काठमाडाैं- लुम्बिनी प्रदेशका मुख्यमन्त्री शंकर पोखरेलविरुद्ध अविश्वासको प्रस्ताव पारित हुन एक मत नपुग्दा कांग्रेस र माओवादी केन्द्रको पहलले सार्थकता पाउन सकेको छैन।
जनता समाजवादीकी सांसद कल्पना पाण्डे अविश्वासको प्रस्तावको पक्षमा नदेखिँदा मुख्यमन्त्रीविरुद्ध विपक्षी दललाई बहुमत पुगेको छैन। जसपा अध्यक्ष महन्थ ठाकुर तथा वरिष्ठ नेता राजेन्द्र महतोको पक्षमा रहेकी कल्पना पाण्डे अविश्वास प्रस्तावको विपक्षमा छन्। प्रदेश सभामा ६ सांसद रहेको जसपाका अन्य पाँच सांसद भने अविश्वासको प्रस्तावको पक्षमा छन्।
जसपासँग भएका ६ जना प्रदेश सभा सदस्यमा तत्कालीन समाजवादीबाट पाँच जना र तत्कालीन राजपा पक्षबाट एक जना सांसद छन्। जसपाको उपेन्द्र यादव र डा बाबुराम भट्टराई पक्षमा विजयबहादुर यादव, सन्तोष पाण्डे, सहसराम यादव, सुमन शर्मा रायमाझी र पुर्मती ढेगा छन्।
माओवादी केन्द्रलाई मुख्यमन्त्री बनाउने गरी कांग्रेस–माओवादीबीच आन्तरिक तयारी भएपनि जसपा सांसद निर्णायक बनेकी छन्। पार्टी केन्द्रको निर्देशन विपरीत अविश्वासको प्रस्तावको पक्षमा मतदान नगर्ने जसपा सांसद पाण्डेले नेपाल लाइभलाई बताइन्।
कुल ८५ प्रदेश सभा सदस्यमा माओवादी केन्द्रका सभामुखसहित १८ जना छन्। २० जना प्रदेश सदस्य रहेको माओवादी केन्द्रका दिनेश पन्थी र माधव शर्मा एमालेमा गएकाले कारबाहीमा परेका छन्।
माओवादी निकटका पूर्णबहादुर घर्ती सभामुख छन्। अविश्वासको प्रस्तावको पक्षमा मतदान गर्न पाउने माओवादी केन्द्रका सांसद १७ जना छन्। कांग्रेसका १९ जना छन्। राष्ट्रिय जनमोर्चाबाट १ सांसद छन्। कांग्रेस–माओवादी केन्द्र– जसपा–राजमो गर्दा विपक्षी दलको मत ४३ पुग्दछ। बहुमतका लागि ४३ मत नै आवश्यक पर्दछ। त्यसका लागि विपक्षी सबै दल एक ठाउँ उभिनुपर्ने हुन्छ। ४१ सदस्य रहेको एमालेका लागि बहुमत पुर्याउन २ सांसद भए पुग्छ। तर, माधव नेपाल पक्षका सांसदले मत दिनेमा मुख्यमन्त्री पोखरेल ढुक्क हुने अवस्था भने छैन।
सरकार ढाल्नसक्ने निर्णायक पात्र कल्पना पाण्डेले आफ्ना अध्यक्ष ठाकुरलाई भेटेर अविश्वासको विपक्षमा उभिने मनस्थिति बनाएकी छन्। ‘पार्टी केन्द्रको राजनीति अनुसार प्रदेशमा आफ्नो भूमिका देखाउन भन्नुभएको छ।’ काठमाडौंमा रहेकी पाण्डेले भनिन्, ‘पार्टी केन्द्रले जे निर्देशन गर्छ,त्यही अनुसारको भूमिका देखाउँछु।’
पाण्डेले निर्णय नलिँदा उनलाई मनाउन कांग्रेस र माओवादी केन्द्रका सांसदहरू प्रयासरत छन्। उनीहरुको प्रयासले पनि पाण्डे ‘कन्भिन्स’ हुन सकेकी छैनन्। बहुमतका लागि एक सांसद अपुग भएकाले अविश्वासको प्रस्ताव दर्ता हुन नसकेको माओवादी केन्द्रकी प्रदेश सांसद दामाकुमारी शर्माले बताइन्। पार्टी केन्द्रको निर्देशन कुरिरहेकी जसपा सांसद पाण्डेलाई अविश्वासको प्रस्तावका पक्षमा ल्याउन प्रयास भइरहेको शर्माले बताइन्।
एक सांसद नपुगेकै कारण अविश्वासको प्रस्ताव दर्ता हुन नसकेको भनाइप्रति कांग्रेस असहमत छ। दलहरूबीच वार्ता जारी भएको बताउँदै कांग्रेस संसदीय दलका नेता वीरेन्द्र कनोडियाले भने, ‘जसपाको कारण मात्रै अविश्वासको प्रस्ताव दर्ता हुन नसकेको होइन। हामी छलफलकै क्रममा छौं। अविश्वासको पक्षमा हस्ताक्षर गर्ने सांसद धेरै जना जम्मा हुन पनि समय लाग्छ।’
विपक्षी चार दलबीच माओवादीलाई मुख्यमन्त्री दिने गरी मन्त्रिमण्डलमा भागवण्डा गर्ने तयारी छ। माओवादीलाई मुख्यमन्त्रीसहित २ मन्त्री, कांग्रेसबाट ३ र जसपाबाट ३ मन्त्री बनाउने आन्तरिक छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1791388337.png)
