काठमाडाैं- नेपालका प्रारम्भिक ब्याट्सम्यान कुशल भुर्तेल अन्तर्राष्ट्रिय क्रिकेट परिषद् (आईसीसी) ‘प्लेयर अफ द मन्थ’ को मनोनयनमा परेका छन्। आईसीसीले अप्रिल महिनामा उत्कृष्ट प्रदर्शन गर्ने तीन खेलाडीलाई ‘प्लेयर अफ द मन्थ’ को मनोनयनमा सार्वजनिक गरेको हो।
मनाेनयनकाे उत्कृष्ट तीनमा पाकिस्तानका कप्तान बाबर आजम र पाकिस्तानकै प्रारम्भिक ब्याट्सम्यान फखर जमानसँगै कुशल परेका छन्। अब समर्थकले खुला मतदानमार्फत यी तीनमध्य एक खेलाडीलाई भोट गर्न सक्नेछन्।
कुशलले अघिल्लो साता नेपालको टी२० आई टोलीबाट डेब्यू गर्दै विश्व कीर्तिमानी प्रदर्शन गरेका थिए। उनले डेब्यूसहित लगातार तीन खेलमा अर्धशतक प्रहार गरेका थिए। कुशल सुरुवाती तीन खेलमा लगातार अर्धशतक प्रहार गर्ने पहिलो टि२० आई खेलाडीसमेत हुन्।
कुशलले नेदरल्यान्ड्सको खेलमा डेब्यू गर्दै ६२ रन बनाएका थिए। दोस्रो खेलमा मलेसियाविरुद्ध ६१ रन बनाएका थिए। तेस्रो खेलमा नेदरल्यान्ड्सँग कुशलले ६२ रन बनाउँदै लगातार तेस्रो अर्धशतक प्रहार गरेका थिए। चौथो खेलमा मलेसियासँग १६ र फाइनलमा उनले नेदरल्यान्ड्ससँग ७७ रन बनाएका थिए।
यता, पाकिस्तानका कप्तान आजमले दक्षिण अफ्रिकासँगकाे ओडिआई र टी२० आई सिरिजमा उत्कृष्ट प्रदर्शन गरेका थिए। दक्षिण अफ्रिकासँग अप्रिल २ मा पहिलो ओडिआई खेलमा उनले १ सय ३ रनको शतकीय इनिङ खेलेका थिए।
तेस्रो तथा निर्णायक ओडिआई खेलमा ९४ रनको महत्वपूर्ण इनिङ खेलेका थिए। त्यस्तै टी२० आई खेलमा १ सय २२ रनको कीर्तिमानी इनिङ खेलेका थिए।
उक्त खेलबाट १३ अंक बटुल्दै बाबरले आफ्नो करियरमै सबैभन्दा बढी ८६५ प्वाइन्ट बनाएका थिए। त्यस्तै, उनले दक्षिण अफ्रिकाविरुद्धको टी-२० शृंखलाको अन्तिम खेलमा ५९ बलमा १२२ रन बनाएका थिए।
अर्का ओपनर जमानले पनि दक्षिण अफ्रिकासँग दोस्रो र तेस्रो ओडिआई खेलमा लगातार शतक प्रहार गरेका थिए। दक्षिण अफ्रिकासँग दोस्रो ओडिआई खेलमा जमानले १ सय ९३ रनको उत्कृष्ट शतकीय इनिङ खेलेका थिए।
तेस्रो ओडिआई खेलमा १ सय १ रनको उत्कृष्ट शतकीय इनिङका साथ सिरिज जिताएका थिए।
यस अवार्डको विजेता आईसीसीकै प्यानल र खुला मतदानको मत अनुसार घोषणा हुनेछ। आईसीसीको प्यानलमा पूर्व खेलाडी, पत्रकार तथा ब्रोडकास्टरको उपस्थिति रहनेछ।
मनोनयनमा परेका खेलाडीलाई आईसीसीको वेबसाइटमा गएर भोट दिन सकिनेछ।
आईसीसी प्यानलको मतभार ९० प्रतिशत र खुला मतदानको १० प्रतिशत भार हुनेछ। दुवै जोडेर सर्वाधिक मत प्राप्त गर्ने खेलाडीले अवार्ड जित्नेछ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।