काठमाडौं- गत आर्थिक वर्ष काठमाडौं-तराई/मधेश द्रूतमार्ग (फास्ट ट्र्याक) सडक आयोजनामा लक्ष्यको ९७.३५ प्रतिशत खर्च भएको नेपाली सेनाले जानकारी दिएएको छ। सेनाले शुक्रबार पत्रकार सम्मेलन गरी उक्त जानकारी दिएको हो।
पत्रकार सम्मेलनमा आयोजना प्रमुख सहायक रथी विकास पोखरेलले द्रूतमार्गको आर्थिक वर्ष ०७७/७८ को वार्षिक कार्य प्रगति स्थिति तथा चालु आव ०७८/७९ को वार्षिक कार्यक्रमबारे जानकारी दिएका थिए। उनले गत आवमा आठ अर्ब ९६ करोड ८८ लाख रुपैयाँ विनियोजन भएकोमा वार्षिक ९७.३५ प्रतिशत खर्च भएको जानकारी दिए। आव ०७६/७७ सम्म समष्टिगत भौतिक प्रगति ११.११ प्रतिशत रहेकोमा गत आवमा थप ५.१० प्रतिशत काम सम्पन्न भएको उनले बताए। त्यस्तै आयोजनाको कूल कार्यको १६.२१ प्रतिशत प्रगति हासिल गर्ने लक्ष्य प्रक्षेपण गरिएकोमा १६.१० प्रतिशत प्रगति हासिल भएको उनले स्पष्ट पारे। अयोजनाको स्वीकृत डीपीआरअनुसार एक खर्ब ७५ अर्ब रुपैयाँ लागत अनुमान रहेकोमा आयोजनाको सुरुबाट हालसम्म कूल बजेट खर्च २५ अर्ब ३९ करोड रुपैयाँ भएको विवरण उनले प्रस्तुत गरेका थिए। आयोजनाको हालसम्मको भौतिक प्रगति १६.१० प्रतिशत रहेको आयोजना प्रमुख पोखरेलले बताए।
द्रूतमार्गको कूल लम्बाई ७२.५ किलोमिटरमध्ये तीन वटा सुरुङमार्गको जम्मा लम्बाई ६.४१ किलोमिटर, विभिन्न पुलहरुको लम्बाई १०.५९ किलोमिटर र सडकखण्डको लम्बाई ५५.५ किलोमिटर रहेको उनले जानकारी दिए। आयोजना प्रमुख पोखरेलले यसमध्ये आयोजनाको ४४.१ किलोमिटर सडकखण्डको सब ग्रेड लेभलसम्म तयार गर्न समष्टिगत माटो काट्ने/पुर्ने कार्यहरु हालसम्म ९० प्रतिशत सम्पन्न भएको बताए। आयोजनाको डिजाइन तथा कन्स्ट्रक्सन सुपरभिजनका लागि अन्तर्राष्ट्रिय परामर्शदाता आयोजना अवधिभरका लागि छनोट भई विषय विज्ञसहितको टोलीले फिल्ड सर्भे लगायतका कार्य सञ्चालन गर्न विभिन्न ठेक्का प्याकेजको टेन्डर डकुमेन्ट तयार गर्ने काम भइरहेको उनले बताए।
अयोजनामा पर्ने तीन सुरुङमार्ग महादेवटार, धेद्रे र लेनडाँडाँ सुरुङ खण्डमा प्रोजेक्ट म्यानेजर, विषय विज्ञहरुको डिजाइन टिम लगायतका समूहले कार्य प्रारम्भ गरेको उनले बताए। पुल निर्माणका लागि पनि ठेक्का सम्झौता भइसकेको उनले जानकारी दिए।
पहुँच मार्ग एवं बेलीवृज निर्माण कार्य पनि भइरहेको आयोजना प्रमुख सहायक रथी पोखरेलले बताए। नेपाली सेनाले आयोजनाको आवश्यकता अनुरुप पाँच हजार १७२ रोपनी जग्गा अधिग्रहणका लागि सूचना प्रकाशित गरिएकोमा चार हजार ७४५ रोपनी जग्गा प्राप्ति भएको र हालसम्म ४२७ रोपनी जग्गाको मुआब्जा वितरण गर्न बाँकी रहेको जनाएको छ। खोकना, बुङमती क्षेत्रसमेतका स्थानीय विवादका कारण बाँकी जग्गा प्राप्तिमा बाधा परेकाले निर्माण कार्यसमेत प्रभावित भएको सेनाको भनाइ छ।
.JPG)
आयोजनास्थलमा ११३ वटा रुख कटान गरिएको र चरणबद्ध रुपमा वृक्षरोपण कार्य भइरहेको आयोजना प्रमुख पोखरेलले बताए। उनले चालु आवका लागि आठ अर्ब ९३ करोड १० लाख रुपैयाँ विनियोजन भइ वार्षिक कार्यक्रम तय भएको उल्लेख गरे। चालु आवमा प्राथमिकताका आधारमा सडक तथा पुल खण्डसम्बन्धी बाँकी प्याकेजहरुको ठेक्का व्यवस्थापन गरी काम गर्ने योजना रहेको उनले बताए
आयोजना आर्थिक वर्ष ०८०/८१ मा सम्पन्न गरिसक्ने लक्ष्य राखिएको छ। यसको निम्ति आवश्यक बजेटको सुनिश्चितता हुनुपर्ने नेपाली सेनाको भनाइ छ। कोभिड-१९ महामारीका कारण आयोजनाको काम प्रभावित भएको तथा खोकना-बुङमती क्षेत्रका स्थानीय विवादले आयोजना प्रभावित भएकाले समाधानका लागि केन्द्रीय तहबाट पहल गरिनुपर्ने आयोजना प्रमुखले पोखरेलले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
.jpg)
-1763721444.png)
