कैलाली- सुदूरपश्चिम प्रदेशमा कोरोना भाइरसको संक्रमण दर तीव्ररूपमा बढ्दै गएपछि अस्पतालहरू संक्रमितले भरिएका छन्। सरकारी मात्रै नभएर निजी अस्पताल समेत कोरोनाको जस्तै लक्षण भएका बिरामीले भरीभराउ भएका छन्।
कोभिड-१९ का गम्भीर प्रकृतिका बिरामीको उपचार सुदूरपश्चिममा सेती प्रादेशिक अस्पताल र महाकाली अस्पतालमा मात्रै भइरहेकोमा दुवै अस्पताल संक्रमितले भरिएपछि थप बिरामी राख्नै नसकिने अवस्था आएको छ।
सेती प्रादेशिक अस्पतालका सूचना अधिकारी दिलिपकुमार श्रेष्ठले अहिले सेती प्रादेशिक अस्पतालमा ५४ जना संक्रमितको उपचार भइरहेको बताए। उनले जसमध्ये तीन जनाको भेन्टिलेटर र ११ जनाको आईसीयूमा राखेर उपचार भइरहेको बताउँदै २५ जना कोरोना संक्रमितको अक्सिजन दिएर उपचार भइरहेको बताए। त्यस्तै, मध्यम तथा कडा खालका १५ जना संक्रमितलाई मोडरेटमा राखिएको सूचना अधिकारी श्रेष्ठले जानकारी दिए।
प्रदेशमा गम्भीर प्रकृतिका बिरामी थपिए अस्पतालमा राख्न ठाउँ नभएको बताउँदै सूचना अधिकारी श्रेष्ठले अहिले अस्पतालले कोरोना पुष्टि भएर गम्भीर अवस्थाका बिरामीलाई मात्र अस्पतालमा राखेर उपचार गरिरहेको बताए।
५५ शैयायाको कोरोना अस्पताल रहेको बताउँदै सूचना अधिकारी श्रेष्ठले सामान्य लक्षण भएका बिरामीलाई घरमै बस्न भनेको बताए। त्यस्तै, महाकाली अस्पताल पनि गम्भीर प्रकृतिका कोरोना संक्रमितले भरिएको छ। अस्पतालमा ४८ जना संक्रमितको उपचार भइरहेको सूचना अधिकारी नारद भट्टले जानकारी दिए। उनले ६ जनाको आईसीयू र एक जनाको भेन्टिलेटरमा उपचार भइरहेको बताए।
त्यस्तै, अस्पतालले १५ जनालाई अक्सिजनको सहायतामा राखिएको जनाएको छ। अस्पतालकै १७ जना स्वास्थ्यकर्मीमा कोरोना संक्रमण देखिएपछि महाकाली अस्पतालमा जनशक्तिको समेत चरम अभाव सिर्जना भएको सूचना अधिकारी भट्टले बताए।
प्रदेशमा सबैभन्दा बढी संक्रमण दर बढेको कैलालीमा धनगढी उपमहानगरपालिकाले आइसोलेसन सञ्चालन गरेको छ। त्यहाँ अहिले ६४ जना संक्रमितलाई राखिएको वडा नम्बर ८ का अध्यक्ष नारायण बरालले बताए।
सुदूरपश्चिम प्रदेशको सामाजिक विकास मन्त्रालयले स्थान र दक्ष जनशक्ति व्यवस्थापनमा मन्त्रालय जुटेको जनाएको छ। मन्त्रालयका प्रवक्ता नरेन्द्रसिंह कार्कीले कैलालीको गेटामा निर्माणधीन गेटा मेडिकल कलेजलाई आइसोलेसन केन्द्र बनाउने बारे छलफल भइरहेको बताए।
निजी अस्पताल संघ सुदूरपपश्चिम प्रदेश समितिको आइतबार बसेको बैठकले १०० बेड सहयोग गर्न तयार रहेको जानकारी दिएको छ। निजी अस्पताल संघ सुदूरपपश्चिम प्रदेश समितिका अध्यक्ष जनकराज जोशीले सरकारले आग्रह गरेर स्थान उपलब्ध गराएको अवस्थामा सहयोग गर्न प्रतिवद्ध रहेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787457387.png)
.._ELsE3tlM5D-1772177971.jpg)
-1786602170.png)
-1786513116.png)
