लण्डन- आउँदो हप्ता हुने भनिएको बेलायती प्रधानमन्त्री बोरिस जोनसनको भारत भ्रमण रद्द भएको छ।
भारतमा कोरोना संक्रमितको संख्या प्रतिदिन १ लाखले बढ्न थालेपछि उनको भ्रमण रद्द गरिएको हो
भारतीय विदेश मन्त्रालयले सोमबार भ्रमण रद्द भएको पुष्टि गरेको हो। परराष्ट्र मन्त्रालयका प्रवक्ता अरिन्दम बागचीले दुवै पक्षले आपसी सहमतिमा निर्णय लिएको जनाएका छन्।
‘कोरोना भाइरस बढ्दो क्रममा रहेकाले अर्को हप्ता हुने भनिएको प्रधानमन्त्री बोरिस जोनसनको भारत भ्रमण रद्द गरिएको छ। प्रधानमन्त्री नरेन्द्र मोदी र जोनसनले यस महिनाको अन्तमा वार्ता गर्नेछन्’, बेलायती प्रधानमन्त्रीको कार्यलय टेन डाउनिङ स्ट्रिट र भारतीय सरकारको तर्फबाट संयुक्त विज्ञप्तिमा भनिएको छ।
यद्यपि, यो महिनाको अनेतमा उनीहरुबीच भर्चुअल रुपमा वार्ता हुनेछ।
‘बेलायत–भारतबीचको भावी साझेदारीको लागि भर्चुअल वार्ता हुनेछ। यो वार्ताको क्रममा महत्वाकांक्षी योजनाहरुमा सहमति हुनेछ,’ विज्ञप्तिमा भनिएको छ।
भारत– बेलायत दुवै पक्षले उर्जा, व्यापार, लगानी र जलवायु परिवर्तन कार्यका क्षेत्रमा सहयोग गर्ने सम्झौता गर्नेछन्।
उनीहरूको आमनेसामने बैठक भने यस वर्षको अन्तमा हुने अपेक्षा गरिएको छ।
बेलायतको विपक्षी लेबर पार्टीले पनि उनलाई भ्रमण स्थगित गर्न र जुममार्फत भर्चुअल रूपमा छलफल गर्न आग्रह गरेको थियो। यसअघि भ्रमण एक दिनको लागि छोट्याउने घोषणा गरिएको थियो। यो भ्रमण चार दिने हुने जनाइएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
