काठमाडौं- अर्जेन्टिनाका फरवार्ड लियोनल मेसीले बार्सिलोनासँगको यात्रा टुङ्ग्याउने भएका छन्।
क्याटलान क्लब बार्सिलोनाले बिहीबार एक विज्ञप्ति जारी गर्दै मेसीसँग नयाँ सम्झौता हुन नसकेको जनाएको हो।
‘इबिजा बिच’मा छुट्टी मनाएर फर्किएका मेसीले आज ५ वर्षको नयाँ सम्झौता गर्ने जनाइएको थियो। तर, आर्थिक र संरचनागत अवरोधले यो हुन नसकेको क्लबले जानकारी दिएको छ।
‘अब मेसी बार्सिलोनामा रहने छैनन्,’ क्लबले जारी गरेको विज्ञप्तिमा भनिएको छ, ‘उनी र क्लब दुबैको सम्झौता गर्ने मनशाय रहेपनि यो सफल हुन सकेन।’
ला लिगाको नयाँ नियमअनुसार मेसी र बार्सिलाेनाबीच सहमति भएको तलब मान्य नरहेको बुझिएको छ। बार्सिलोना कोरोना महामारीका कारण आर्थिक समस्याबाट गुज्रिरहेको छ।
उसले आर्थिक भार कम गर्न खेलाडीको पारिश्रमिकसमेत कटौती गरेको थियो। यता, ला लिगाबाट भने बार्सिलोनाले केही आर्थिक सहयोग प्राप्त गर्नेछ।
अमेरिकी लगानीकर्ता संस्था ’सीभीसी’ले ला लिगामा लगानी गरेपछि हरेक क्लबले आर्थिक साहयता प्राप्त गर्न लागेका हुन्। यद्यपि, बार्सिलोना ला लिगाको नियमअनुसार आफ्नो खेलाडीको तलब स्केल घटाउनुपर्ने दबाबमा छ।
यसअगाडि मेसीले गत सिजनको अन्त्यसँगै आफ्नो सम्झौता सकिएपछि राष्ट्रिय टोलीमा ध्यान दिने जनाउँदै नवीकरण गर्न मानेका थिएनन्। तर, उनको मनस्थिति बदल्नका लागि ला लिगाको अन्तिम खेल अघि नै प्रशिक्षक रोनाल्ड कोएमनले छुट्टी दिइएका थिए।
यता, अर्जेन्टिना फरवार्ड तथा मिल्ने साथी सर्जियो अगुएरो बार्सिलोना आएपछि मेसी यहीँ बस्ने विश्वाससमेत गरिएको थियो। दुबैले उमेर समूहदेखि अर्जेन्टिनाका लागि सँगै खेल्दै आएका छन्। तर, दुबै खेलाडीले एकै क्लबकाे जर्सीमा खेलेको भने देख्न नपाइने भएको छ।
बार्सिलोनासँगको यात्रा टुङ्गिएसँगै मेसी फ्रेन्च क्लब पेरिस सेन्ट जर्मेन (पीएसजी) या प्रिमियर लिग क्लब म्यानचेस्टर सिटी जाने चर्चा चलेको छ। पीएसजीले यसअघि नै मेसीलाई प्रस्ताव गरिसकेको छ। त्यहाँ उनका मन मिल्ने साथी नेयमार र एन्जल डि मारिया छन्।
यता, एक सिजन अगाडि नै सिटीले पनि मेसीलाई अनुबन्ध गर्नका लागि बार्सिलोनासमक्ष गाब्रियल जिसस, बेर्नार्डो सिल्भा र एरिक गार्सिया र ८९.५ मिलियन युरो दिने अफर गरेको थियो।
यद्यपि, बार्सिलोनाले मेसीको ‘रिलिज क्लज’ ७ सय मिलिय युरो तोकेको थियो। ७ सय मिलियन युरो तिरेपनि बार्सिलोनाको अनुमति बेगर मेसीले क्लब छाड्न भने पाउने थिएनन्। त्यसैले उनी एक सिजन बार्सिलोनामै बस्न बाध्य भए।
अब सिटीले भित्र्याए प्रशिक्षक पेप ग्वार्डिओला र मेसीको पुनर्मिलन हुनेछ। ग्वार्डिओलाले बार्सिलोनामा मेसीलाई २००८ देखि २०१२ सम्म प्रशिक्षण दिएका थिए।
ग्वार्डिओला बार्सिलोनाको प्रशिक्षक रहँदा क्लबले लगातार सफलता हात पर्नुका साथै मेसीले आफूलाई विश्वस्तरीय खेलाडीको रुपमा स्थापित गरेका थिए।
त्यसबेला मेसीले आफ्नो खेलमा व्यापक सुधार गर्दै टोलीका साथै व्यक्तिगत सफलता हासिल गरेका थिए। ग्वार्डिओला र मेसी इतिहाद सर्ने विषयमा यसअघि नै छलफलमा थिए।
बार्सिलोनाको एकेडेमीमा हुर्किएका मेसीको अब भने ‘फ्री ट्रान्सफर’मार्फत् अन्य क्लब जाने बाटो खुलेको छ। तर, उनी सिटी, पीएसजी या अन्य कुन क्लबमा जाने छन् त्यो अहिल्यै नै पक्का भइसकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
