काठमाडौं- बाँकेमा कोरोना संक्रमितको संख्या अहिले उकालो लागिरहेको छ। लुम्बिनी प्रदेशकै धेरै संक्रमित भएको जिल्लाको रुपमा बाँके देखिएको छ। बाँकेमा मंगलबार मात्र १८४ जना संक्रमित थपिएका छन्।
यो सँगै २६४४ जना सक्रिय भएका छन्। यीमध्ये ३०१ जना लक्षणसहितका संक्रमित रहेका छन्। उनीहरूलाई आइसोलेनमा राखिएको छ। बाँकेको धेरै प्रभावित क्षेत्रमा नेपालगञ्ज उपमहानगरपालिका र कोहलपुर नगरपालिका अग्रपंक्तिमा देखिएको छ।
बाँकेका ८ स्थानीय तहमध्ये सबैमा संक्रमित देखिएका छन्। यसरी संक्रमित सबै क्षेत्रमा पुग्नुमा भारतसँगको सीमा जोडिनुलाई प्रमुख कारण मान्छन् स्थानीय तहका जनप्रतिनिधिहरू। प्रभावितमध्येको एक क्षेत्र खजुरा गाउँपालिका पनि हो। खजुरा गाउँपालिकामा हालसम्म ५३५ जनामा कोरोना संक्रमण पुष्टि भएको छ भने ८ जनाले ज्यान गुमाएका छन्।
नयाँ भेरियन्टको संक्रमणसँगै यो गाउँपालिकामा मंगलबारसम्म १४९ जना संक्रमित थपिएका छन् भने ५ जनाले ज्यान गुमाएका छन्। पहिलो लहरमा ३ जनाले मात्र ज्यान गुमाएका थिए। दोस्रो लहर शुरु भएको छोटो अवधिमै धेरै गम्भीर प्रकारका संक्रमित फेला परेको र भारतबाट नेपाल आएका ३ जना र समुदायमा संक्रमण फैलिएर २ जनाले ज्यान गुमाएको उपाध्यक्ष एकमाया विकले बताइन्।
एकैपटक गम्भीर संक्रमित फेला परे
उपाध्यक्ष विकका अनुसार अघिल्लो महिनासम्म सामान्यतिर गइरहेको गाउँपालिकाको अवस्था अहिले जटिलतातर्फ उन्मुख छ। कोरोनाको पहिलो लहर समाप्त भएर सामान्य दैनिकीमा फर्केको खजुरामा भारतमा एक्कासी बढेको संक्रमणको प्रभाव परेको उनले बताइन्। अघिल्लोपटक सामान्य रुघाखोकी र ज्वरो मात्र देखिने गरेकोमा योपटक धेरै गम्भीर खालका बिरामी देखा परेको उमपेयर विक बताउँछिन्।
गाउँपालिकाले बनायो ६० बेडको आइसोलेन
गम्भीर प्रकारका संक्रमित देखा पर्न थालेपछि गाउँपालिकाले ६० बेडको आइसोलेन सेन्टर निर्माण अघि बढाएको छ। बिरामी बढ्दै गएको र सबैलाई भेरी अस्पताल पठाउन सम्भव नभएकाले गाउँपालिकाको आफ्नै आइसोलेन बनाएको उनले बताइन्।
उनका अनुसार गाउँपालिकाले वडा १ मा १० बेडको र पालिकास्तरीय ५० बेडको आइसोलेन सेन्टर सञ्चालनको तयारी गरेको छ। हालैमात्र भेरी अस्पतालले एक जना चिकित्सक पठाएको र अब दैनिक रुपमा संक्रमितको उपचार हुने उपाध्यक्ष विकले नेपाल लाइभलाई बताइन्।
पालिकास्तरीय आइसोलेलनका लागि सुशील कोइराला प्रखर क्यान्सर अस्पतालको सहयोग लिइएको छ। गाउँपालिकाले बनाएको आइसोलेनमा अहिलेसम्म संक्रमित राखिनसकेको भन्दै उनले अब चिकित्सक आएकाले शुरु हुने बताइन्।
‘अक्सिजनको आवश्यकता परेका बिरामीलाई गाउँपालिकाको आइसोलेसनमा राख्ने, गम्भीर भएमा भेरी अस्पताल पठाउने तयारी गरेका छौ्र’ उनले भनिन्, ‘अहिलेसम्म सबै संक्रमित होमआइसोलेनमा रहेका छन्। अब लक्षण देखिएकाहरूलाई पालिकाको आइसोलेनमा ल्याउने छौं।’
योपटक कन्ट्याक्ट ट्रेसिङ नगरिने
अघिल्लो पटक गाउँपालिकाले कन्ट्याक्ट ट्रेसिङ गरेपनि योपटक यस्तो अभियान नभएको उनले बताइन्। ‘अहिले कन्ट्याक्ट ट्रेसिङ छैन। शंका लागेका व्यक्तिहरूलाई भेरी अस्पतालमै पठाएर पीसीआर परीक्षण गराउने गरेका छौं’ उनले भनिन् ‘तर, अब बढ्दै जाने भएकाले पालिकामै स्वाब संकलनको काम थाल्ने तयारी गरेका छौं।’ अवस्था थप जटिल भएमा क्यान्सर अस्पतालमा जनशक्ति प्रयोग गरेर स्वाब संकलन गर्ने छलफल चलिरहेको उनले बताइन्।
रुघाखोकी र ज्वरोका बिरामी बढे
पालिकाभित्र रुघाखोकी र ज्वरोका बिरामी दैनिक रूपमा वृद्धि भएकाले जोखिम नजिकै रहेको अनुमान आफूहरूले गरेको उनले बताइन्। ‘रुघाखोकी र ज्वरोको बिरामी धेरै देखिएको छ। सुरक्षित भएर घरमै बस्न आग्रह गरेका छौ्र’ उनले भनिन् ‘अब परीक्षण गर्दै संक्रमित र संक्रमित नभएका व्यक्तिहरू अलग गर्दै लैजान्छौं।’
गाउँपालिकाले अहिले कोरोना पोजेटिभ भएका व्यक्तिहरूसँग नियमित सम्पर्क गरिरहेको छ। पालिकाले महिला स्वयंसेविका र जनप्रतिनिधिहरूलाई यसको जिम्मेवारी दिएको उनले बताइन्। ‘जनप्रतिनिधिहरूले गाउँमा नयाँ व्यक्तिको प्रवेशदेखि संक्रमित भएका व्यक्तिहरूको अवस्था अनुगमन गरि पालिकामा जानकारी गराउने गर्नु भएको छ’, उनले भनिन् ‘महिला स्वयंसेविकाहरूलाई संक्रमितको स्वास्थ्य अवस्थाको रिपोर्ट बनाउनेदेखि अस्पतालसम्म लैजान सहयोग गर्ने जिम्मेवारी दिइएको छ।’
खुला सीमाका कारण भित्रियो कोरोना
पालिकाको १ नम्बर वडा भारतसँग खुला सिमाना जोडिएको र उक्त क्षेत्रबाट अघिल्लो लकडाउन खुलेसँगै संक्रमित भित्रिएको उनको बुझाइ छ। ‘सरकारले अघिल्लोपटक लकडाउन गर्दा पालिकामा संक्रमित थोरै मात्र थिए’ उनले भनिन् ‘जब खुल्ला भयो अनि भारतसँग सहज आऊजाऊ भयो। भारतका शहरहरूमा वृद्धि भएसँगै उता मजदूरी गर्न गएकाहरू फर्के। त्यसले कोरोना समुदायसम्मै फैलियो।’
निषेधाज्ञा पालना गरिदिन आग्रह
जिल्ला प्रशासन कार्यालय बाँकेले संक्रमण दर बढेसँगै जिल्लाभर निषेधाज्ञा जारी गरेको छ। मंगलबार रातिबाट निषेधाज्ञा जारी गरेकाले अब संक्रमण केही रोकिने आश गर्न सकिने गाउँपालिका उपाध्यक्ष विकले बताइन्। पालिकाले अहिले सीमा सुरक्षाकर्मीसँग सहकार्य गरेर नाकामा कडाई गरिरहेको छ। नाकाबाट भित्रने मानिसहरूलाई परीक्षण गरेर मात्र पठाउने अनि पोजेटिभ देखिएमा पालिकाको आइसोलेनमा राख्ने व्यवस्था मिलाएको उनले बताए।
भोलि भयावह अवस्था नहोस् भनेर अहिले निषेधाज्ञा गरिएकोले अब जनताले पनि बुझेर यसलाई रोक्न सहयोग गर्नुपर्ने उनले बताइन्।
‘भारतीय मानिस यता आउने, यताका मानिस उता जाने कार्यलाई नियन्त्रण नगरी नहुने भएकाले निषेधाज्ञाले केही संक्रमण रोक्न सक्छ’, उनले भनिन्, ‘एक हप्ताको अवस्था हेरेर पालिकाले फेरि के गर्ने निर्णय गर्ने छ।’
परीक्षणको दायरा वृद्धि गर्नका लागि जिल्ला प्रशासनसँग समन्वय गरिरहेको उनले बताइन्। संघ र प्रदेशबाट सहयोग मागिएको भन्दै उनले अब सबैको सहयोगमा नियन्त्रण गनुपर्ने अवस्था आएको उनले बताइन्।
सहयोगका लागि नागरिकसँग आग्रह
उपाध्यक्ष विकले जनतालाई एकदमै जरुरी कामबाहेक घरबाहिर ननिस्किन आग्रह गरेकी छन्। अनावश्यक रुपमा भीड नगरिदन उनको आग्रह छ। विश्व स्वास्थ्य संगठनले बनाएको मापदण्ड पालना गर्न आग्रह गर्दै उनले सकेसक्म आफ्नै घरमा बस्न र मास्क लगाएर मात्र भेटघाट गर्न आग्रह गरिन्। ‘७० प्रतिशत संक्रमण मापदण्ड पालना गरेमा घट्न सक्ने भएकाले गाउँका सबै मानिसलाई यसको ख्याल गर्न आग्रह गर्दछु’, उनले भनिन्, ‘आफू र आफन्त सबैको स्वास्थ्यको ख्याल गरौं।’
स्वास्थ्यकर्मी नै संक्रमित हुन थालेपछि चुनौती
अहिले स्वास्थ्यकर्मीहरू नै संक्रमित हुन थालेपछि समस्या देखा परेको उनले बताइन्। पालिकामा सीमित स्वास्थ्यका कर्मचारी भएको र उनीहरू नै संक्रमित हुँदा समस्या भएको उनले बताइन्। गाउँपालिकाका एक÷दुई जना कर्मचारीलाई नै संक्रमण देखा परेको उनले बताइन्।
गाउँ–गाउँमा स्वास्थ्य अवस्था जानकारी लिनेदेखि औषधि वितरणसम्म जाने जनशक्तिको अभाव हुने अवस्था आउने डर रहेको उनले बताइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
