काठमाडौं- नेपाल चिकित्सक संघले कोरोना नियन्त्रण, रोकथाम र उपचारका लागि स्वास्थ्य संकटकाल घोषणा गर्ने लगायतका १८ बुँदे सुझाव दिएको छ। संघको कार्यालयमा सोमबार भएको विज्ञहरूसँगको छलफलपछि संघले १८ बुँदे सुझाव सार्वजनिक गरेको हो।
संघले कोरोना संक्रमण बढी देखिएका जिल्लाहरूमा स्वास्थ्य संकटकाल घोषणा गर्दै उक्त जिल्लामा लकडाउन गरेर संक्रमितको सहज उपचारको व्यवस्था गर्न सरकारलाई सुझाव दिएको छ। संघले सरकारी अस्पताल, मेडिकल कलेज तथा निजी अस्पतालहरूसँग समन्वय गरि इलेक्टिभ सर्जरी तथा नियमित स्वास्थ्य परीक्षणलाई बन्द गर्दै कोभिड-१९ को उपचारमा अस्पतालका वार्डलाई प्रयोग गर्नुपर्ने साथै अस्पतालमा बेड अक्सिजन र एचडीयूको संख्या तुरुन्त थप गर्नुपर्ने माग पनि राखेको छ।
यस्ता छन् संघका १८ बुँदे सुझावसहितका माग :
नेपाल सरकारले सम्बोधन गर्नु पर्ने बुँदाहरू :
१) नेपालमा पनि 'सेकेण्ड वेभ' आइसकेर कोभिडको नयाँ भेरियन्ट प्रमाणित समेत भई धेरै नागरिकहरुले मृत्युवरण गर्नु परिरहेको परिस्थितिलाई गम्भीर रूपमा लिँदै दिन प्रतिदिन संक्रमितको संख्या बढ्दै गएको, स्वास्थ्यकर्मी तथा चिकित्सकहरू नै संक्रमित भएको तथा अस्पतालका बेडहरु समेत कोभिड-१९ का कारण बिरामीहरुले भरिएकाले नेपाल सरकारले अबिलम्ब बढी संक्रमित भएका जिल्लाहरुमा मेडिकल इमरजेन्सी घोषणा गरि बन्दाबन्दी गर्दै नागरिकहरुको स्वास्थ्य उपचारलाई सहज बनाउनु पर्ने।
२) सरकारी अस्पताल, मेडिकल कलेज तथा निजी अस्पतालहरुसँग समन्वय गरि Elective Surgery (इलेक्टिभ सर्जरी) तथा नियमित स्वास्थ्य परीक्षणलाई बन्द गर्दै कोभिड-१९ को उपचारमा अस्पतालका वार्डलाई प्रयोग गर्नुपर्ने साथै अस्पतालमा बेड अक्सिजन र एचडीयूको संख्या तुरुन्त थप गर्नुपर्ने।
३) कोभिड अस्पताल घोषणा गरि संक्रमितहरुलाई छुट्टै उपचार गर्नु पर्ने।
४) स्वास्थ्य संस्थालाई भौतिक तथा प्राविधिक रुपमा सबल र सक्षम बनाउनु पर्ने साथै कोभिड–१९ को उपचारमा प्रयोग हुने सामग्रीहरुको सहज उपलब्धता गराउनु पर्ने।
५) कोभिडमा काम गरेका चिकित्सक तथा स्वास्थ्यकर्मीहरुको स्वास्थ्यको जिम्मा नेपाल सरकारले लिने र घोषणा गरिएको जोखिम भत्ता तथा बीमालाई प्रभावकारी रुपमा लागू गरिनु पर्ने।
६) सार्वजनिक स्थानहरुमा स्वास्थ्यका मापदण्डको पालनालाई कडाईका साथ लागू गर्नुपर्ने र भीडभाड हुने स्थान र जोखिमयुक्त क्षेत्रहरु बन्द गर्नु पर्ने।
७) फ्रन्टलाइनमा काम गर्ने स्वास्थ्यकर्मी एवं चिकित्सकहरु कोभिड-१९ विरुद्धको खोपबाट अझै पनि वञ्चित रहेको हुँदा कोभिड-१९ विरुद्धको खोप यथाशीघ्र उपलब्ध गराउनु पर्ने।
८) चिकित्सक तथा स्वास्थ्यकर्मीहरुको दरबन्दी न्यून भएको हुनाले सो दरबन्दी तुरुन्त थप गर्नुपर्ने र चिकित्सक र स्वास्थ्यकर्मीहरुलाई आवश्यक पर्ने पीपीई र कोभिड-१९ सम्बन्धी तालिम दिनुपर्ने।
९) कोभिड-१९ को दोश्रो वेब समुदायमा पनि फैलिसकेको हुनाले पोजिटिभ देखिएका केसहरुका कन्ट्याक्ट ट्रेसिङ गरि टेस्टको दयारा बढाउनु पर्ने र हटस्पट भएको ठाँउहरुमा फ्री आरटीपीसीआर गरी पोजिटिभ देखिएका केसहरुलाई आइसोलेसनको उचित व्यवस्था मिलाउनु पर्ने।
१०) कोभिड-१९ आइसकेपछि शुरु गरिएका स्वास्थ्यका कार्यक्रम तथा योजनाहरु यथाशीघ्र कार्यान्वयन गर्नुपर्ने।
११) दीर्घ रोगका उपचारमा रहेका बिरामीहरुको सहज उपचारका लागि छुट्टै उपचारको व्यवस्था गर्नुपर्ने।
सर्वसाधारण नागरिकहरुका लागि :
१) बाहिर निस्कँदा मास्कको प्रयोग गर्ने, साबुन पानी वा स्यानिटाइजरले हात धुने र बालबालिकाहरु तथा परिवारका अन्य सदस्यहरुलाई पनि मास्कको उचित प्रयोग गर्न लगाउने।
२) भीडभाड नगर्ने तथा भीडभाड भएको स्थानमा नजाने, भोज भतेर तथा पार्टीहरुमा नेपाल सरकारको मापदण्डलाई पूर्ण रूपमा पालना गर्ने।
३) आफ्नो पालो अनुसार कोभिड-१९ का विरुद्ध भ्याक्सिन लिने र सुरक्षाका उपायहरु नियमित रूपमा प्रयोग गर्ने।
४) कोभिड–१९ बाट संक्रमित व्यक्तिको सम्पर्कमा आएको अवस्थामा सतर्कता अपनाई आइसोलेसनमा बस्ने।
५) ज्वरो, रुघाखोकी अथवा सास फेर्न कठिनाई भएको अवस्थामा तुरुन्त कोभिडको परीक्षण गराई उपयुक्त उपचार गर्ने गराउने।
चिकित्सक तथा स्वास्थ्यकर्मीहरुका लागि :
१) स्वास्थ्यका मापदण्ड अनिवार्य रूपमा अपनाएर, सुरक्षाका सामग्रीहरु सही ढंगबाट प्रयोग गरी आफू सुरक्षित रही आ-आफ्नो कार्यक्षेत्रमा जिम्मेवारीका साथ काम गर्न गराउनु पर्ने।
२) चिकित्सक तथा स्वास्थ्यकर्मीहरूले कोभिड भेरियन्टको बारेमा आम नागरिकलाई सुसूचित गराउनका लागि आ-आफ्नो ठाउँबाट आवश्यक पहल गर्ने।
नेपाल सरकारले देशभरका चिकित्सक तथा स्वास्थ्यकर्मीहरुलाई क्षमतावान बनाउनु पर्ने अत्यन्त जरुरी अवस्थालाई समेत नजरअन्दाज गरेको अवस्थामा समेत हामी सम्पूर्ण चिकित्सक तथा स्वास्थ्यकर्मीहरुले आफ्नो ज्यानको सुरक्षाका निम्ती सजगता अपनाउँदै नागरिकहरुको स्वास्थ्य सेवा प्रवाहमा खटिन यस संघ सबैमा हार्दिक अपिल गर्दछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
