फाइल तस्बिर
काठमाडौँ- आईसीसी क्रिकेट विश्वकप लिग-२ अन्तर्गत अमेरिकाविरुद्धको खेलमा नेपाल ५ विकेटले विजयी भएको छ। नेपालका लागि कुशल भुर्तेल र रोहित पौडेलले कीर्तिमानी ब्याटिङ गरेका छन्।
अमेरिकाले दिएको २३१ रनको लक्ष्य नेपालले ४९.३ ओभरमा भेट्टाएको छ। नेपालका लागि कुशल भुर्तेल र रोहित पौडेलले अर्धशतक पूरा गरे। कुशलले ८४ र रोहितले नटआउट ६२ रन बनाए।
कुशल भुर्तेल एकदिवसीय अन्तर्राष्ट्रिय (ओडीआई) मा ओपनिङमा आएर सर्वाधिक रन बनाउने खेलाडी बनेका छन्। उनले ९३ बल खेल्दा तीन चौका र तीन छक्का प्रहार गरे। उनको यो रन नेपालका तर्फबाट तेस्रो सर्वाधिक रन पनि हो। यसअघि पारस खड्काले सर्वाधिक ११५ र रोहित पौडेलले ८६ रन बनाएका छन्।
त्यस्तै रोहित पौडेल ओडीआईमा नेपालका तर्फबाट तीन वटा अर्धशतक बनाउने पहिलो ब्याट्स्म्यान बने। अहिलेसम्म नेपालका नौ जना ब्याट्स्म्यानले अर्धशतक बनाएका छन्। उनीबाहेक कप्तान ज्ञानेन्द्र मल्ल मात्र एकभन्दा बढी अर्धशतक बनाउने खेलाडी हुन्। आज रोहितले ८७ बलमा ३ छक्का र २ चौका प्रहार गरे।
आज अमेरिकाविरुद्ध कुशल भुर्तेल र आसिफ सेखले पहिलो विकेटको लागि कीर्तिमानी ६६ रनको साझेदारी गरे। नेपालका लागि यसअघि ज्ञानेन्द्र मल्ल र विनोद मण्डारीको सर्वाधिक ६१ रनको साझेदारी थियो।
नेपालका लागि कुशल र रोहितबाहेक विनोद भण्डारीले ३७, आसिफ सेखले २३ र ज्ञानेन्द्र मल्लले १७ रन बनाए। त्यसैगरी कुशल मल्ल १ रनमा बाहिरिए भने करण केसीले नटआउट १ रन बनाए। नेपालका ब्याट्स्म्यानले आठ छक्का र १० चौका हानेका थिए।
यसअघि टस जितेर ब्याटिङ गरेको अमेरिकाले मोनाङ्क पटेलको शतकको मद्दतमा ९ विकेटको क्षतिमा २३० रन बनाएको थियो। उसका लागि पटेलले ११४ बलमा १ छक्का र नौ चौका प्रहार गरे। तर, अरु ब्याट्स्म्यानले उल्लेखनीय प्रदर्शन गरेनन्।
सात राष्ट्र समावेश आईसीसी क्रिकेट विश्वकप लिग २ मा आजको जितपछि नेपाल पाँच खेलबाट ६ अंकसहित छैटौँ स्थानमा यथावत् छ। अमेरिका भने १३ खेलमा १२ अंकसहित दोस्रो स्थानमा छ।
अब नेपालले मंगलबार अंक तालिकाको शीर्ष स्थानमा रहेको ओमानसँग प्रतिश्पर्धा गर्नेछ। ओमानको १० खेलबाट १६ अंक छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
