काठमाडौं- प्रधानमन्त्री केपी शर्मा ओलीले नेपाल विद्युत् प्राधिकरणले निर्माण गरेको समुन्द्रटार-त्रिशूली ३ बी हब १३२ केभी डबल प्रसारणलाइन र सबस्टेसनको उद्घाटन गरेका छन्। शनिबार प्रधानमन्त्रीनिवास बालुवाटारबाट उनले नुवाकोटमा निर्माण भएको प्रसारणलाइन र १३२/३३ केभी समुन्द्रटार सबस्टेसनको ‘भर्चुअल’ माध्यमबाट उद्घाटन गरेका हुन्।
नुवाकोटको दुप्चेश्वर गाउँपालिकाको समुन्द्रटारबाट सुरू भई किस्पाङ गाउँपालिकामा निर्माणाधीन त्रिशूली ३ हब सबस्टेसनसम्मको २६ किलोमिटर प्रसारणलाइनले २७० मेगावाटसम्म विद्युत् प्रवाह गर्नसक्नेछ। यस लाइनमा जोडिने गरी तादी खोला र यसका सहायक खोलाहरूमा निजी लगानीमा ६० मेगावाटका १० वटा जलविद्युत् आयोजना निर्माणको विभिन्न चरणमा छन्।
२६ किलोमिटर प्रसारणलाइनमध्ये तीन किलोमिटर खण्ड मल्टिसर्किट छ। जसमध्ये दुई सर्किट लाइन जनताको जलविद्युत् कार्यक्रमअन्तर्गत विद्युत् प्राधिकरण र नेपाल टेलिकमको संयुक्त प्रवर्द्धनमा निर्माणाधीन ३७ मेगावाटको माथिल्लो त्रिशूली-३ ‘बी’ आयोजनाले उपयोग गर्नेछ।
समुन्द्रटार सबस्टेसनमा १३२/३३ केभीतर्फ दुई थान ३० एमभीए क्षमताका ट्रान्सफर्मर र ३३/११ केभीतर्फ दुई थान आठ एमभीए क्षमताका ट्रान्सफर्मर जडान गरिएको छ। १३२ तर्फ पाँचवटा बे र ३३ केभीतर्फ चारवटा बे उपकरण जडान गरी सञ्चालनमा ल्याइएको छ। सबै उपकरणलाई अत्याधुनिक सबस्टेसन अटोमेसन प्रणालीबाट नियन्त्रण गरिने प्राधिकरणले जनाएको छ।
सबस्टेसनबाट स्थानीय रूपमा पनि विद्युत् आपूर्ति गरिने भएकोले नुवाकोटको पूर्वी भेगमा विद्युत् भोल्टेजको सुधार र कटौतीमा रहेको समस्या समाधान हुनेछ। नेपाल सरकारको लगानी र एसियाली विकास बैंक (एडीबी) र युरोपेली लगानी बैंक (ईआईबी)को सहुलियतपूर्ण ऋणमा निर्माण भएको प्रसारणलाइन र सबस्टेसनको कूल लागत एक अर्ब ५५ करोड रूपैयाँ रहेको छ।
प्राधिकरणको आयोजना व्यवस्थापन निर्देशनालयअन्तर्गत प्रसारणलाइन निर्माणका लागि ईटीईआरएन सीसीसीई एफईपीईसी जेभी, चीनसँग १३ मंसिर २०७३ ठेक्का सम्झौता भएको थियो। सबस्टेसन ३३ रोपनी जग्गामा फैलिएको छ। प्रसारणलाइनको टावरका लागि २१ रोपनी र तारमुनि ९४८ रोपनी जग्गा उपयोग गरिएको छ।
बालुवाटारमा भएको कार्यक्रममा उपप्रधानमन्त्री एवं ऊर्जा, जलस्रोत तथा सिँचाइ मन्त्रालयकोसमेत जिम्मेवारी सम्हालेका अर्थमन्त्री विष्णुप्रसाद पौडेल, मुख्यसचिव शंकरदास बैरागी, ऊर्जा, जलस्रोत एवं सिँचाइ सचिव देवेन्द्र कार्की, प्राधिकरणका कार्यकारी निर्देशक हितेन्द्रदेव शाक्यलगायतको उपस्थिति थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
