काठमाडौं- जनता समाजवादी पार्टी (जसपा)का संघीय परिषद् अध्यक्ष एवं पूर्वप्रधानमन्त्री बाबुराम भट्टराईले गण्डकीको सत्ता परिवर्तनअघि प्रदेश सभा सदस्य राजीव गुरुङ (दीपक मनाङे)सँग भेट भएकाे स्वीकार गरेका छन्।
कुनै पनि मान्छे जन्मजात अपराधी नहुने भन्दै रत्नाकर पनि वाल्मीकि बनेको प्रसंग उल्लेख गरेका छन्। 'राजीव गुरूङहरूले नयाँ जीवन र नयाँ भूमिका चाहन्छन् भने किन बञ्चित गर्ने? किन पूर्वाग्रह राख्ने?', भट्टराईले सामाजिक सञ्जाल फेसबुकमा लेखेका छन्।
उनले समाज/राज्यले मान्छेलाई अपराधी बनाउने समेत उल्लेख गरेका छन्। 'वर्गीय/जातिय/लैंगिक विभेद भएको समाजमा राज्य/समाजको वर्चस्वशाली तप्काले उत्पीडित/बहिष्कृत तप्कालाई सहजै ‘अपराधी’ बनाइदिन सक्छ।अत:अपराध/अपराधी एक सापेक्ष अवधारणा हो', भट्टराईले लेखेका छन्।
तर, एमाले नेता एवं तत्कालीन मुख्यमन्त्री पृथ्वी सुब्बा गुरुङलाई मनाङेले साथ दिँदा भट्टराईले यसविपरीत ट्विट गरेका थिए। उनले मनाङेलाई जोडेर मुख्मन्त्री गुरुङ र सत्तारुढ दललाई आलोचना गरेका थिए।
यद्यपि, अहिले स्वतन्त्र सांसद मनाङेले विपक्षी गठबन्धनलाई साथ दिँदा गण्डकी प्रदेशका कांग्रेसका कृष्णचन्द्र नेपाली पोखरेल मुख्यमन्त्री बनेका छन्। मनाङे पनि मन्त्री नियुक्त भएका छन्। अघिल्लो सरकारमा पनि मनाङे मन्त्री थिए। गण्डकीमा जसपा, कांग्रेस र राष्ट्रिय जनमोर्चाले सत्ता सहकार्य गरेका छन्।
यस्तो छ भट्टराईको भनाइ :
राजीव गुरुङ ( दीपक मनाङे) अहिले गण्डकी प्रदेशको मन्त्री बनेपछि र यसक्रममा मसँग पनि भेटेपछि मिडियामा विभिन्न टीकाटिप्पणी भएका छन्। यसलाई अन्यथा मान्नु हुन्न। मेरो सुविचारित र अनुभवजन्य मान्यता छ- कुनै पनि मान्छे जन्मजात अपराधी हुन्न। समाज/राज्यले मान्छेलाई अपराधी बनाउँछ। साथै वर्गीय/जातिय/लैंगिक विभेद भएको समाजमा राज्य/समाजको वर्चस्वशाली तप्काले उत्पीडित/बहिष्कृत तप्कालाई सहजै ‘अपराधी’ बनाइदिन सक्छ।अत:अपराध/अपराधी एक सापेक्ष अबधारणा हो।
मैले २०५९/०६० सालको दोश्रो वार्ताकालमा देशका विभिन्न जेल/बन्दीगृहको भ्रमण गरेपछि भनेको थिएँ- नेपालमा धेरै जेलमा बस्नुपर्ने मान्छे सत्ताको कुर्सीमा वा घरमा बसेका छन्;अनि खुला रूपमा रहनुपर्ने मान्छे जेलमा छन्। त्यही सोचका साथ आफू प्रम छँदा मैले जेलसुधारनिम्ति तत्कालीन सांसद देवी खड्काको संयोजकत्वमा एउटा उच्चस्तरीय आयोग बनाएको थिएँ,जसको प्रतिवेदन अझै कार्यान्वयन हुनसकेको छैन। रत्नाकर वाल्मीकि बनेको हामी सबैले सुनेकै छौं। त्यसैले राजीव गुरुङहरूले नयाँ जीवन र नयाँ भूमिका चाहन्छन् भने किन बन्चित गर्ने? किन पूर्वाग्रह राख्ने?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
