फाइल तस्बिर : आईसीसी
काठमाडौँ– पपुवा न्यू गिनी (पीएनजी) विरुद्ध नेपाल पहिलो पटक एकदिवसीय अन्तराष्ट्रिय (ओडीआई) खेल्दैछ। यसअघि यी दुई देशले चार पटक ५० ओभरको क्रिकेटमा प्रतिस्पर्धा गरे पनि ती खेलले ओडीआईको मान्यता पाएका थिएनन्।
पीएनजीले नेपालभन्दा चार वर्षअगाडि ओडीआई खेल्न थालेको हो। उसले पहिलो पटक सन् २०१४ मा हङकङविरुद्ध ओडीआई खेलेको थियो। पहिलो ओडीआई नै उनीहरुले जितबाट सुरुआत गरेका थिए। अहिलेसम्म पीएनजीले २८ वटा ओडीआई खेलिसकेको छ।
पीएनजीबाट खेल्ने धेरै खेलाडीसँग नेपालका खेलाडीभन्दा बढी ओडीआई खेलेको अनुभव छ। पहिलो ओडीआई खेलेको टिमका असद भाला, टोनी उरा, लेगा सिआका, चार्ल्स अमिनी अहिले पनि राष्ट्रिय टोलीमा छन्। कप्तान असद भालाले २७ ओडीआई खेलेका छन्। त्यस्तै टोनी उराले २६, लेगा सिआकाले २५ र चार्ल्स अमिनीले १५ ओडीआई खेलेका छन्। सेस बाउले पनि २१ ओडीआई खेलिसकेका छन्। उसका सात खेलाडीले नेपालले खेलेको कुल १० ओडीआईभन्दा धेरै खेलेका छन्।
नेपालबाट पूरै १० वटा ओडीआई खेल्ने खेलाडी पाँच जना मात्र छन्। ज्ञानेन्द्र मल्ल, दीपेन्द्रसिंह ऐरी, आरिफ सेख, सन्दीप लामिछाने र पारस खड्काले मात्र सबै ओडीआई खेलेका छन्। तीमध्ये पारसले सन्यास लिइसकेका छन् भने दीपेन्द्रको गोलीगाँठामा चोट लागेका कारण आजको खेलमा उनी उपलब्ध नहुने निश्चित छ।
पीएनजीले खेलेका २८ मध्ये २१ ओडीआईमा पराजय बेहोरोको छ। उसले सात खेलमा मात्र जित हासिल गरेको छ। नेपालले भने पाँच खेलमा जित हासिल गरेको छ भने त्यति नै खेलमा हार बेहोरेको छ।
पीएनजीका तीन खेलाडीले ओडीआईमा शतक बनाएका छन्। तीन जना नै खेलाडी अहिले पनि टिममा छन्। उसका टोनी उराले ६ मार्च २०१८ मा आयरल्यान्डविरुद्ध नटआउट १५१ रन बनाएका थिए। नेपालविरुद्ध पनि उनले नै ‘ओपनिङ’ गर्ने संभावना छ।
कप्तान भालाले पनि २३ सेप्टेम्बर २०१९ मा नामिबियाविरुद्ध शतक बनाएका थिए। उनले हिजो भएको अमेरिकाविरुद्धको एक मात्र ओडीआईमा ६१ रनको अर्धशतकीय पाली खेलेका छन्। बलिङतर्फ उसका नोर्मान भानुआले सर्वाधिक ३४ र कप्तान भालाले २७ विकेट लिएका छन्। भानुआ भने अहिले टिममा छैनन्।
चार खेलमध्ये पीएनजी तीनमा विजयी
नेपालविरुद्ध खेलेका चार वटा ५० ओभरको खेलमा पीएनजी तीन पटक विजयी भएको छ। नेपालले एउटा खेल मात्र आफ्नो पक्षमा पारेको छ। यी दुई टिमबीच पहिलो भेट १६ वर्षअघि भएको थियो। अन्तिम खेल भने सन् २०१८ मा भएको थियो। सुरुका तीन खेलमा नेपाल लगातार पराजित भएको थियो, तर, अन्तिम पटकको भेटमा भने नेपाल विजयी भएको थियो।
अन्तिम पटक सन् २०१८ मार्चमा जिम्बाब्बेमा भएको आईसीसी विश्वकप छनौटमा नेपाल र पीएनजीबीच खेल भएको थियो। यो खेलमा नेपालले टस जितेर फिल्डिङ रोजेको थियो। सन्दीप लामिछाने र दीपेन्द्रसिंह ऐरीले चार-चार विकेट लिँदा पीएनजी ११४ रनमा नै समेटिएको थियो। दीपेन्द्रले अविजित ५० रन बनाएपछि नेपालले चार विकेट गुमाएर लक्ष्य भेट्टाएको थियो।
त्यसअघि सन् २०१५ मा आईसीसी विश्व क्रिकेट लिग च्याम्पियनसिप अन्तर्गत पीएनजीसँग नेपालले दुई खेल खेलको थियो। दोस्रो खेलमा नेपाल तीन विकेटले पराजित भएको थियो। टस जितेर ब्याटिङ गरेको नेपालले ८ विकेट क्षतिमा २२४ रन बनाएको थियो। तर, नेपालले जित हासिल गर्न सकेन।
पीएनजीसँगको पहिलो खेलमा पनि नेपाल दुई विकेटले पराजित भएको थियो। टस जितेर ब्याटिङ गरेको नेपालले आठ विकेट क्षतिमा २३२ रन बनाएको थियो। पीएनजीले खेल सकिन तीन बल बाँकी हुँदा लक्ष्य भेट्टाएको थियो।
यी दुई देशबीच पहिलो खेल भने सन् २००५ मा भएको थियो। विश्वकप छनौट श्रृङ्खला अन्तर्गत मलेसियामा भएको खेलमा नेपाल ७० रनले पराजित भएको थियो। नेपालको टिममा मेहबुब आलाम, विनोद दास, धिरेन्द्र चन्द, शक्ति गौचन, परेश लोहनी, मनोज वैश्य, दीपेन्द्र चौधरी लगायत खेलाडी थिए। उक्त प्रतिस्पर्धामा पारस खड्काले तेस्रो नम्बरमा ब्याटिङ गर्दै पहिलो अर्धशतक बनाएका थिए।
कमजोर पीएनजीविरुद्ध उदाउँदो नेपाल
अहिले नेपाल र पीएनजी नै आईसीसी वर्ल्ड क्रिकेट लिग–२ मा प्रतिस्पर्धा गरिरहेका छन्। सात टिम संलग्न यो प्रतियोगितामा अहिलेसम्म पीएनजीले आठ खेल खेल्दा कुनै पनि जित हासिल गर्न सकेको छैन। अंक तालिकामा पीएनजी पुछारमा छ।
नेपालले भने चार खेल खेल्दा दुईमा जित हासिल गरेको छ। चार अंकसहित नेपाल छैटौँ स्थानमा छ। तर, नेपाल सबैभन्दा कम खेल खेल्ने देश हो। सबैभन्दा बढी १२ खेल खेलेको अमेरिका १२ अंकसहित दोस्रो र १० खेल खेलेको ओमान १६ अंकसहित पहिलो स्थानमा छन्।
नेपालले डेढ वर्षदेखि ५० ओभरको खेल खेलेको छैन। तर, केही महिनाअघि कीर्तिपुरमा भएको नेदरल्याण्ड्स र मलेसियासहितको ‘ट्राइ नेसन सिरिज’ नेपालले जितेको थियो।
उता पीएनजी भने हिजो मात्र भएको अमेरिकासँगको खेलमा पराजित भएको छ। पहिला ब्याटिङ गरेको पीएनजी ४४.२ ओभरमा अलआउट हुँदै १५८ रन बनाएको थियो। उसका लागि तीन खेलाडीले मात्र दोहोरो अंकमा रन बनाए। अमेरिकाले २८.२ ओभरमा तीन विकेट गुमाउँदै लक्ष्य भेट्टाएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772091987.png)
-1772089410.png)
-1764146706.png)
