काठमाडौ- कोरोना संक्रमणको दोस्रो लहर नेपालमा तीव्र गतिमा फैलिरहेको छ। बिहीबार ३५ जना संक्रमितको मृत्यु भयो, जुन संख्या नेपालमा एकै दिन मृत्यु हुने हालसम्मकै सबैभन्दा धेरै हो।
सोही दिन हालसम्मकै उच्च संक्रमण दरसमेत कायम भयो। कूल १२ हजार ५९७ जनाको पीसीआर परीक्षणमा ३८.३५ प्रतिशत अर्थात् चार हजार ८३१ जनामा संक्रमण पुष्टि भएको थियो।
नयाँ वर्ष सुरू भएयता संक्रमणको ग्राफ ह्वात्तै उकालो लागेको छ। संक्रमितसँगै दैनिक मृत्यु हुने र गम्भीर बिरामी थपिने क्रम पनि बढेको छ।
गत चैत महिनाको दोस्रो सातासम्म दैनिक रूपमा कोरोना संक्रमण हुने संख्या दोहोरा अंकमा सीमित थियो। भारतमा कोरोना संक्रमणको दोस्रो लहर फैलिन थालेपछि त्यसको असर नेपालमा पनि देखापर्न थालेको थियो। चैत तेस्रो सातादेखि दैनिक पुष्टि हुने संक्रमितको संख्या १०० भन्दा उकालो लागेर अहिले पाँच हजार नजिक पुगेको छ। करिब १४ हजार बराबरको परीक्षण हुँदा चार हजारभन्दा माथि संक्रमित देखिन थालेका छन्। यो करिब ३० प्रतिशत बराबर हो। अहिले १०० जनाको परीक्षण गर्दा औसतमा ३० जनामा कोरोना संक्रमण पुष्टि हुन थालेको देखिन्छ। यसले कोरोनाको फैलावट भयावह हुँदै गएको देखाउँछ।
नयाँ वर्ष (२०७८) सुरू हुँदा दैनिक ५०० को संख्यामा संक्रमित थपिँदै कोरोनाको ग्राफले उकालो चढेको थियो। पछिल्लो समय संक्रमण झन् उच्च दरमा बढ्दै गएको छ।
वैशाख १ गतेसम्म देशभर जम्मा चार हजार ५६ जनामात्रै सक्रिय संक्रमित थिए। तर, वैशाख १६ गतेसम्म आइपुग्दा यो संख्या झन्डै साढे पाँच गुणाले बढेको छ। वैशाख १६ गते (बिहीबारसम्म) सार्वजनिक भएको तथ्यांकअनुसार देशभर सक्रिय संक्रमितको संख्या ३४ हजार ११७ पुगेको छ।
स्वास्थ्य तथा जनसंख्या मन्त्रालयका अनुसार यसबीचमा कोरोना संक्रमणबाट मृत्यु हुनेको संख्यासमेत बढ्दै गएको छ। नेपालमा हालसम्म तीन हजार २४६ जनाले कोरोनाका कारण ज्यान गुमाइसकेका छन्।
स्वास्थ्य तथा जनसंख्या मन्त्रालयको तथ्यांकअनुसार वैशाख १ गतेयता मात्रै कोरोना संक्रमणबाट १९७ जनाको मृत्यु भएको छ। वैशाख १ देखि १६ गतेसम्मको अवधिमा ३६ हजार ५४६ जना कोरोना संक्रमित थपिएका छन्।
यस्तो छ वैशाख महिनाको तथ्यांकः
वैशाख १
वैशाख १ गते देशभर ५८० जना कोरोना संक्रमित थपिएका थिए। स्वास्थ्य मन्त्रालयका अनुसार देशभर चार हजार २८९ जनाको पीसीआर परीक्षण गर्दा ५८० जनामा कोरोना संक्रमण पुष्टि भएको थियो। उक्त तथ्यांकअनुसार त्यस दिन परीक्षण गरिएकामध्ये १३.५२ प्रतिशतमा संक्रमण पुष्टि भएको थियो।
काठमाडौं उपत्यकामा २५४ जना संक्रमित भेटिएका थिए। काठमाडौंमा १७३, ललितपुरमा ६१ र भक्तपुरमा २० जनामा संक्रमण पुष्टि भएको थियो। त्यस्तै कोरोना संक्रमण भएर ८० जना आईसीयू र २५ जना भेन्टिलेटरमा उपचाररत रहेका थिए। संक्रमणबाट पाँच जनाको मृत्यु भएको थियो।
वैशाख २
उक्त दिन ४९० जनामा संक्रमण पुष्टि भएको थियो। तीन हजार ५८८ जनामा गरिएको परीक्षणमा यो संख्यामा कोरोना पुष्टि भएको थियो। त्यस दिन कोरोना भाइरसको संक्रमणबाट पाँच जनाको मृत्यु भएको थियो।
वैशाख ३
उक्त दिन ८३६ जना संक्रमित पहिचान भएका थिए। पाँच हजार ५३७ जनाको पीसीआर परीक्षण गर्दा यो संख्यामा संक्रमण पुष्टि भएको थियो। उक्त दिन थपिएका संक्रमितमध्ये ३४८ जना काठमाडौं उपत्यकाका थिए।
काठमाडौंमा २८६, ललितपुरमा ४३ र भक्तपुरमा १९ जना संक्रमित थपिएका थिए। त्यस दिन कोरोना संक्रमणबाट देशभर चार जनाको मृत्यु भएको थियो।
वैशाख ४
उक्त दिन देशभर ७६८ जना कोरोना संक्रमित थपिएका थिए। पाँच हजार ३३३ जनाको पीसीआर परीक्षण गर्दा सो संख्यामा संक्रमण पुष्टि भएको थियो। त्यस दिन कोरोना संक्रमणबाट दुई जनाको मृत्यु भएको थियो। यसैगरी संक्रमितमध्ये १०० जना सघन उपचार कक्ष र ३८ जनाको भेन्टिलेटरमा उपचार भइरहेको थियो। काठमाडौं उपत्यकामा ३५ जनाको सघन उपचार कक्ष र २० जनाको भेन्टिलेटरमा उपचार भइरहेको थियो।
वैशाख ५
नेपालमा कोरोना भाइरस संक्रमणको दोस्रो लहर फैलिएयता पहिलोपटक वैशाख ५ गते एक हजारभन्दा बढीमा एकै दिन संक्रमण पुष्टि भएको थियो। उक्त यदिन देशभरका प्रयोगशालाहरूमा गरिएको पाँच हजार ८४ जनाको पीसीआर परीक्षणबाट एक हजार १५ जनामा संक्रमण पुष्टि भएको थियो। साथै, देशभर आठ जना संक्रमितको मृत्यु भएको थियो।
वैशाख ६
वैशाख ६ गते देशभर एक हजार २२७ जना संक्रमित थपिएका थिए। सात हजार एक जनाको पीसीआर परीक्षण गर्दा सो संख्यामा संक्रमित पहिचान भएका थिए। त्यस दिन कोरोना संक्रमणबाट देशभरमा गरी आठ जनाको मृत्यु भएको थियो।
वैशाख ७ गते
उक्त दिन देशभर एक हजार ६६७६ जना कोरोना संक्रमित थपिएका थिए। देशभरका प्रयोगशालामा आठ हजार ५५ नमूनाको आरटी–पीसीआर परीक्षण गर्दा सो संख्यामा संक्रमित थपिएका थिए। सो दिन ११ जनाको मृत्यु भएको थियो।
वैशाख ८
वैशाख ८ गते दैनिक थपिने संक्रमितको संख्या दुई हजार नाघेको थियो। त्यस दिन आठ हजार ८४४ जनाको पीसीआर परीक्षण गर्दा दुई हजार २२० जनामा कोरोना संक्रमण पुष्टि भएको थियो।
वैशाख ८ गते थपिएका संक्रमितमध्ये काठमाडौं उपत्यकाका मात्रै एक हजार ५१ जना रहेका थिए। काठमाडौंका ७८६, ललितपुरका १८१ र भक्तपुरका ८४ जनामा कोरोना संक्रमण पुष्टि भएको थियो। सो दिन कोरोना संक्रमणबाट ११ जनाको मृत्यु भएको थियो।
वैशाख ९
उक्त दिन देशभरबाट दुई हजार ३६५ जना संक्रमित थपिएका थिए। कूल १० हजार एक जनाको पीसीआर परीक्षणबाट उक्त संक्रमण पुष्टि भएको हो। त्यस दिन थपिएका संक्रमितमध्ये भक्तपुरका ८१, ललितपुरका १०६ र काठमाडौंका ९८७ जना थिए। सो दिन पाँच जना संक्रमितको मृत्यु भएको थियो।
वैशाख १०
उक्त दिन देशभर दुई हजार ४४९ जना कोरोना संक्रमित थपिएका थिए। आठ हजार ७९८ जनाको पीसीआर परीक्षण गर्दा उक्त संख्यामा संक्रमण पुष्टि भएको थियो। त्यस दिन कोरोना संक्रमणबाट थप पाँच जनाले ज्यान गुमाएका थिए।
वैशाख ११
वैशाख ११ गते देशभर दुई हजार ४८६ जना कोरोना संक्रमित थपिए। देशभर सात हजार ५२५ जनाको पीसीआर परीक्षण गर्दा ती संक्रमित पहिचान भएका थिए। त्यस दिन १४ जना संक्रमितको मृत्यु भएको थियो।
वैशाख १२
वैशाख १२ को दिन तीन हजार ३२ जनामा संक्रमण पुष्टि भएको थियो। त्यस दिन देशभर नौ हजार २९२ जनाको पीसीआर परीक्षण भएका थिए। उक्त दिन २८ जनाको मृत्यु भएको थियो।
वैशाख १३
उक्त दिन तीन हजार ४४२ जनामा कोरोना संक्रमण पुष्टि भएको थियो। कूल १२ हजार ४०० जनाको पीसीआर परीक्षण गर्दा उक्त संखयामा संक्रमित भेटिएका थिए। उक्त दिन १२ जना संक्रमितको मृत्यु भएको थियो।
वैशाख १४
उक्त दिन देशभरका प्रयोगशालाहरूमा गरिएको पीसीआर परीक्षणका क्रममा चार हजार ३६४ जनामा संक्रमण पुष्टि भएको थियो। त्यस दिन १४ हजार ६७२ जनाको पीसीआर परीक्षण गरिएको थियो। त्यस दिन संक्रमणबाट १८ जनाको मृत्यु भएको तथ्यांक छ।
वैशाख १५
उक्त दिन चार हजार ७७४ जनामा कोरोना संक्रमण पुष्टि भएको थियो। देशभरका प्रयोगशालाहरूमा १४ हजार ८३४ जनाको पीसीआर परीक्षण गर्दा ती संक्रमित पहिचान भएका थिए। उक्त दिन १७ जनाको मृत्यु भएको थियो।
वैशाख १६
यस दिन हालसम्मकै उच्च दरमा संक्रमित थपिएका थिए। कूल १२ हजार ५९७ जनाको पीसीआर परीक्षणमा चार हजार ८३१ जनाको नतिजा पोजिटिभ आएको थियो। सोही दिन ३५ जना कोरोना संक्रमितको मृत्यु हुँदा नेपालमा एकै दिन सबैभन्दा धेरै संख्यामा मुत्यु हुने रेकर्ड बनेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
