फाइल तस्बिर
काठमाडौं- एमालेको राष्ट्रिय महाधिवेशन आयोजक कमिटीको सोमबारको बैठक सम्पन्न भएको छ। प्रधानमन्त्री निवास बालुवाटारमा बसेको बैठकमा प्रधानमन्त्री तथा एमाले अध्यक्ष केपी शर्मा ओलीले सम्बोधन गर्नुका साथै राजनीतिक प्रतिवेदन पेस गरेका थिए। प्रतिवेदन सुझावसहित पारित भएको प्रवक्ता प्रदीप ज्ञवालीले बताए।
प्रतिवेदनमा आगामी कार्यभारको रुपमा तीन वटा कुरालाई मुख्य जोड दिइएको छ। जसमध्ये निर्वाचनमा जानुपर्ने परिस्थिति रहेकाले तयारी रहन कुरा पनि छ। 'कुनै पनि बेला निर्वाचनमा जानुपर्ने भएकाले त्यसका निम्ति तम्तयार हुनको निम्ति पार्टी पंक्तिलाई आह्वान गरिएको छ,' बैठकपछि ज्ञवालीले भने।
पार्टी निर्माणका कामहरु, पार्टीलाई नयाँ धरातलमा पुनर्गठित गर्ने कुराहरु, पार्टीलाई कमजोर गर्न गतिविधि गरिरहेका साथीहरुलाई फर्काउने प्रयासलगायतका विषयहरु प्रतिवेदनमा रहेको ज्ञवालीको भनाइ छ। उनका अनुसार, एमालेलाई देशको नेतृत्वदायी शक्तिको रुपमा विकास गर्न पार्टी निर्माणको शुद्धीकरण तथा सुदृढीकरणको विषयमा जोड दिइएको छ।
त्यस्तै, समृद्धिको अभियानलाई तीव्रता दिन तीनै तहका सरकारहरु थप सक्रिय हुनका निम्ति प्रतिवेदनमा आग्रह गरिएको छ। 'विभाजनकारी गतिविधिमा लागेका साथीहरुलाई ती गतिविधिहरु बन्द गरेर पार्टी एकतालाई सुदृढ गर्न फेरि पनि फर्किनका निम्ति प्रतिवेदनले आह्वान गरेको छ। नफर्के त्यो कारबाहीको विषय बन्ने कुरा उल्लेख गरिएको छ,' उनले भने।
प्रतिवेदनमा वर्तमान राजनीतिक परिस्थितिको समीक्षा गरिएको उनको भनाइ छ। 'राजनीतिक परिस्थितिको निष्कर्षको रुपमा प्रतिनिधिसभा पुनःस्थापना भए पनि मुलुकले राजनीतिक स्थायित्व प्राप्त गर्ने र वर्तमान समस्याहरुको समाधान हुने सम्भावना एकदमै कम देखिएको कुरामा विशेष जोड दिइएको छ,' उनले भने।
प्रतिवेदनमा नेकपाको तीन वर्षे अवधिको समीक्षा गरिएको ज्ञवालीले बताए। 'निष्कर्ष निकालिएको छ- पार्टी एकीकरणको हाम्रो मनशाय सही थियो। तर केही गलत प्रवृत्ति र पात्रहरुको कारणले एकीकरण असफल भयो। सर्वोच्च अदालतले कानुनी हिसाबले टुंग्याइदिए पनि वस्तुतः राजनीतिक र संगठनात्मक कारणले पार्टी एकीकरणचाहिँ पहिल्यैदेखि करिब-करिब भंगको अवस्थामा थियो भन्ने त्यसको निष्कर्ष छ,' उनले भने।
प्रतिवेदनमा सरकारका तीन वर्षे कामको समीक्षा गरिएको छ र धेरै प्रतिकूलताका बीचमा पनि महत्त्वपूर्ण उपलब्धिहरु हासिल गरेको निष्कर्ष प्रतिवेदनले निकालेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
