काठमाडौं- कोशी करिडोर २२० केभी प्रसारणलाइन आयोजनाको पहिलो खण्ड निर्माण सम्पन्न भएको छ। सुनसरीको इनरुवाबाट संखुवासभाको तुम्लिङटारसम्मको १०६ किलोमिटर २२० केभी डबल सर्किट प्रसारणलाइनको निर्माण सम्पन्न भएको हो। प्रसारणलाइनका लागि ३२६ वटा टावर निर्माण गरिएको छ।
प्रसारणलाइनको निर्माण सम्पन्न भएपछि अरुण र तमोर नदी जलाधार क्षेत्रमा निर्माण भएका र निर्माण हुने करिब दुई हजार मेगावाट जलविद्युत् आयोजनाहरुको विद्युत् प्रवाहका लागि पूर्वाधार तयार भएको प्राधिकरणका कार्यकारी निर्देशक कुलमान घिसिङले जानकारी दिए। लाइनलाई मंगलबारबाट ३३ केभीमा सञ्चालन (चार्ज) गरिनेछ।
‘इनरुवामा २२० केभीको सबस्टेसनको निर्माण पूरा नहुन्जेल लाइनलाई अस्थायी रुपमा ३३ केभीमा चार्ज गरी भोजपुर, संखुवासभा र तेह्रथुममा निजी क्षेत्रका आयोजनाबाट उत्पादित विद्युत् प्रवाह गरिनेछ,’ कार्यकारी निर्देशक घिसिङले भने, ‘यसले बर्खाको समयमा त्यस क्षेत्रका आयोजनले बेहोर्दै आएको प्रसारणलाइनको समस्या समाधान भएको छ।’
संखुवासभाको तिरतिरेमा अहिले रहेको ३३ केभी लाइनलाई कोशी करिडोर प्रसारणलाइनमा जोडी सुनसरीको धरान उपमहानगरपालिका-१७ स्थित चतरा-धरान ३३ केभी लाइनमा ल्याइने छ। तिरतिरे-वसन्तपुर-धनकुटा-धरान ३३ केभी प्रसारणलाइनको क्षमताले नपुग्दा भोजपुर, संखुवासभा र तेह्रथुममा सञ्चालित आयोजनाहरु बर्खाको समयमा पूर्णक्षमतामा चल्न सकिरहेका थिएनन्। आयोजनाहरुको जडित क्षमता करिब ३३ मेगावाट छ।
संखुवासभाको तुम्लिङ्टार तथा बानेश्वर र तेह्रथुमको वसन्तपुरमा गरी तीन वटा सबस्टेसनको निर्माण गरिएको आयोजना प्रमुख राजन ढकालले जानकारी दिए। ‘निर्माण चरणमा विभिन्न अवरोधहरु छिचोल्दै निरन्तरको प्रयासबाट सबैको साथ र सहयोगमा काम सक्न सफल भएका छौं,’ उनले भने, ‘निर्माणाधीन अन्य प्रसारणलाइन आयोजनाको तुलनामा ठूलो र लामो लाइन छिटो निर्माण सम्पन्न भएर रेकर्ड पनि कायम भएको छ।’
नेपाल सरकार, प्राधिकरण र भारतीय एक्जिम बैंकको सहुलियतपूर्ण ऋणमा प्रदेश १ का भोजपुर, संखुवासभा, तेह्रथुम र ताप्लेजुङमा निर्माण हुने जलविद्युत् आयोजनाको विद्युत् राष्ट्रिय प्रसारणलाइनमा जोड्न कोशी करिडोरको निर्माण गरिएको हो।
प्राधिकरणले निजी क्षेत्रका २८ आयोजनाको ५१६ मेगावाट विद्युत् यही प्रसारणलाइनमा जोड्नेगरी विद्युत् खरिद सम्झौता (पीपीए) गरिसकेको छ। ती आयोजना निर्माणको विभिन्न चरणमा छन्।
करिडोरको पहिलो प्याकेजमा इनरुवा-वसन्तपुर-वानेश्वर-तुम्लिङटार २२० केभी डबल सर्किट प्रसारणलाइन निर्माण गरिएको हो। यसको अनुमानित लागत तीन करोड ७५ लाख अमेरिकी डलर छ। दोस्रो प्याकेजमा इनरुवा, वसन्तपुर, वानेश्वर र तुम्लिङटारमा २२० केभीको सबस्टेसन निर्माण गरिएको छ। यो प्याकेजको अनुमानित लागत २ करोड ५३ लाख डलर छ।
तेस्रो प्याकेजमा वसन्तपुर-ढुंगेसाँघु (ताप्लेजुङ) ३५ किलोमिटर प्रसारणलाइन निर्माणका लागि ठेक्का सम्झौता भइ काम भइरहेको छ। एक सय ३२ वटा टावर निर्माण गर्नुपर्ने यस खण्डको काम आगामी माघभित्रमा सम्पन्न गर्ने लक्ष्य राखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766928868.png)
-1764146706.png)
-1766648928.png)
