काठमाडाैं- न्यायका लागि मानवअधिकार सञ्जालले स्वास्थ्य आपतकाल घोषणा गर्न सरकारसँग माग गरेको छ। सञ्जालले कोभिड-१९ को दोस्रो लहरको बढ्दो प्रभावबाट नागरिकको जीवनरक्षा गर्न तत्काल स्वास्थ्य आपतकाल घोषणा गरी उपचारको व्यवस्था मिलाउन माग गरेको हो।
'विश्वव्यापी रुपमा द्रूतगतिमा फैलिरहेको कोभिड-१९ भाइरसको दोस्रो लहरको प्रकोप नेपालमासमेत गम्भीर रुपमा असर पुर्याउँदै फैलिरहेको र दैनिक हजारौं संक्रमित संख्या थपिँदै भाइरसका कारण नागरिकहरुले ज्यान गुमाउँदै गइरहेको अवस्थामा नागरिकको स्वास्थ्य उपचारमा सरकार तथा सरोकारवाला निकायहरु उदासिन भइरहेको र कतिपय अवस्थामा बिरामीले उपचार अभावको कारण ज्यान गुमाइरहनुपरेकोप्रति यो सञ्जालको गम्भीर ध्यानाकर्षण भएको छ,' सञ्जालका संयोजक इन्द्रप्रसाद अर्यालद्वारा आइतबार जारी विज्ञप्तिमा उल्लेख छ।
नेपालगन्जलगायतको सहरमा संक्रमितहरुको उपचारमा समस्या परेको, स्वास्थ्यकर्मीहरुले स्वास्थ्य समाग्रीको अभाव बेहोर्नुपरेको तथा संक्रमित स्वास्थ्यकर्मीहरु स्वयंले अन्य संक्रमितको उपचारमा संलग्न हुनुपर्दासमेत तिनै तहका सरकारले उचित चासो नदेखाएको भन्दै सञ्जालले आपत्ति जनाएको छ। निजी स्वास्थ्य संस्थाहरुलाई समेत न्यूनतम शुल्कमा संक्रमितहरुको उपचारका लागि उत्तरदायी बनाउन सञ्जालले माग गरेको छ।
'यसबाट नागरिक पूर्ण असुरक्षित रहेको तथा संघीय सरकारले उपचारका लागि अस्पतालको बेड उपलब्ध गराउन असमर्थ भएको भनी जारी गरेको अभिव्यक्तिले सरकार नागरिकप्रति अनुत्तरदायी रहेको प्रस्ट हुन्छ,' विज्ञप्तिमा भनिएको छ, 'यस्तो अवस्थामा नागरिकको जिउज्यानको रक्षाका लागि तुरुन्त स्वास्थ्य आपतकाल घोषणा गर्दै निजी स्वास्थ्य संस्थाहरुलाई समेत न्यूनतम शुल्कमा संक्रमितहरुको उपचारका लागि उत्तरदायी बनाउँदै सम्पूर्ण सरोकारवाला निकायहरुलाई नेपालको संविधानले व्यवस्था गरेको स्वास्थ्यसम्बन्धी मौलिक हकको सम्मान गर्न र भीडभाड आवतजावतमा नागरिकले समेत आफ्नो कर्तव्य निर्वाह गर्न यो सञ्जाल अनुरोध गर्दछ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
