काठमाडौं– बाढीका कारण भएको क्षतिको विवरण संकलन गर्न गएको प्राविधिक टोली मेलम्ची खानेपानी आयोजनाको मुहानसम्म पुग्न नसकी फर्किएको छ।
असार १ गतेको बाढीले आयोजनामा पुगेको क्षतिबारे अध्ययन गर्न गएको टोली बीचबाटै फर्किएको हो। आयोजनाका हेडवक्र्स (मुहान)सम्म पुग्ने लक्ष्यसहित सोमबार काठमाडौंबाट प्रस्थान गरेको टोली मुहानभन्दा पाँच किलोमिटर वरबाटै फर्किएको हो।
यसअघि शनिबार पनि आयोजनाको मुहानसम्म पुग्ने भनेर गएको प्राविधिक र विज्ञसहितको टोली मेलम्ची बजारभन्दा केहीमाथि पुगेर फर्किएको थियो।
सोमबार साँझ सिन्धुपाल्चोकको क्युलसम्म पुगेको टोली त्यहाँबाट अगाडि बढ्न नसकी काठमाडौँ फर्किएको मेलम्ची खानेपानी आयोजनाका प्रवक्ता राजेन्द्रप्रसाद पन्तले बताए। क्युलबाट मेलम्ची खानेपानी आयोजनाको मुहान पाँच किलोमिटरको दूरीमा छ।
आयोजनाको पुनर्निर्माणका लागि नेपाली सेना र सडक विभागसँग सहयोग मागेर मेलम्ची खानेपानी आयोजनाले पत्राचार गरिसकेको छ। मेलम्ची खानेपानी आयोजनाका अनुसार मुहानसम्म पुग्न विभिन्न भागमा गरी १० किलोमिटर सडक र चारवटा बेलिब्रिज निर्माण आवश्यक छ।
मुहानसम्म नपुगी बाढीले आयोजनामा पुर्याएको क्षतिबारे यथार्थ विवरण आउन नसक्ने प्रवक्ता पन्तले बताए। बाढी आउनुभन्दा एक दिनअघि सुरुङमार्ग बन्द गरिएकाले ठूलो क्षति हुनबाट भने जोगिएको उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782043740-1782045652.jpeg)
-1764146706.png)
