काठमाडौं- देवेन्द्र बब्लु, गीत संगीतको क्षेत्रमा परिचय बनाउन तल्लीन छन्। गायक, गीतकार, निर्देशक- उनको प्रतिभाको दायरा फराकिलो छ।
देवेन्द्रले ‘भेटै हुन्न कि’, ‘मायाले नि के-के गर्च गर्च’, ‘मयालु’, ‘कसरी’, ‘म हाँसे हाँस्छौ र’ जस्ता चर्चित गीतहरूमा स्वर दिइसकेका छन्। साथै, उनले दर्जनौं गीतका शब्द लेखन र संगीत भर्ने काम गरेका छन्। अभिनयमा पनि उनी उत्तिकै रूचि राख्छन्।
रंगमञ्चमार्फत् कलाकारिता क्षेत्रमा प्रवेश गरेका देवेन्द्रले विभिन्न छोटा फिल्म निर्देशन र तिनमा अभिनय गरेका छन्। उनले ठूलो पर्दाको फिल्म ‘गणपति’मासमेत अभिनय गरेका छन्। छायांकन सकिएको फिल्म गणपतिले प्रदर्शन मिति भने तोकेको छैन। उनले केही म्युजिक भिडियोको निर्देशन गरिसकेका छन्।
देवेन्द्र लोक गायक प्रकाश सपुतका भाइ हुन्। उनी यतिखेर भने कोभिड-१९ सँगको लडाइँमा छन्। डेरामा एक्लो जीवन बिताइरहेका उनी कोरोनाबाट मुक्त हुन संघर्षरत छन्। उनका दाजु प्रकाश पनि कोरोना पोजिटिभ देखिएसँगै क्वारेन्टिनमा बसेका छन्।
देवेन्द्र भन्छन्, ‘दाइबाट मलाई सर्यो या मबाट दाइलाई, थाहै भएन। तर, अरूलाई नसरोस् भनेर सावधानी अपनाएका छौं।’
पहिलो चरणको महामारी र लकडाउन जन्मघरमा बिताएका उनी अहिले भने काठमाडौंमै छन्। कोरोना पोजिटिभ देखिएसँगै उनी ‘होम आइसोलेसन’मा बसेका छन्।
‘दुई दिनसम्म रातभर सुत्नै सकिएन। दिनभर पनि समस्या भएपछि परीक्षण गर्न अस्पताल पुगेँ। जे शंका थियो त्यही पुष्टि भयो। म पनि कोभिडबाट अछुतो रहन सकिनँ,’ उनले भने।
आइसोलेसनको एक्लो समय देवेन्द्रले कसरी बिताइरहेका छन्? उनले आफूले यो समयलाई सिर्जनात्मक काममा सदुपयोग गरिरहेको बताए।
देवेन्द्रको क्वारेन्टिन दैनिकी उनकै शब्दमाः
अहिले म डेरामा एक्लै बस्छु। दाजु र परिवारका अन्य सदस्य छुट्टै घरमा बस्नुभएको छ। यो एक्लो समयमा अन्य समयमा गर्न नपाएका कामहरू गरिरहेको छु।
दिनमै चारदेखि पाँच वटासम्म फिल्म हेर्छु। अन्य समयमा व्यस्त भएर एउटा फिल्मसमेत पूरा हेर्न पाइँदैनथ्यो।
लगातार धेरै फिल्म हेरेकाले मलाई कतिपय फिल्मको त कथा मात्रै याद छ, नामै याद छैन। यसबीचमा हेरेकामध्ये कथा र नाम दुवै याद भएको फिल्म ‘द वे होम’ हो। कोरियन भाषामा बनाइएको यो फिल्ममा एक बूढी हजुरआमा र नातीको जीवनलाई निकै रोचक तरिकाले देखाइएको रहेछ।
यही फुर्सदको समयमा म विभिन्न देशका लोक गीतहरूको मज्जा पनि लिइरहेको छु। एक त म्युजिक फिल्डको मान्छे भएकाले पनि अन्य देशमा कस्ता संगीत हुन्छन्, त्यताको ‘ट्रेन्ड’ कस्तो छ जान्न जरूरी हुन्छ। व्यस्तताले ती ट्रेन्ड थाहा पाउन सकिरहेको थिइनँ, अहिले फुर्सद मिलेका बेला विभिन्न देशका संगीत सुनिरहेको छु, त्यताको ट्रेन्ड जान्ने कोसिस गरिरहेको छु।
यीबाहेक संगीतको प्राक्टिस पनि गरिरहेको छु। केही नयाँ गर्ने सोचका साथ फुर्सदको समय उपयोग गरिरहेको छु।
क्वारेन्टिनमा बस्दाको यो फुर्सदिलो समयमा भागवत गीता पनि पढ्न पाएको छु। सकारात्मक ऊर्जाका लागि भागवत गीता निकै उत्तम रहेको छ। यसले जीवनमा आउने उतारचढावलाई कसरी सकारात्मक तरिकाले सल्टाउने, आफ्ना वरपर सकारात्मक सोचलाई कसरी कायम राख्ने भन्नेजस्ता कुरा सिकाइरहेको छ।
समय महामारीको भए पनि म यसलाई सिर्जनात्मक बनाउने कोसिसमा छु। यो फुर्सदिलो समयले आफैंभित्र चियाउने मौका मिलेको अनुभव गरिरहेको छु।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
