जसपामा महन्थ र राजेन्द्र पक्षले शुरु गर्‍यो सांसदको हस्ताक्षर संकलन

राजनीति

नेपाल लाइभ मंगलबार, वैशाख २१, २०७८ १३:२१

काठमाडौं- जनता समाजवादी पार्टी (जसपा) अध्यक्ष महन्थ ठाकुर र वरिष्ठ नेता राजेन्द्र महतो पक्षले आफूनिकट सांसदहरूको हस्ताक्षर संकलन थालेको छ। सोमबार जसपा केन्द्रीय कार्यालय बबरमहलमा आफूनिकट प्रतिनिधि सभाका सांसदहरूलाई बोलाएर उनीहरूले हस्ताक्षर गराएका हुन्।

काठमाडौं उपत्यकामा उपलब्ध सांसदहरूलाई पार्टी कार्यालयमा बोलाएर हस्ताक्षर गराएको जसपाका एक सांसदले बताए। ‘उपत्यकामा भएका सांसदलाई पार्टी कार्यालयमा बोलाएर हस्ताक्षर गराइएको छ। उपत्यका बाहिर भएका सांसदलाई तत्काल आउन निर्देशन दिइएको छ’, ती सांसदले भने, ‘जतिसुकै बेला जेपनि पर्न सक्ने भएकाले सांसदलाई काठमाडौं नछोड्न निर्देशन पनि दिइएको छ।’

जसपाका सांसद प्रमोद साहले सांसदहरूलाई बोलाएर बैठक बसेको पुष्टि गरे। ‘पार्टी कार्यालयमा सोमबार दिउँसो जसपा सांसद बसेर छलफल गरेको पक्का हो। म जिल्लामा भएकाले बैठकमा उपस्थित हुन सकिनँ', उनले भने, ‘खाली कागजमा सांसदलाई हस्ताक्षर गराएको होइन। केही न केही लेखेर होला।’

सांसदलाई खाली कागजमा हस्ताक्षर गरेर जाने भन्ने कुरा पुरै गलत भएको साहले दाबी गरे। ‘जनताको यति ठूलो प्रतिनिधि भइसकेपछि खाली कागजमा हस्ताक्षर गरेर जाने भन्ने कुरा हुँदैन। केही न केही लेखिएको थियो भन्ने सुनेको छु’ साहले भने, ‘तर, हस्ताक्षर गरिएको कागजमा के व्यहोरा लेखिएको थियो थाहा भएन।’

कुन प्रयोजनका लागि हस्ताक्षर गराएको भन्ने विषयमा साहले खुलाउन चाहेनन्। गत वैशाख १४ गते जसपाको बाबुराम भट्टराई र उपेन्द्र यादव पक्षले कार्यकारिणी समितिको बैठकमा १८ जना सांसदलाई हस्ताक्षर गराएका थिए।

उक्त बैठकले लुम्बिनी प्रदेशका जसपा चार जना सांसदलाई कारबाहीको निर्णय गर्नुका साथै प्रधानमन्त्री केपी शर्मा ओलीविरुद्धको अविश्वास प्रस्ताव प्रयोजनका लागि हस्ताक्षर संकलन गरेको बुझिएको छ।

तर, महन्थ-राजेन्द्र पक्षले बोलाएको बैठकमा कति जना सांसद सहभागी थिए सार्वजनिक गरिएको छैन। गत पुस ५ गते ओलीले प्रतिनिधि सभा विघटन गरेदेखि पुन:स्थापनासम्म आइपुग्दा जसपामा दुई खेमामा विभाजित हुँदै आएका छन्। महन्थ र राजेन्द्र पक्ष एकातिर उभिएका छन् भने बाबुराम-उपेन्द्र पक्ष अर्कोतिर छन्।

महन्थ र राजेन्द्र ओलीकै पक्षमा उभिएका छन् भने बाबुराम र उपेन्द्र पार्टी नै विभाजन गर्नुपरे गर्ने तर, ओलीलाई सहयोग गर्न नसकिनेमा पुगेका छन्। यही विषयलाई लिएर जसपा विभाजनको संघारमा पुगेको नेताहरू बताउँछन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

नेतन्याहु, ग्यालेन्ट र डिफविरुद्ध आईसीसीको पक्राउ पुर्जी जारी

यस्तो छ विदेशी मुद्राको विनिमय दर, कुनको बढ्यो, कुनको घट्यो?

मुग्लिन-पोखरा सडकको पूर्वी खण्डमा धमाधम कालोपत्र गरिँदै