ मार्च २०१२ मा पाकिस्तान टिमको पनि प्रशिक्षक नियुक्त भए। उनको प्रशिक्षणमा पाकिस्तानले एसिया कप जितेको थियो। २०२० फेब्रुअरीदेखि उनी सिंगापुर क्रिकेट टिमको मुख्य प्रशिक्षक थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
